自從住咗hall先知，扑野原來可以咁簡單: 《二、淫婦的自白》2.2
sem break完咗無耐，我識咗一個人。
「可唔可以借個火機比我？」呢句係佢第一句同我講既說話。
我無答佢，就咁比咗個火機佢。
「唔該哂。」點完火之後佢吸咗一啖煙，問我：「你係呢個hall架？」
個時我地就企係hall出面既位置，嚴格黎講個到唔算係吸煙區，不過大家都會係個到食煙。
「嗯，我認得你，你係hall o既cam man。」我答佢。
「嘎？乜我呢啲二打六都有人認得，哈，係呀。」佢有啲唔好意思咁應我。
「你全程捕捉住我地架喎，點會唔認得你呀。」我笑住講。
「哈哈，我好似未見過你，你叫咩名？」佢問我。
「你叫我阿宜得喇。」
就係咁，我同cam man就識咗。
佢成日都會叫我落黎食煙，有時候我明明啱啱食完，我都會照落去。
或者呢啲就係叫巧合，佢原來係我中學師兄，不過因為大我兩年所以我地都無見過大家。「肥陳佢真係好廢，我啲數學完全係靠自己自修，靠佢應該3都拎唔到。」佢一路講一路大笑。
「我都係佢教，但係我數學真係好廢，所以我2撚咗。」
「嘩，你數學都幾屎喎姐姐。」佢恥笑我。
「哎呀，咁你見我讀media都唔洗計數既，係咁架喇。」我打一打佢手臂。
好快我就知cam man一定係對我有興趣。
我話頭痛，佢攞藥比我食；我話肚餓，佢即刻買M記比我食；我話要趕assignment無得訓，佢陪我一齊唔訓。
甚至我開始覺得佢應該係鍾意咗我。
「你呢，係咪好多人追架？」有次佢咁樣問我。
「係呀，好多架，五六七個咁啦。」我諗住玩下佢，所以咁樣答佢。
「下，咁多呀。」佢聽完好似好失落，之後係到口噏噏咁。
「做咩姐你。」
「我係到數我要同幾多個人爭。」佢好認真咁講。
「傻架咩你，我講下笑咋，你估我女神咩，邊有咁多人追呀。真係有人追都無咁多個啦，何況我無。」我笑住鬧佢。
「哦…咁你都可以計有一個呀。」佢若有所思咁講。
「計一個？邊個呀？」我知佢講緊自己，但係我唔想承認。
「你唔覺我追緊你架咩？」佢問我。
「你咁樣問我好尷尬姐，你想我點答你喎。」我個時咁樣答。
－－－－－
Cam man真係對我好好。
記得有次，我趕緊一份我完全毫無頭緒既功課。
佢見到我咁煩，佢二話不說黎陪我做，正確黎講係幫我做。
佢做咗一半，佢先同我講，原來佢自己第二日要midterm。
佢同我仲要唔同科，一個文科一個商科，但佢幫我做功課。
又有一次，我好任性半夜話想食M記，佢居然特登幫我出去買。
我問佢點解唔叫麥麥送，佢答我：「你話過鍾意食脆既薯條，麥麥送個啲黎到都冧哂啦。」
我未試過有人對自己咁好。
好到對我好過對佢自己。
人心肉造，佢對我既心意我又點會唔感動？
於是，我嘗試同佢發展。
我無再同其他男人來往，因為佢。
我將所有注意力放係佢身上。
我係到諗，我係咪都終於可以拍拖呢。
「你唔好郁，繼續望電腦啦。」cam man幫我吹頭，之後扶正我個頭叫我唔好郁。
「其實點解你對我咁好既。」我忍唔住問佢。
「咪因為我鍾意你囉，傻妹。」佢摸一摸我個頭。
「但係我唔靚，又食煙，無咩好架喎。」呢個係我既真心話，我真係唔知自己有咩吸引到佢。
