自從住咗hall先知，扑野原來可以咁簡單: 《一、打死不離襟兄弟》1.2
五人團練呢個組合經常出現，慢慢仲開始一齊食飯。
我唔知Jeffery知唔知，不過我就知Nic都一定係溝緊Tiffany。
因為我試過係canteen撞到佢地，仲要唔只一次。
睇黎Jeffery今次有對手，因為Nic係個種好文質彬彬、青靚白淨既類型，同高大陽光既Jeffery完全係兩個好唔同既style。
當然佢地兩個既本質都係一樣：鍾意食女既仆街。
我係男人都係咁樣講架啦。
「呀朗！！！」難得day off，竟然有人會黎我，原來係Tiffany。
「喂，做咩呀。」我睡眼惺忪咁扒左個頭出房門問佢。
「唔好意思呀，係咪嘈住你訓覺呀。本身想黎搵Jeffery睇下佢食唔食lunch既，但佢好似唔係到？」佢望咗兩眼入黎。
「係呀，佢一早就出咗去喇。」
「咁你起身未呀，你去唔去食野？」佢問。
「哦，好呀，去食囉。」之後我地去咗canteen到食，我食雙餸飯，佢食沙律。
屌，啲女人真係特別鍾意食沙律。
「你神早流流食啲凍冰冰既野夠飽架啦？」我問。
「夠呀，我減肥嘛。」佢對腰果眼又出咗黎。
「痴線，你邊到肥呀。」女人真係3歲到80歲都話要減肥，我呀婆有時都話怕肥唔食呢樣個樣，而家連呀婆都要減肥呀，屌。
「肥架，你睇唔到咋遮住咗。」佢用手摵自己個肚，但係根本無咩肉。
傾傾下先知，原來佢同我一樣住荃灣⋯⋯
「咁啱既！我住楊屋道個邊架，你呢？」佢好興奮咁問我。
「我都係呀，哈哈，又會咁橋。」
「下次星期日如果你返屋企，我地可以一齊返hall喎！」
「好呀，你下次返去話我知囉。」
呢次之後，Tiffany開始會同下我whatsapp傾下計，講下自己做緊咩呀、上緊咩堂之類。我當然無同Jeffery講，廢時佢以為我想同佢爭飯食啦。 －－－－－「今晚我返屋企食飯呀。」Tiffany同我講。
「我都係荃灣呀，約咗中同食飯。」
「咁不如今晚一齊返hall囉。」
「好呀。」
我地約咗11點係荃灣地鐵站等。
個日好熱，我諗有成33度，就算去到夜晚都係一啲風都無。
Tiffany著住件白色既緊身吊帶背心，下身係牛仔熱褲同涼鞋。
雖然佢對波目測都無C，但係襯返佢細細粒既身形都夠哂，我忍唔住望多兩眼。
屌我都係覺得咁樣太痴漢，希望佢留意唔到我𥄫佢。
「等咗好耐呀？Sorry呀，頭先媽咪係都話要比啲生果我拎返hall，所以遲咗啲。」我見佢手上面抽住個環保袋。
「唔緊要啦又唔係趕時間，我地行啦。洗唔洗我幫你拎D生果？」
「唔洗啦，都唔係好重姐。」「你係咪住咗hall好耐架啦？」佢突然問我。
「下？唔係好耐既，我上年先開始住既。」我答佢。
「都係半個老鬼啦。你地幾個都係？」我諗佢係指我同Jeffery佢地。
「係呀，不過Jeffery住得仲耐啲，佢第三年啦。」
「哦…咁呢，Jeffery係咪好多女架？」佢好小心翼翼咁問。
「下，我唔知喎。平時我地都唔講呢啲野既，我地講下打波打機架咋。」
如果有男人咁樣答你，你千祈唔好信，因為一定係呃鳩你既。男人之間唔講女講咩呀。
「係咩…佢把口咁花，我諗佢應該好多女。」佢若有所思咁講。
