自從住咗hall先知，扑野原來可以咁簡單: 繼續系列《六、近水樓台，先得穴》
我望一望後樓梯，確保無人之後先急急腳咁衝入防煙門，向上三層跑。
之後再係七樓嘅防煙門入面向出面望，見到成條走廊空無一人，我就衝出去推開頭房道門。
「屌，好彩無人。」我一入房之後就講。
Kyle因為打緊機，所以無望過嚟；「驚閪咩，屌。」而佢講嘅時候雙目都無離開過部電腦。
「你都痴線，一陣比你個層啲人見到點算，會死架屌。」我理所當然咁講：「你條女咁多線眼。」
「我都未驚，你怕乜姐。」佢停低手上面嘅動作，過嚟我面前拉起我雙手：「好怕比人知咩你，吓？」然後佢就強行抱起我個頭嚟錫。
我地呢段關係足足維持咗成個sem，但係直到而家，都係一個屬於我地之間嘅秘密。
－－－－－－
我叫阿蕎，而家係一個第三者。
無錯，我好清楚我嘅角色定位係一個第三者。
Kyle係七樓嘅呵挑，而佢女朋友阿欣啱啱呢年grad咗。
我之所以會同Kyle開始，係因為「貪玩」。
我同Kyle上年一啲都唔熟，只係維持見到面會點個頭寒喧幾句嘅程度。
直到暑假有個為期一個月嘅台灣遊學團，成團人我一個人都唔識，唯獨係Kyle。
「咦，咁啱嘅阿蕎，你又報咗呢個團？」係機場集合個時，Kyle拖住個大喼走到我面前。
「係呀，想散下心嘛。」當時我啱啱同一個糾纏咗成年嘅前度斬纜，心情正好係要離開香港嘅時候，呢個遊學團簡直係及時雨。
「好彩有你咋，有個識嘅人就好似多個伴咁。」佢笑一笑咁講。
而呢趟旅程，就打開咗我同佢之間關係嘅不歸路。
因為呢個遊學團嘅人係可以比任何同學參加，所以同行嘅人都係來自唔同學部、各個年級嘅人都有。
而我當時嘅roommate係一個叫芯宜嘅女仔，佢同佢男朋友阿希一齊參加呢個團；而阿希正正就係Kyle嘅roommate。
「我今晚過去我男朋友到呀，要你自己一個人sorry呀，聽晚我再慢慢同你傾計呀！」芯宜雙手合十咁同我講，然後就好開心咁過咗阿希個邊。
而我當晚梗係獨守空房，我自已打開咗酒店嘅電視，係咁轉台。
「唉，咁悶，又無野睇。」我一野瞓係床上面，凝視住奶白色嘅天花發呆。
過咗唔知幾耐，我聽到「咯、咯」聲。
我成個人嚇到彈起咗，隨即又暗笑自己太細膽，應該係芯宜返嚟。
點知一打開門，係Kyle。
「hi，做咩呀？」我有啲意外，不過都如常咁問佢。
「你roommate同我roommate呢…」佢指嘅係芯怡同阿希：「佢地鎖咗門，我入唔到去。」佢苦笑咗一下。
「吓？黃燈俠？你有無打比佢地呀？」我哭笑不得咁問。
「打咗十幾次，無人聽呀。」佢搖搖頭：「我知唔係咁好，不過可唔可以借間房比我hea下呀？芯宜返嚟我就走架喇。」佢個樣好誠懇咁講。
「哦，好呀。」反正我一個人對住四面牆都悶到痴線，呢個時候有人陪我都好過自己一個嘅。
「啱啱我自己出咗去夜市行咗個圈，食到好飽呀！」佢呼咗口氣，摸摸自己個肚，然後一野坐咗落芯宜張床到。
「其實我第一次嚟台灣架咋，我都未有機會出去行添。」我唔好意思地講。
「吓？居然？」佢好難以置信地望住我：「台北喎，唔係中學grad trip首選之地嚟架咩！」
「係呀，本身我就好少去旅行，台灣又真係無嚟過。」我答佢：「所以我都唔知有咩好食有咩好玩。」
「嗱，咁等我做你導遊，聽日完哂啲行程帶你去夜市到掃街喇！」佢拍哂心口咁講。
「好呀。」雖然心裡面覺得同佢完全唔熟，唔知點解佢咁熱衷；不過有個識嘅人帶我玩都好過一條友戇居居嘅。
個晚芯宜直到四點幾都無返嚟，Kyle極唔好意思咁問我：「咁我今晚可唔可以係到瞓呀？唔好意思呀我真係諗唔到其他辦法。」
