30歲的最後一個月， 我成為了一個職業賭徒。: 第四章

 
「烏鴉」是我潛意識的人物，是我學習自我催眠的時候創造出來的。
 
自從秀之離開以後，我對成功的渴望就像水裡要窒息的那樣 ，於是我拼命學習，與自我對話是其中一個學習了的重要事情。
 
因為我一定要對自我稱呼自己，所以一定要找一個秘密的名字。要是那是一個 任何人也會叫喚我的名字，應該會無效。所以「烏鴉」是我一直自言自語，一個內心的想法。
 
 
但是，「烏鴉」也是我在黑帽子偵探暗網的網名。
 




 
出發去澳門前一個月的某一天，我被約到了在一間麥記裡面見面。
 
 
「殊!!!!    烏鴉 !!!   .........   陳生 !  呢度 ! 」   一個跟我年紀差不多的男人，戴著眼鏡斯斯文文的，叫了我。
 
這是一間位於舊區的麥記，下午2時左右也頗為忙碌，因為坐滿了長者。 這裏雖然嘈吵但是隱密性卻變得高起來，而且讓我去僻靜的地方會引起我的戒心，他果然是專業的。
 
「你就係李生 ?   」 我坐在他前面，這一個名叫 “Joker626”  的人是那個暗網的站長。 我想不到他竟以「李生」 的身份約了我出來，也沒有想過他怎麼看都不過是一個普通的白領，卻是經營著那一個關於毒品、暗殺、軍火和勒索的暗網。
 




「呢位係何小姐。」 李生介紹了身邊的她，她也是一個看起來很普通的OL，相貌其實不錯不過有一點皮笑肉不笑的感覺。 我分別跟他們握了手。何小姐的手很冷而且也只是很沒有誠意的握了一握。
 
「你點知道我係陳生 ?」
 
「 我唔止知道你係陳生，我仲知道你好多嘢添............  你係一個攝影師，係咪?  你投資失敗咗，而家爭緊幾十萬............」李生說。
 
「點解你會知 ? 」
 
「Hack 入你電腦囉 !!! 你唔係覺得求其中一個洋蔥瀏覽器就走入暗網會安全下話? 」
 




我語塞起來，也開始感到害怕。
 
「你唔使驚，我地唔係黎勒索你。 起你底都係為咗我哋合作嘅例行安全驗證程序。 」   何小姐說。
 
「我哋見到你最近不停咁樣完成一啲細嘅任務，係為咗增加你嘅信譽，係咪?  我見你對最高報酬嘅任務有興趣，不過殺人運毒嗰啲就click返出去，但係你就考慮捕捉 "余釗 "個任務，係唔係 ?」李生說。
 
「 係，咁你想點 ?」
 
「其實有一單好大嘅買賣，我哋已經接咗手嚟做，我需要同你合作。」
 
「係乜嘢? 」
 
「綁架余釗個女。」 李生輕聲的說。然後何小姐把手提電腦展示了給我看，裡面有她的基本資料和相片。
 
「點解余釗個女會係叫殷凱茹 ?」




 
「你唔係偵探黎㗎咩 ?  咁簡單嘅心思點會諗唔到 ?」
 
被李生這麼的刺激了一下，一下子還更加想不到，不過後來我總算想通了。
 
 
「我哋已經 Hack 左個女仔部電腦觀察左好耐。  首先佢應該唔知道究竟佢老豆確實係做緊啲乜，只知道係做生意，所以佢嘅戒心應該唔會好高。 而余釗o係澳門嘅生活一向好低調，喺呢個政治咁特殊嘅地區，佢日常既生活係冇問題嘅，平時出入帶一兩個保鏢就夠。
 
佢地對個女既家教不嬲都好嚴，不過佢啱啱讀咗大學一年，對佢嘅監控開始鬆手左， 所以呢一個係一個好機會 。」
 
「咁你想我做啲乜 ?」
 
「我留意左佢平時睇嘅漫畫同埋網絡嘅行為，佢應該係有"兄長控"既喜好 ，佢喺度上網結識緊一個哥哥。我想你去應徵。」
 
「點解你揀我? 我又唔係特別靚仔。」




 
「 坦白講，其實我已經試過一次，不過同佢傾唔埋就冇再聯絡。上得嚟暗網既，唔係毒販就係道友，我好難搵得到正常少少嘅拍檔。我估計你攝影師嘅身份可以係對佢吸引既誘因。再講，我有絕對嘅把握你會同我哋合作。」
 