「咁你覺得佢點呀？」
「佢幾好呀，講野又好笑，不過真係好口花囉。」
「咁呀，再了解下先囉。」我講唔出佢係個好男仔、你試下佢啦之類既說話，好似推緊個少女落火坑咁，都係出少句聲好啲。
「咁你呢？你有無拍拖呀？」
「我呢啲毒撚，邊到有女呀。」唔係扮毒，不過我好少無啦啦去溝一條女，我無Jeffery咁餓。
「唔係呀，你都幾好呀，邊到毒喎。」呢個女仔真係識講野，從佢言談之間已經知佢係個好圓滑既人，起碼唔會得罪人先。
「哈哈，唔係啦，好就唔會無女啦。」之後返到hall，Jeffery係房打緊機。
「喂，下星期我約咗Tiffany去行山呀！」Jeffery講。
「哦係咩，幾時約架。」
「咪今日囉，佢仲話想行大東山，嘩諗起都覺得痴線，不過同佢行就算啦屌。」佢仍然係望住電腦講。
「Jeffery哥為咗溝女，刀山都照狗衝啦可。」我潤鳩佢。
「洗乜講，Tiffany我食撚硬架啦。」
我係到諗，如果Tiffany比Jeffery食咗會點呢。
雖然我唔係鍾意佢，但係唔知點解都幾唔想佢落係Jeffery同Nic呢類男仔手上。
不過啲女就係鍾意呢類男人，男人不壞女人不愛呀嘛，老土但真係事實黎。
－－－－－
我諗隔咗兩個星期幾三星期左右，我同Tiffany係呢段時間入面都會一齊返下hall咁，不過我地之間唔會提起佢同Jeffery或者Nic既事，佢無主動講我亦都無過問。有啲野扮唔知好啲，特別係呢啲關係上。
又有一晚我一出lift，見到有個女仔係我房門口出黎。我認得佢係住6樓，但係我唔知佢叫咩名。
「喂，啱先條女邊個黎架。」我一入房就問Jeffery。
「佢住6樓架，之前食煙識既。」佢漫不經意咁講。
「死仔，又溝新女呀？Tiffany呢？」我用拳頭中佢。
「拿，我純粹係explore下我啲圈子姐，又唔好講到溝咁嚴重。」佢攤開雙手聳聳膊頭，好似事不關己咁。
「收皮啦，講到咁有保留，溝掂Tiffany未呀你。」我問佢。
「唔好提啦，好難搞呀。佢好似會比你同佢出下街咁，但我flirt佢又無乜反應。都唔知佢真係咁撚純定咩，屌。」佢一路講一路開佢地啲對話出黎。
「屌你啦，人地year1可能真係咁純呢，咪搞鳩啲妹妹仔啦你。」
「丫你條仆街真係好多野講喎，關你撚事呀下。」之後佢就笑住咁作勢打鳩我。經過個晚，我諗Tiffany應該真係無受Jeffery溝。
以Jeffery既性格，只要一有任何少少起色都一定會眉飛色舞講餐死比我聽。
但佢講到咁樣，都應該真係無乜進展。
加上有第二個女仔係我房出現，我諗Jeffery應該又有新目標。
隨住時間過去，我地五個既打機組合仍然不定時會出現，我地都有繼續教Tiffany打機。
不過我已經無再撞過Nic同Tiffany一齊係canteen食飯。唔知Nic係咪好似Jeffery咁，已經默默地收咗皮呢？
呢個答案我唔洗問好快已經知，因為Kenny呢排成日走黎我地房。
Kenny講：「屌，Nic趕鳩我走呀，話條女上黎喎。」
我可以200%肯定，呢個女仔一定唔會係Tiffany。
因為Kenny講既時候，Tiffany都係我地房。
佢聽完個樣好似若無其事咁，唔知佢心入面係點諗呢。