「食煙我都食啦，同埋我覺得你好靚喎。」佢笑得好開懷咁答我。
「痴線，你真係重口味。」我成日都鬧佢。
「咁咪好囉，無人同我爭。」
我地雖然成日出相入對，但係我地都未有咩親密既行為。
因為我覺得佢同其他男人係唔同既。
我唔可以用平時對男人既手段對佢。
所以我地唔可以咁快發展個種親密關係，會破壞我地既關係。
但我慢慢發覺到，我覺得呢與關係好有壓力。
唔知係咪我唔慣有人對自己咁好，我覺得佢對我好到有啲抖唔到氣。
加上，佢一對我好好，我就諗起自己其實係個公廁。
我點樣配得起一個咁好既男仔。
我唔配，憑咩要人埋我單呀？
羅嘉宜，你唔值呀。
「我買咗宵夜比你食呀，你想食邊樣呀。」我望住果兩份碗仔翅同狗仔粉，我有啲煩燥。
「我咪話咗唔食囉，你做咩又買呀。」我唔耐煩咁講。
「食啦，我山長水遠買返黎，你唔係唔食呀嘛。」佢氹細路咁氹我。
「唉，但係我真係唔餓，一係我放雪櫃聽日叮黎食？」我嘗試同佢講。
「咁，咁你鍾意啦。」講完之後佢放低咗個外賣袋，之後就走咗。
我覺得自己太衰，所以whatsapp咗佢講對唔住。
「其實你咁樣我都好hurt，係咪我有咩做得唔夠好所以你咁樣對我？」佢問我。
「唔係，你好好。係我問題。」之後我補多句：「不如算啦，我覺得我唔夠鍾意你，我唔想哂你時間。」
呢次係我第一次拒絕佢。
－－－－－
我再見到cam man係我拒絕完佢之後一個星期後。
個晚佢飲到好醉，我咁啱放工返黎。
「呀宜…」佢見到我，之後搖搖晃晃咁行咗過黎。
「喂，你點呀，做乜飲咁多呀。」我捉實佢個膊頭，佢個款好似就黎訓低咁樣。
「我好鍾意你啊…你可唔可以同我一齊啊…呀宜…」佢攬住我，攬到好實，係我耳邊講。
我掃一掃佢個背，然後同佢講：「你唔好咁喇。」
「唔好走，呀宜你唔好走。」佢講咗呢句說話。
我送咗佢返房，佢roommate唔係到，得我同佢係房。
「你訓覺喇，我返房先啦。」我扶咗佢上床就轉身走。
「你留係到啦…我唔想你走呀…」佢拉住我隻手，隻眼半開合咁，我諗佢真係好醉。
「你乖啦，訓啦好無，你醉啦。」我用平時佢對我既語氣講。
佢捉實我隻手無放。
我內心掙扎咗一陣，之後做咗個最錯既決定—我留咗係到。
我坐係佢隔離，望住佢個樣，不禁嘆咗一口氣。
佢捉住我既手都無放過，我知佢應該唔係完全訓著。
我都唔敢亂郁個身，我地維持咗同一個姿勢好耐。
直到有刻我好攰，我嘗試訓落少少，cam man佢醒咗，之後望實我。
佢望咗幾秒就無就錫咗落黎，我下意識地配合咗佢。
雖然我無飲酒，但係環境既催化下，我既慾望好強烈。
佢既唇好軟，佢每一下錫落黎都係好溫柔，呢種溫暖係平時喺其他男人身上搵唔到既。
或者因為佢對我真係有愛係到。
我地好自然咁去到最後個步，佢好投入，我都係，因為我個刻咩都無諗，只係比個環境所牽引住。
完事之後，佢清醒咗好多，佢問我：「不如一齊囉。」然後佢好用力咁攬住我。
我唔敢望佢，都唔敢答，我唯有扮訓著咗。
事實上係我根本無辦法同佢一齊，因為我就係一個可以隨便同陌生人上床既淫婦，俗啲講句我就係公廁。
