自從住咗hall先知，扑野原來可以咁簡單: 繼續系列《五、ocamp · 戀愛嘅add drop period》
呢個世界好多相遇都係冥冥中注定咗。
你可能以為係巧合，但係眾多巧合加埋一齊就係一種安排。
係上天比你嘅安排。
記得第一次見阿希並唔係一次正式嘅見面，當時我同佢互不相識。
阿希個時嚟我地個堂lecture接放學，向一班基本會員宣傳自己枝莊嘅政綱，仲有叫大家投票。
當時我已經好留意佢，除咗因為佢個樣係咁多個男莊員入面比較出眾之外，我都被佢不羇嘅笑容所吸引住。
不過當時嘅我無咩參與自己系嘅活動，都無興趣參加，於是都無機會識到阿希，而佢個樣就已經係我心入面留低咗。
後來再同阿希見面，居然又係一次巧合。
「hello，我到咗喇，你係邊？」我係旺角E出口到處張望，試圖尋找個同我一樣拎住電話嘅男人。
「我諗我見到你喇。」電話入面嘅男聲講。
之後有人係我身後「Hi」咗聲，我一轉身就見到阿希。
「你check下本書有無問題。」當時我係討論見到有人出post話有大量書唔要，唔想浪費所以免費送比有心人，見到有芥川龍之介嘅《羅生門》，一直好想睇呢本書嘅我就即刻聯絡咗樓主。
點知一直同我聯絡嘅就係阿希。
雖然我心裡面覺得好神奇好有緣份，不過其實我對佢嚟講只係個素未謀面嘅陌生人，所以我都唔可以喜形於色，唔係佢一定以為我係痴線。
「ok呀，唔該哂。」我揭一揭啲內頁，本書新到好似無睇過咁，除非佢真係無睇過喇，否則都應該係惜書之人先會將本書保存得咁完整乾淨。
「好喇，多謝你幫我接收啲書。」佢微微一笑，嘴角又揚起咗當日好吸引我嘅微容。
「點解你會送咁多書出嚟嘅？」我諗係出於想同佢傾多幾句嘅心態，我居然敢咁樣問佢，明明我地根本就唔識大家。
「哦？因為我太鍾意買書，但係好多書我睇完一次就唔會再睇，屋企又無咁多位放，我咪睇下有無有心人收留咗佢地。」佢似乎估唔到我會咁問，見佢有少少愕然，但隨即又自然地答我。
之後我地就咁樣道別咗。
我連同佢講我地其實同一間大學嘅勇氣都無。
心裡面除咗怪自己太膽小之外，都覺得自己未免想得太多，畢竟我地都只係稱得上係一面之緣，佢連我咩名都唔知。
阿希呢個人都漸漸係我心裡面遺忘得一乾二淨，當時嘅我仲係year1。
事隔兩年直到我year3嘅尾聲，同男朋友分手無耐嘅我比roommate拉咗我去玩ocamp。
我望住個招寡組爸媽嘅海報，上面寫住：「自問玩得yo得嘅你，快啲報名做我地嘅爸媽oc喇！」
「唉屌，我無做過架喎。」我有啲唔好意思咁講，因為係大學入面比較鍾意玩嘅人唔多唔少都做過一次組爸媽oc之類嘅角色，但係我之前一直都覺得玩ocamp好柒，成班人係到鳩嗌又要dem埋啲唔知有咩意義嘅beat，我寧願用嚟返工賺下錢好過。
加上以前男朋友都唔想我玩ocamp，所以我由始至終都無打算玩ocamp。
「得架喇，我識呢枝莊個evp，我同你一齊入去玩，你part我就無問題架喇。」阿晨一臉興奮咁講。
阿晨係我roommate，好多人都會因為佢個名而誤會佢係個男仔，但其實佢係個不折不扣嘅氣質型靚女，我同佢亦因為同房兩年而變成咗好朋友。
佢一向都話我係大學過得太摺，應該要留返啲青春同熱血嘅回憶比自己。
「喂，學啲人話齋，搏盡無悔呀嘛！」
「屌你，仲講呢句，老撚土。」
之後我地兩個就企咗係張poster面前大笑。
－－－－－－就係因為咁，我好順利咁成為咗組媽，我個組除咗有阿晨以外，都會有兩個組爸。
