［童叟無欺，真正短篇］香港都市傳說：判若「兩」人（實體書已登陸各大店鋪，希望大家多多支持）: 判若「兩」人（二）：（一）梁善儀

「呢個Porject係邊個負責㗎？」一名身穿黑色正裝長裙，臉上戴有一副黑色粗框眼鏡，約四十出頭的女性，正在辦公室內，拿著一份文件憤怒地大喊。
 
她的話音剛落，辦公室內所有職員都停下了手上的工作，用擔心的表情看著這名女性。
 
但縱使所有人都看著她，卻沒有任何人作出回應，只因他們根本不知道她說的是甚麼Project。
 
「我問多次，呢個Lydia公司嘅Project，係邊個做嘅？」那四十出頭的女性加重了語氣，等待著答案。
 
只見眾人聽見公司名後，全都抒了一口氣，露出了安心的表情，然後開始四處張望，嘗試找出負責這個Project的「元兇」。
 




然而整個辦公室內，各人都在左顧右盼，沒有一人顯露出任何異樣。
就在那女人等待得不耐煩，正想發作之際，一名女職員戰戰兢兢地站了起來。
 
「May姐，呢……呢個Project應該係阿儀負責。」
 
「邊個阿儀呀？係咪新嚟㗎？點解佢唔自己企出嚟答我？」知道了元兇是誰後，May姐顯得更加憤怒。
 
「阿……阿儀佢喺度做咗幾年㗎啦，佢今朝……出咗去幫個客影相，所以依家唔喺度。」
 
「做咗幾年？做咗幾年我都無印象，唔怪得個Project會錯成咁啦！Irene，你即刻幫我打電話叫佢返嚟，叫佢唔駛幫個客影啦！阿昌，你去接手阿儀單Job，叫佢交返晒啲資料畀你。你有經驗，你識同個客交待㗎啦。其他同事繼續做嘢！」May交待好後，便怒氣沖沖回到經理房，然後致電Lydia公司的負責人，安撫客戶的情緒。




 
約半小時後，阿儀總算回到公司，她連公事包也還沒有放下，便一個箭步衝進May姐的房內。
 
「May姐，我……」阿儀把門打開後，才發現May姐正在跟客戶進行視像通話，她知道自己又闖禍了，正想離開經理房，卻被May姐叫停了。
 
「阿儀，你入嚟啦，依家我同Katie傾緊嘢，你都過嚟聽埋啦。」May姐的語氣友善得令人害怕，只因視像通話的另一邊，便是Lydia的負責人Katie。
 
別無選擇下，阿儀只好跟May姐一起跟Katie進行了一次視像會議，在會議的過程中，Katie提出了多項問題，要不是May姐經驗老練，恐怕兩間公司之後都不會再有合作了。
 
在經歷了差不多一小時的對話後，視像通話才正式完結。




完結的同時，May姐的神情馬上變得極為難看，就好比前一刻還是天朗氣清，下一刻便已經烏雲密佈，下起暴風雨來。
 
阿儀看到May姐的轉變，識趣的從她身邊離開，安坐在May姐對面。
只見May姐拿出了一疊文件和一本記事簿，上面各處不是紅色的大交叉，就是紅色的大問號。
 
「梁善儀，2011年入職，喺公司做咗六年，從來都無升過職，每年Appraisal都係表現一般，咁多年從未跟過任何大Project，除咗今年……」May姐拿起了其中一份文件，毫無感情的讀出阿儀在這公司裡的成績表，然後便把那份文件重重的擲到阿儀面前。
 
「今年公司可憐你，見你做咗咁耐，就畀你試下跟啲大客，點知你一嚟就爭啲同我搞死個客！好在我發現得早啫，唔係嘅話你賣身都唔掂呀！唔怪得你咁多年都升唔到職啦，少少嘢都做到噉！廢柴！」
 
阿儀被May姐不斷數落，雖然內心非常不滿，眼眶亦不爭氣的漸漸變紅，但在職場多年的她，知道此刻哭泣和生氣都沒有用，只會令自己更被人瞧不起。
 
她深深呼吸了一口氣，壓下了內心所有的負面情緒，總算可以說出話來。
「May姐，唔係噉㗎，之前係個客Request要噉做，我都係跟佢指示，點知佢第二日又轉，公司規距明明就……」
 
阿儀鼓起勇氣開口後，話還沒有說完便被May姐打斷。




「你仲駁嘴？你跟個客之前有無問過同事之前點跟呀？規距係死人係生㗎，我哋年年都係噉幫個客轉㗎啦！你唔識就問，唔好懶醒啦唔該！頭先視像會議嗰個Katie，都係啱啱接手個Project咋，你睇下人哋，講得出之前係點點點做，仲有晒Document，好心你學下人啦！你唔要面咋，我同公司都要㗎！」
 
之後的數十分鐘，May姐不停的數落阿儀，要不是阿儀還算堅強，早已淚灑當場了。
 
「好啦，Lydia之後我會親自接手，其餘啲大客，阿昌今個星期會慢慢接手，你準備好晒啲文件，同佢清楚講返個客嘅情況就得㗎啦。之後我會同公司傾下，畀返其他客你跟，就係咁，你可以出返去。」
 
「吓？但係May姐，啲Project我跟咗好耐先……」阿儀在公司工作多年，才能得這麼難得的機會，她當然不想就此放棄。
 
「唔使再講啦！你喺度做咗咁多年，係掂嘅一早上咗位啦。你影相又唔得，搵親啲Model無個紅嘅，仲有呀，你做咗咁耐，知唔知啲客對你最多嘅Comment係咩呀？『不過不失』呀，不過不失啫係唔掂啦。人呢，就要有自知之明，唔掂就係唔掂，咁多年都無人識梁善儀係咩人，你就知咩事啦。公司有畀機會你㗎，不過，大家有眼睇啦。乖乖地出返去，做返個平凡人，安份守已，公司唔會咁無人情味炒你嘅。不過！唔好再喺我面前提要跟返啲大客啦！出去啦！」
 
May姐的說話把阿儀的信心徹底擊沉，她拖著沉重的心情，回到自己的座位。
其他同事都隱約猜到發生了甚麼事，但沒有一人上前安慰她，只因阿儀就是這樣的一個存在，有沒有她，對其他人來說影響不大，從沒有人關心她。
 
她就跟路邊的螻蟻一樣，即使無意間踐踏了她，其他人也不會注意到。
阿儀真的崩潰了。