「唔通我趕你出去咩。」
當晚我同Kyle就共渡一宵，咩事都無發生過。
第二日上完堂之後，我同Kyle就出發去饒河街夜市。
其實台北嘅感覺同大陸都有幾分相似，除咗最出名嘅景點以外都好簡陋；不過呢種簡陋又唔會令人生厭，難怪呢到周街都係香港人。
我地沿路一直走，未到夜市都已經見到不少路邊熟食檔口。
我地走咗一段路，終於見到遠處有個好大型嘅霓紅燈牌。
「到喇！」佢指住霓紅燈牌：「個到好多野食架，我地行快啲喇。」
穿梭係人來人往嘅夜市之中，我其實唔知有咩好食，於是我問Kyle：「有咩好推介呀，丫導遊。」
Kyle指住最近門口嘅第一檔：「呢間胡椒餅幾出名，你試下囉！」
於是成晚我同佢就不斷咁食，食到我個肚都漲到不得了。
「喂，唔得喇，好飽。」我諗咗陣：「不如我地唔好搭捷運，我地行返去喇，當消化下。」
「又得啫。」
於是我同佢就慢慢向住酒店方向行，睇google map都要行成九個字。
「咁你呢？」我問佢：「點解你又會自己報呢個團嘅？」
「因為我本身就好鍾意台北架喇，見佢有得去台大交流之餘仲可以係到stay成個月喎，學部又有資助，抵玩到爛喇！」佢興奮地講：「星期六日仲可以去遠啲地方玩添呀！」
「係嘅，我都當比自己去個長途旅行。」我唏噓咁講：「反正留係香港都唔係咁開心，出走一下可能會好啲。」
「做咩呀你，失戀呀？」佢隨口咁講。
「你當係喇。」我都無多講啲咩，始終同Kyle稱唔上熟，自己私事都無須多講。
返到酒店門口，我地就撞到同樣啱啱返嚟嘅芯宜同阿希。
「咦，你地兩個去邊嚟呀？」阿希不懷好意咁笑道。
「無呀，我帶阿蕎去夜市食野咋嘛。」Kyle平淡地回答。
「咁開心，下次叫埋我地呀嘛。」阿希講完之後芯宜就打咗佢一下：「咪阻人喇你，燒春袋架！」
我同Kyle面面相覷，只係以笑嚟表達我地嘅無奈。
返到房之後，芯宜即刻話：「你同Kyle好熟架？」
「又唔算嘅，我同佢本身同hall架囉。」我同樣係無奈地回應。
「咁就好喇！因為我應該會成日去阿希房架…咁Kyle到時stay係到，你OK架可？」佢雙眼發光咁望住我。
「吓，唔係掛？」雖然我同Kyle都叫有計傾，但晚晚有個男仔係到似乎唔係咁方便，我仲要同Kyle啱啱先算得上係認識大家。
「我見你地兩個都一齊出去食野，都應該幾friend呀，無問題嘅！」佢好落力咁游說我：「我唔會晚晚過去架，我都會留係到陪你架。」
「唉，咁好喇。」我出於唔好意思拒絕佢嘅心態，心裡面雖然唔想，但都係應承咗芯宜。
但好快我就發現，我唔只係間唔中收留下Kyle咁簡單，直頭好似changing roommate咁。
多數嘅時間芯宜都會走咗去阿希房，然後Kyle就一臉無奈咁走過嚟。
「屌，佢地真係日扑夜扑架喎。」Kyle哭笑不得咁講。
「唉，無架喇，鬼叫我心軟應承咗芯宜咩。無諗過佢真係日日過去，仲要幾乎唔會返嚟瞓。」
「係呀，所以而家你roommate已經唔係佢，係我喇。」佢著住camp tee同沙灘短褲：「我諗我今晚都照舊係到瞓架喇。」
「得喇，明架喇。」個陣其實只係過咗十日左右，不過由於隔日Kyle就會過嚟我呢到瞓，所以我同佢之間都因而熟咗好多。
「喂，咁我瞓先喇，今日好攰，你自便喇。」我向係廁所刷緊牙嘅Kyle大嗌。
佢探個頭出嚟做個「ok」嘅手勢，就繼續刷牙。
日子耐咗，我已經接受咗Kyle係我roommate嘅事實。
雖然男女同處一室，不過佢對我都算係以禮相待，所以漸漸地，我對佢都產生咗一份信任同依靠。