30歲的最後一個月， 我成為了一個職業賭徒。: 第二章

Cafe的老闆叫阿Sam， 他沖了兩杯愛爾蘭咖啡給我們。

威士忌加咖啡加雪糕的那一種....

我和Jacob 輪流洗手後坐下了。

「咁樣啦, 等我解釋清楚成件事啦。 其實啲藥就唔係我嘅 ，係我嘅客嘅。」 Jacob說。

「你係做呢啲買賣嘅?」





「梗係唔係啦...........我係做疊馬仔嘅, 你應該係香港人係咪? 你知唔知咩係疊碼仔? 」

「即係放債比啲賭仔，然後夾住佢同佢落注?」

「你講嗰啲係純粹放債啫...........簡單嚟講其實疊碼仔即係賭場嘅中介人。 因為啲富豪閒閒地賭幾十到百萬都冇咩所謂，但係佢哋唔會方便自己帶錢嚟。我嘅工作就係問賭場攞 優惠吸引佢哋， 而我嘅客就用我嘅泥碼去玩，我之後收番佢錢咁囉。 咁我唱嘅泥碼係有一定嘅折讓，咁我從中咪賺到啲佣囉。」

「咁所以你就要幫你嘅客keep嗰啲藥? 」

「冇計啦，我都唔想掂呢啲嘢， 不過呢個係我個大客, 佢上網買左寄過嚟要我幫佢收，然後等佢過兩日嚟玩。頭先阿sam哥就係見到好似有個便衣嘅警司企喺門口望入嚟，呢排我哋個老細同其他老細好似又有啲衝突，所以我咪咁淆底囉。 」





 
言談間我大致了解Jacob的故事。  他的家經營傳統的中藥材店，Jacob 不想繼承然後去了澳洲留學讀藥劑，將來等父親退休後改為經營藥房。 但由於澳門的藥劑師牌照太氾濫，也想阻止太多大陸過來的藥劑師，所以藥物事務廳剛好在他畢業後加強了藥劑師牌照的管制和考試認證。
 
Jacob的學歷未能直接承認， 考了兩年還未合格，而他留學時認識了很多大學同學都是大陸的富二代，所以只好暫時做疊碼仔，直至考到牌為止。

「 我啲同學，真係好離地㗎..........咁佢去咗澳洲讀書啦, 你知唔知佢老豆點畀零用錢 ? 」

「 電匯過去囉 ...」

「 唔係呀, 係買咗成條街嘅便利店同埋油站畀佢，佢自己鍾意就去盈利到攞。」





「唔係呀嘛.............」 我想起電影版頭文字d的阿木。


「 仲有一個, 佢老豆係官嚟嘅，有四個老婆咁啦。咁有一日佢阿媽生日啦， 而佢老豆就係咁樣返一返屋企，擺低咗一個公事包嘅美金，然後一粒聲都冇就走咗啦。嗰度大概港紙二千萬左右到啦。」

這是一個我意想不到的另一個世界，當我為了些許錢財為生命冒險的時候，另一邊廂錢財卻如塵埃一樣。


「咁樣啦，阿楓哥， 你幫咗我一次我唔會要你白做嘅。我畀一個好重要嘅情報畀你當報答啦。」

「 點呢?」

「 聽日之前，一定要買港股「特搜科技」。 」







我離開了他們了後，我在酒店做了research。特搜科技的股價是$1.2 ，四年來 股價都是一兩毫子的窄幅上落。   我應該信 Jacob 嗎?


我是極度抗拒聽從消息買股票的， 那樣聽起來我和師奶有什麼分別?  在我的認知裏， 這是一個接火棒的遊戲。 行內人真正知道資金的動向， 他們作了的相應的買賣，然後消息流動到他們身邊的親朋， 他們是1號火棒，親朋再傳給親朋，成為了2號火棒。最後全城也知道，傳媒也有報道，那樣變成為了3號火棒。最後食物鏈的高層就可以出貨， 然後由高號數的火棒者埋單，中間的很難說，要視乎他究竟有多接近 核心.........


但命運就是這麼諷刺，我身邊的師奶婆仔聽從流言亂來， 有時卻搵了大錢。 我細心研究圖表分析，卻往往步入了走勢陷阱， 這其實是我負債累累的原因。



Jacob 號稱自己接受了富二代的情報，十拿九穩。但我連「特搜科技」 聽也沒有聽過，這是一場賭博吧 !!!  但我真的應該參與嗎?