去到六月份咁上下嘅時間，負責呢個ocamp嘅莊員就搞咗個gathering，目的係比一班嘅組爸媽熟落下聯誼下感情咁。
我本來就唔係好想去，因為我除咗阿晨，真係一個人都唔識，我覺得好尷尬。
「唔通你唔去咩，你遲早都要識啲人架喇，咪咁毒喇你，成個毒撚咁。」阿晨坐係對面床講，隻手就一路㩒緊電話。
「一係你話我病咗去唔到囉，有啲人都唔係香港唔去喇！」我抱住個去少一次得一次嘅心態，唔想咁快就要面對果個好尷尬嘅場面。
「唔得呀，一定要去呀，我幫你同咗佢地講你都去架喇！」阿晨舉起佢部電話，係我面前揚手：「你放飛機就死！」
「唉，食屎喇。」
就係咁樣，我零期待嘅組爸媽gathering就係六月中如期舉行咗。
當晚出席嘅人數大概有廿幾人，當中包括埋部分莊員。
當晚只係隨意地book咗個班房，而我地成班人就圍咗個大圈坐咗係地上面。
正如我所講，好多人都因為唔係香港、要返工等等嘅理由而無出現。
「咁多人都無嚟，早知我都唔蒲頭喇。」我細細聲咁係阿晨耳邊講。
「你好煩呀。」阿晨反咗下白眼就無再理我。
然後就係一輪自我介紹，望住一班唔識嘅人係到自我介紹，我其實好快就唔記得哂啲人叫咩名讀咩科。
「咁我地玩個ice breaking game先喇！」莊員A拍拍手向我地講。
個刻我已經心知不妙，我一定會輸。
首先有面盲症嘅我已經好難認得人，仲要一次過記哂咁多個人嘅名，對我嚟講同要我爆四無咩分別。
正當我把心一橫借尿循避過呢個戇鳩game嘅時候，有個莊員帶住幾個人入咗嚟。
「今日會嚟嘅爸媽到齊喇終於！可以準備再自我介紹一次喇大家。」莊員B向住我地講。
正當我想企起身去廁所之際，我見到果幾個遲到嘅人，居然包括已經兩年無見嘅阿希。
我凝視咗佢一陣之後，佢好似發現咗我嘅目光，當我地眼神對上咗嘅時候，我見到佢彷彿有啲意外；然後佢就望住我點點頭，笑咗一下。
佢坐低之後，我即時打消咗去廁所嘅念頭，心裡面泛起咗一陣興奮。
當你一直感興趣想識嘅人終於有機會比你認識佢，甚至諗到有機會可以透過呢個ocamp同佢變得更熟；莫明嘅興奮即時湧現，我馬上變得好熱衷同投入。
「我叫芯宜呀，而家year3，讀translation。」我面帶笑容咁講。
之後成晚玩咩game都好，我都好配合好投入咁同大家玩，縱使好多game我都係第一次先接觸。
「嘩，你食咩屎嚟，突然間變到咁積極，精神分裂？」係食野時間個陣，阿晨走埋嚟同我講，頭頂好似有個黑人問號咁。
「又係你叫我唔好毒撚咁，嚟到咪玩下囉。」我打算返到房先同阿晨講，所以當下都係敷衍住佢先。
「古古怪怪咁。」講完之後阿晨就去同其他人寒喧，留返我係一個人企係滿佈食物嘅長枱面前。
「Hi。」我抬頭一望，阿希難以置信咁望住我：「真係你呀！你記唔記得我呀？好耐之前讓本《羅生門》比你果個巴打呀！」
「頭先見到你我就記得喇，哈哈。」我表面上禮貌地回應，實際上當然係開心同興奮。
「估唔到你同我同一間喎，又會咁橋。」
「係囉。」
之後我地閒談咗幾句就開始gathering嘅下半part。
當晚都係一片歡愉嘅氣氛下完結咗。
－－－－－－
我同阿希雖然玩同一個ocamp，不過並無好似tvb嘅劇情咁幸運地係同一組。
不過由於暑假大家都好得閒，所以成班組爸媽成日都會係個whatsapp group到約食飯、飲酒之類嘅活動咁。
我每次見到個list有阿希個名就會跟住一齊留名。
雖然係咁，不過之後見面我地都無咩特別交流，好快我對佢嘅感覺都愈來愈淡然。
