自從住咗hall先知，扑野原來可以咁簡單: 繼續系列《一、hall life》

響hall嘅雙人房入面，有個樣貌甜美嘅女仔同另一個高大黑實嘅男仔一齊係床上面睇緊戲，面上掛住好燦爛嘅笑容，兩個人相對而視；

然後佢地會一齊係hall嘅活動穿梭、一齊煮飯、一齊做好多好多嘅事；

以上種種行為簡稱：hall life。

故事嘅結尾係佢地好開心地向住鏡頭高舉「yeah」字嘅手勢，叫同學快啲報hall。

「呢條宣傳片又拍得幾好喎。」Queenie闔埋枕頭上面部手提電腦，向住我講。



「有幾好呀，假象嚟架姐屌。」我冷笑咗下，重新打開部電腦，拉去宣傳片頭個幾分鐘：「一男一女瞓係同一張床，你估真係咁青春呀？」

「吓，好寫實呀，我同你都成日係床睇戲架。」佢重播條片：「我地咪又係趴係床到咁，個姿勢一模一樣架喎。」

「係呀，個姿勢梗係一樣喇。」我停頓咗一下，之後講：「你試下我係仔，你睇下我成晚係咪只係同你睇戲咁簡單？」

「嘩，你咁講野嘅。」佢笑咗笑：「你好似有啲經歷喎？」

「無，我只係想話，住hall先發現所謂hall life同想像中有啲唔同啫。」我語帶雙關咁講。



「呀老鬼，咁請問有咩唔同呢？」第一年入宿嘅Queenie無理好氣咁問。

「你真係想知？」

「係呀。」

「咁我同你講一個故仔，但你唔可以講出去架喎。」

－－－－－－－－－－－




阿聰係個Year4嘅學生，雖然已經唔係大學嘅新鮮人，不過係hall入面佢就係一個確確實實嘅新丁。佢參加咗hall搞嘅ocamp，認識咗一班住係同一座宿舍嘅朋友，係hall嘅生活總算係多姿多彩，起碼悶起上嚟一定有人陪佢玩。

「今晚酒局！一定要齊人！」

「喂今晚有無人打牌呀？」

「求飯腳呀，有無人未食飯呀。」

每日佢都會係whatsapp group接收到一大埋messages，電話總係響個不停。

阿聰投入hall活動之餘，並無忽略同佢唔同U嘅女朋友Stephanie。

佢同Stephanie由中學嘅時候已經一齊，到而家足足四年感情，即使唔同學校都好，都無被距離影響到佢地嘅關係。



初時Stephanie知道阿聰要住hall都有啲擔心，問過佢：「你住hall之後會唔會因為太好玩唔理我架？」

「點會呀，我之前上莊咁忙都有理你喇傻妹，住hall算係啲咩。」阿聰摵一摵Stephanie塊面：「我女朋友咁得意，邊捨得唔理你喎。」

「算你喇。」Stephanie好甜咁笑咗下，攬實阿聰。

就係咁，阿聰點玩都好，都會預留大部份時間比Stephanie，因為佢心底入面真係好愛Stephanie。

有時佢仲會帶Stephanie返hall，所以hall嘅人都知道阿聰有女朋友。

直到第二個學期，有啲宿生因為係交換生，只會係到住一個sem，所以有唔少人都搬走咗，宿舍又出現一堆新嘅面孔。

而阿聰嘅生活而因為咁開始泛咗起一陣漣漪。

「對面搬咗個新嘅local入嚟喎。」阿聰roommate Cason同阿聰講。



「係咩，靚唔靚架。」阿聰係咁意咁迎合下Cason。因為佢一向對其他異性唔會有太多嘅留意，即使係靚女都好。佢覺得點都唔關佢事，反正佢已經有Stephanie。

「OK喇，不過對腳幾正，之前見佢著住短褲出去斟水，白滑到仆街。」Cason講到七情上面咁，阿聰都係一笑置之。

「溝囉，反正你無女。」

「哈哈，有機會我都想識到佢呀屌。」

開學無幾耐就到農曆新年假，正常人都會返哂屋企過新年，所以會留係hall嘅宿生都係得小貓三四隻，就連平時一定會留係hall嘅Non local都會返哂大陸，所以比起聖誕果個sem break更加水靜鵝飛。

阿聰年初二就返咗hall，因為屋企人會返大陸過年，而佢就因為要做埋final year project嘅手尾而無跟埋返去，所以佢寧願返hall都唔想一個人留係屋企。