自從住咗hall先知，扑野原來可以咁簡單: 繼續系列《三、A0 but experienced》
每年十一月都係大學畢業禮嘅季節，校園周圍都係戴住四方帽、準備入社大嘅準「freshman」。
「眨下眼就grad喇，四年真係過得好快！」Selina一路整理佢件畢業袍一路同我講。
「係囉，咁就grad喇，我仲要A住grad。」呢四年嘅回憶同片段好似走馬燈咁係我腦海中逐一飛過。
「錯，係A0咁grad，哈哈。」佢一貫地挪揄我。
「係喇係喇，邊似你咁幸福呀同Edmund齊齊grad。」
見到遠處有對情侶好開心咁影緊畢業相，手上面拎住而家好流行嘅水晶汽球。
「喂，你估呢。」佢諗咗陣，「佢今日會唔會過嚟同你影相？」然後望實我。
「我諗唔會喇，我又唔係佢邊個。」我深深咁吸咗一啖氣。
「你仲好掛住佢？」Selina收起咗平日嬉皮笑臉嘅表情。
「嗯。」我如實回答。
「唉，何必呢。」佢嘆咗口長氣。
然後我地同屋企人、大學嘅朋友、莊員等等人影完相之後，我見到佢出現咗。
「阿健？稀客喎，你都會蒲頭。」Selina見到佢出現就即刻咁講，然後偷偷望咗我一眼。
「我過嚟同Jean影相架。」佢向住Selina微笑，再轉向我：「畢業快樂。」
「多謝。」我裝作平淡咁報以一個微笑，內心其實好激動。
然後我地兩個人一齊影咗張相，相入面阿健輕輕搭住我膊頭。
「你grad咗之後唔好唔記得我呀，得閒返嚟搵我食lunch喇。」佢用一個好輕鬆嘅語氣講。
「好呀，得閒就返。」我配合佢，以同一個語調回應。
「我要去傾project喇，走先，記得whatsapp返張相比我喎！」然後佢就急急腳咁消失咗係我眼前。
到最後，我地嘅關係都不過僅僅如此。
－－－－－－－－－－－－－－
女校出身嘅我未有受到身邊同學影響，縱使身邊有幾多同學變成lesbian或者bisexual都好，我一直都只係鍾意男仔，對同性完全無興趣。
順理成章地，我由中學直到大學year1都無拍過拖。
先唔好話拍拖，我係連同男仔瞹眛都未試過，可謂零戀愛經驗。
去到Year1玩ocamp嘅時候，總要比組爸媽輪一輪班freshmen，除咗介紹自己，梗係唔少得round status。
所謂round status即係講自己嘅戀愛狀況，a就等於available，o就係occupied，後面嘅數字就係拍拖次數。
「Jean，到你喇！」聽到幾個同組嘅女仔都有唔同嘅數字，有啲就o1，有啲就a2，最誇張連a5都有。反正有無拍緊拖都好，佢地嘅數字全部都係正數。
「我…a0。」我支支吾吾咁吐出呢個好艱辛嘅數字。
「嘩，屌，A0呀！」組爸Eric係個啲好鍾意串人、好玩得嘅男仔，不嬲都係帶動全場氣氛嘅核心人物嚟。佢起哄之後同組嘅其他人就紛紛跟住一齊嗌，直頭好似哥倫布發現新大陸咁。
「喂你唔似喎Jean，無仔溝你咩？」組媽Kelly打一打Eric，之後問我。
「中學讀女校，全部都係女仔。」我苦笑咗一下。
「拿，唔撚驚呀我話你知，入到U大把仔你溝。我地U無咩多，就係仔多！」Eric拍哂心口咁講。
自從我A0嘅消息傳出之後，大家都好似好熱心咁想幫我出pool。
其實我自己又點會唔想拍拖，女仔對愛情唔多唔少都有啲憧憬，不過我對愛情都有執著，絕對唔想求求其其搵個男仔就送走我嘅初戀。
Year1個年我就住hall，仲上埋hall莊，過咗個忙中帶點悶嘅一年。
結果當然係無拍拖，一嚟莊務都夠煩，無咩心機再溝仔；二嚟係自己無比機會自己，試過有其他hall嘅莊員對我有意思，想約下我出街咁，但我都因為自己無乜意而拒絕咗。
我好怕人地話我收兵，所以我寧願決斷少少，無謂浪費人地時間喇。
到升Year2個年嘅暑假，莊期最後一個活動就係hall ocamp，我都係hall o嘅組媽之一。
「hello大家好，我係你地嘅組媽Jean呀。」本來我都唔係太social嘅女仔，但係身份要我咁做，我唯有扮到好outgoing咁對住班hall freshman。
話就話佢地係freshman，其實新入嚟住hall嘅好多都唔係year1，有啲人可能第一年入宿已經係year2或者更加大，所以話就話我係組媽，但我嘅組仔女好多都大過我。
「我叫阿健，Year3 BBA。」阿健就係其中一個大過我嘅組仔，佢皮膚黝黑、身形高大，外觀望落去係個運動型男仔。
「喂，佢幾正喎，你諗諗佢喇。」另一個組媽兼莊員 Selina係我耳邊細細聲講，我講咗句痴線就無咗回事。
唔知係有心定無意，成個ocamp我都有好多同阿健交流嘅機會。例如一班人行嘅時候佢總會係我左近、食飯又會坐我隔離咁，所以我地漸漸都傾咗好多話題。
「我其實都係比我roommate迫我報架咋，我都唔係好想玩。」我地個時行緊去營地個飯堂食飯，佢好老實咁話我知佢唔想玩hall o。
「吓？點解呀，我見你幾投入呀！」琴晚玩房game有啲比較靜嘅組仔女一早就瞓咗，反而係阿健留守到最後一刻，仲教我地玩隻新房game，連我地幾個組爸媽都未玩過。
「你都知我year3喇，我其實自己都做過組爸呀搞過ocamp咁，咩都玩夠。」佢停一停，然後繼續講：「不過今次玩完我又無後悔嘅，幾開心吖。」
「係咪因為我地幾好玩呢，哈哈。」
「因為識到你。」佢笑咗一下，臉上嘅酒渦一𣊬即現。
我當時只係識得以笑遮醜，怕醜個醜呀。
咁大個女都未試過有男仔咁樣同我講，而我係會有心動嘅感覺。
我個時塊面應該紅過蕃茄。
個一刻我就知道，我奶嘢喇。
出camp之後，我地成組不時都會約埋一齊食飯，以hall嚟講關係都算keep得唔錯。
Selina把口又唔收，成日恃住我同佢熟就不斷咁抽我同阿健水。
「喂你做乜坐Jean隔離呀，果個位唔係比你坐架。」成班人出去食飯啲位其實都係亂咁坐，邊個早入去就邊個坐先；不過每當有其他人想坐我隔離，Selina就會一句撻埋去，然後望實阿健。
阿健面對呢啲情況每次都處變不驚，依舊會坐係我隔離，如常咁同我繼續傾計，就好似唔當Selina講嘅嘢係一回事咁。
我班莊員當然個個都覺得佢對我一定有意思，起勢咁叫我去馬去馬。
比佢地笑我係A0笑足成年，其實我都想破零進一嘅。
之前就話遇唔到鍾意嘅人，但我知道自己對阿健一定有好感，佢追我可能會即刻應承佢。
不過我份人又好細膽，根本唔敢主動做啲咩。
萬一佢其實只係當我組媽咁，我咪好柒？
仲有成年要住係同一個hall，所以我都唔想做太多餘嘅嘢。