「點解呢 ?」
 
「 呢一個係我哋網站有史以來最大嘅委託，幕後嘅金主大到想像唔到，我已經著手搞咗好耐。你其實乜都唔使做， 你只要呃到個女仔去指定嘅地方，我就會比五十萬你! 」
 
接下來我什麼也聽不到，我只是在沉思著。
 
「我知道你已經欠債累累，你根本冇其他方法可以翻到身! 喺你電腦嘅相簿，我留意到呢幾個月已無再同女朋友合照，我估你哋分咗手，係咪 ? 」
 
我緊握著拳頭，我真的很想打他一拳。
 
「我仲知道你周圍碌卡借錢，又係我哋個網度訂咗一粒咁暗殺用嘅毒藥。如果我冇估錯，你打算賭一鋪，一係贏一係自殺，係唔係 ?」
 




「你哋知唔知你哋做緊乜嘢㗎，你哋講緊綁架呀 !! 綁架一個佢都唔知自己做錯乜嘢，又唔知佢老豆做過啲乜， 一個無辜嘅女仔呀 !! 」
 
李先生望了一望何小姐，何小姐冷冷的說:
 
「咁樣啦陳生，你嘅心情我明白嘅 ! 你從來都冇諗過捲入呢一啲事情，其實任何人都係一樣，亦都包括我在內。不過你要諗清楚佢老豆係邊一個，佢哋涉及嘅政治同埋權力鬥爭係同我哋完全唔同層次嘅世界，就算我哋唔做， 其實佢哋嘅結果都可能係一模一樣。
 
你諗下出咁大筆錢要捉一個女仔，邊有可能捉唔到?  我哋嘅工作只係將呢一件事做得好好睇睇，唔好令到個社會有不必要嘅輿論或者震盪。」
 
「 咁捉到個女仔，個女仔之後會點? 」
 
「我哋都唔知，亦都唔應該過問。 我哋淨係負責交畀個客嘅接頭人。 我估果個女仔未必會死嘅， 可能要嚟要脅一下余釗等佢妥協一啲嘢咁啫，政治嘅嘢我哋邊顧到咁多丫?  其實你係咪都諗住死，點解唔把握呢一個千載難逢嘅機會?」李生說。
 
 「 如果個女仔拒絕咗我，咁又點 ?」
 
「 咁樣既話都唔會要你白做，你可以去一間cafe到試下混熟佢哋嘅職員，我查到佢既手下開咗一間cafe，你可以試下喺嗰邊攞余釗嘅料，咁樣你應該最少會攞到廿萬，呢一個情報就當係我哋嘅見面禮，我哋對你表達嘅善意。」




 
 「好可惜我飲親咖啡都會頭痛......... 」
 
「頭痛咪頭痛囉 !! 你唔係已經將生命豁咗出去㗎喇咩 ?」何小姐說。 然後李生補充道:  「 我建議你今日開始，一日飲一杯，之後飲多啲水，到時你嘅身體就會適應㗎喇。記得之前搜習多啲關於咖啡嘅技術，到時好好地同佢哋吹水啦 ! 」
 
 
「我哋唔使你即刻答覆住，畀你考慮幾日先甚至到賭埋果一鋪先又點話?  你越絕望就越需要同我哋合作，我哋亦都唔會臨時壓你嘅人工。而且亦都冇辦法擔保你一定可以成功約到個女仔。不過呢個一定係最和平捉咗佢既方法，我哋唔介意等多一陣睇埋個結果先。我哋之後會長期出現喺賭場，我哋一定會再見。我哋而家send啲資料畀你先 ，你好好考慮一下啦。」何小姐說。
 
「 記得唔好做任何嘅蠢事，呢件事嘅複雜程度唔係咁簡單, 警察就算想理都未必理到， 如果喺你嗰邊有野爆咗出去， 你應該會想像得到個後果。觀察咗你好耐，你應該係一個明事理嘅聰明人，我哋就等你嘅答覆。」李先生說。