即使幾有與趣都好，但如果對方無同樣嘅感覺同行動嘅話，身為女仔都唔會多做啲咩，講到尾都係所謂嘅矜持作祟。
漸漸地，我都真係當佢係朋友咁看待，再無其他多餘嘅諗法。
後來亦都因為我地呢堆人見得愈來愈多，我地成班組爸媽變得好熟，而我同阿希到後期都熟咗唔少。
「今晚阿晨佢地話打牌喎，你嚟唔嚟呀？」我直接打比阿希，因為個時三缺一，阿晨係我隔離猛咁催我搵人。
「好呀，係你地hall打呀？」電話入面傳來一陣好嘈吵嘅車聲，佢應該係街到。
「係呀，七點開始，完咗出去食宵。」
「咁我嚟到打比你喇。」
我地直到八點先齊腳開枱，除咗阿希同阿晨，仲有我個組嘅partner Leo。
「喂，去完邊嚟呀你咁鬼遲。」阿晨打咗隻一萬出嚟，Leo就即刻叫咗聲「碰」。
「屌咁快嘅你。」我話口未完，阿希就答；「同完女女出街呀。」
我聽到個刻個心好似有一下失落感，不過好快就無事，我諗係因為一早已經知道同佢無咩大機會發展到，所以都不至於好唔開心。
「嘩，乜出咗pool咩你？」我故作八卦咁問佢。
「唔係呀，最近識咗個女仔，認識緊姐。」
「哦。」我心裡面頓時鬆咗口氣。
呢次之後，阿希開始係whatsapp搵我。
而佢搵我當然唔係因為對我有興趣，而係叫我教佢點樣追女仔。
我：20:38 乜你無溝過女架咩，呢啲都要問。
阿希：20:38 我毒撚嚟架，拍過一次拖，仲要已經係中學，我真係唔識呢啲野。
當時我只係抱住個幫朋友嘅心態，本來都有少少不是味兒，但後來已經完全接受咗「佢對我無興趣」呢個事實，甚至好落力地教佢點樣同女仔打開話題。
「拿，你試下send啲好笑嘅post比佢睇，睇下佢點覆你囉！」個日佢搵我食野，阿希話個女仔唔係幾理佢。
「唉，呢招我試過喇，佢藍剔我呀。」佢一臉愁容咁講。
「佢係咪無上開連登，所以對呢啲話題無興趣呀？」我試圖安慰佢。
「屌，唔知呀，係掛。」佢好懊惱咁講：「溝女真係好煩。」
「乜你真係好鍾意佢咩，你鍾意人啲咩？」我見佢好似好煩咁，我以為呢個女仔一定有啲好吸引佢嘅地方，令阿希咁想追到佢。
「無架，純粹因為佢靚，先想試下有無得發展。」
個下我心裡面對阿希唔多唔少都有啲失望，因為我無諗過原來佢都係個啲咁一般、咁膚淺嘅男仔。
由教佢追女仔開始，我同阿希嘅距離都拉近咗好多。
係成班組爸媽裡面，除咗阿晨以外最熟嘅一定係阿希。
「喂，一陣我收工過嚟搵你地食宵ok？」阿希打嚟同我講。個晚我地成班組爸媽搞緊啲ocamp事務，佢唔係到，不過知我地完咗會食宵夜。
「好呀。」
之後我地去咗間茶記，阿希嚟到就即刻坐咗係我隔離。
「我唔想食咁飽呀，我地食一樣野share好無呀？」佢望住個餐牌一陣，之後又望一望我講。
「你想食咩？」
最後我地叫咗個福建炒飯。
佢先係用個細碗分咗比我先，之後話：「你唔夠食先再係我拎喇。」
阿晨見到就笑笑口咁話：「喂你地好sweet喎，share食咁開心。」然後陰陰嘴笑咁望住我。
「收皮喇。」我隨即反駁佢。
雖然一齊share同一個飯唔代表啲咩，但係個晚我居然比阿晨抽水抽得好開心。去到後期，我事無大小都會同佢講，養成咗每日都要同佢whatsapp嘅習慣。
我：00:27 聽日得唔得閒呀？
阿希：00：28 做咩？
我：00:28 幫我搬野呀，阿晨返工但我要調房，得自己搬我搞唔掂呀。
阿希：00:30 請我食tea
我：00：31 無問題！
第二日晏就，阿希就嚟咗我hall幫我搬野。