我居然呃咗一個男人上床，一個好鍾意我既男人。
我個心好內疚，但係我唔知可以做啲咩補救。
自從個日之後，我覺得我再無面目對住cam man。
佢不停要求見面，我只能扮見唔到，除咗咁我唔知點應對。
直到佢黎我房搵我。
「其實你想點姐？」佢劈頭第一句就問。
「sorry…個晚不如算喇，當無事發生過好無。」呢句說話居然由一個女仔既口中講出黎。
「即係你同我扑完野你同我講你其實你唔鍾意我，然後要我當無事發生？」佢好嬲，一口氣咁爆咗呢句野出黎。
「…對唔住，係我錯。你點鬧我都得，係我對你唔住。」我咁樣講唔係想扮聖人攬哂所有罪名上身，而係我真係覺得我好對唔住佢，除咗道歉我無能為力。
「哈，原來你可以同個你唔鍾意既人搞，我算係啲咩。」佢冷笑咗一下。
「對唔住，真係好對唔住，我係仆街，你唔好鍾意我喇。」
佢之後就走咗，再無返過黎。
－－－－－
原來傷害人既感覺一啲都唔好受。
我唔覺得做衰人好有快感，我覺得好痛苦。
我個心都好似比一舊好重既大石壓住咁，成個人好沉，沉到就黎可以倒係地上。
內心既壓抑想湧出黎，但係又屈住係個心到，完全揮之不散。
我嘗試將自己既情緒推到最低，想用眼淚去發洩。
以前我好易喊好易笑，情緒既收放稱得上自如且係發自內心。
但唔知幾時開始，喊對我黎講唔係一件必然既事，我可以好唔開心但係喊唔出，個心只係戚住戚住痛。
笑反而比喊更加容易，因為笑只係一種表情，表情係可以偽裝既。
學Joey話，皮笑肉不笑，近呢年我都係咁樣過。
「你可唔可以整喊我？」我同joey講。
「痴線，你做咩事呀？」
「我好想喊，點樣喊得出？」
「聽歌啦，如果想喊。」
我一路聽住首好啱我呢刻心情既歌，我都完全喊唔出。
「事情的不完美 是超出受得起以外」
我好努力嘗試想cam man發展，我以為我地會一齊到，但事實上我做唔到。
「就算你吞下來 忍下來 有一些人卻 永遠不適合被深愛」
我唔知自己有咩吸引，可以令到一個男人比我拒絕完都咁死心不息，都依然咁堅持想同我一齊。
但係我真係唔值得，我承受唔起你既好。
「你又美麗 又偉大 又這麼慷慨」
「我被厚待亦相當意外」
我見到你對我愈黎愈好，好到我好驚。
「給你寵愛 這戀愛 結果倒下來」
因為我知道我根本咩都比唔到你。我唔習慣高高在上咁接受人地對我既愛。你對我好，我係無所適從。
「大概只是我不好愛」
我接受唔到一段唔對等既關係，特別係當對方愛自己多啲既時候。
「當你跟我 有一個 那麼不易愛」
我就係個咁奇怪既人，唔好再鍾意我。
「得你一人愈來愈可愛」
希望你搵到個適合你既女仔。
呢件事之後，我繼續回復返以前既生活，同唔同既男仔來往，但係無一個係我男朋友。
我偶然都會係hall撞到cam man，我地都唔會望大家，但係我知佢一定見到我。
後來我知佢同咗隔離hall既女仔一齊，個樣都幾靚女，不過身材好似就普通咗啲。
見到佢有新既另一半，我都放下心頭大石。
人係咁架，做仆街都要做得心安理得先過活到。
而家咁樣突然就覺得自己咩責任都無哂，明明件事係確確實實發生過。
對唔住啊，cam man。
呢句對唔住我係真心真意咁講，希望你會見到。