［童叟無欺，真正短篇］香港都市傳說：判若「兩」人（實體書已登陸各大店鋪，希望大家多多支持）: （六）自責

他來到客廳裡，跟父母傾談著。
 
同樣的問題、同樣的「牢騷」，阿信只感到無比的溫暖，他很後悔，為甚麼自己以往要這樣對待自己的父母，為甚麼希望勉強成為一個不是自己的自己。
 
在傾談的過程中，阿信發現父母的頭髮變得比以前蒼白、比以前稀少。
更發現兩人的臉上，不知何時出現了更多的皺紋。
愈發蒼老的臉上，更顯得有點倦意。
 
留意到父母變化的阿信，心頭不禁一陣激動，眼淚差點忍不住奪目而出。
但他實在不想讓父母擔心，強行抑壓著自己的心情，不許自己在他們面前流淚。




 
「阿仔，你無嘢呀嘛？個樣咁攰嘅？」母親問。
 
「我……我無嘢呀，呢排做嘢忙啫……」阿信看著母親那張憂心的臉，好不容易抑壓著的心情，又再波動起來。
 
「係咪好辛苦呀？唔好咁夜瞓啦，一個人住要自己照顧自己呀。平時有無自己煮飯，有無食生果呀？得閒多啲返嚟屋企食飯，我買定餸煲啖湯畀你飲啦。」以往母親的牢騷，此刻阿信聽在耳內，只感到無比的溫暖。
 
「好啦好啦，阿媽你唔好煩阿信啦，等佢食埋飯再講啦。」父親其實也非常關心阿信，但比起說話，父親總認為行動會來得較為實際，所以當初決定搬走時，父親是支持我的那方。
 
這一晚，阿信跟他們吃了一頓飯後，久違的在家裡住了下來。




待兩人睡覺後，阿信在房裡回想著以往不同的畫面，抑壓著的心情終於爆發，眼淚如洪水般瘋湧而出。
 
正當阿信沉浸在這悲傷的氣氛中，他突然發現，一道黑影站在床邊。
嚇了一跳的他，馬上從床上起來，原來那黑影正是「另一個自己」。
 
「點……點解你會出現喺度？」阿信看著眼前的「自己」，心裡充滿不安。
 
「點解出現喺度？呢個係你嘅願望，我只係嚟幫你實現呢個願望啫。」
 
「願望？唔好講笑啦，我從來無諗過要另一個人取代自己！」




 
「哈哈哈哈，你梗係無諗過啦。但係你應該有諗過，想變得有人關心你，想變得有人重視自己，係咪？」
 
阿信呆呆的看著「自己」，無法回答。
 
「任何嘢都要有代價，既然你想改變，你就要付出，唔通你真係認為，無努力過嘅你，咁簡單就可以變得受歡迎咩？」
 
「我……我有付出，我有努力過！咁多年嚟我都不斷努力去做得更好，只係始終無人認同我……」
 
「你有努力過？你望下呢度啲畫，由你細細個畫到鬼五馬六，去到得到獎項，呢段時間，你係有進步，係有付出過。但係你望下你得獎之後啲畫，有進步過咩？」
 
阿信順著「自己」指著的方向望去，真的發現自從拿了第一個獎項後，他的畫功便一直停留在那個時候。
 
「我……我……」面對「自己」的提問，阿信不知如何回答。
 




「喺第一次得獎嗰陣，曾經有好多人關注過你、稱讚過你。只係你自己沉浸喺呢份優感入面，無再進步過！畫畫係噉、返學係噉、返工都一樣係噉。每次去到有啲成果，你就以為自己好叻好威，唔再去努力。然後，停止進步嘅你，就開始埋怨無人重視你，轉去做其他嘢。你可能有努力過，有付出過，但係，你夠膽講你有堅持過咩？」
 
面對「自己」的質問，阿信一句也回不了嘴，只因「自己」所說的，全部都是事實。
 
「無嘢講嗱？不過你放心，過埋聽日，我會好好去追求自己想要嘅嘢，我會代替你，做返晒你過往做唔到嘅嘢。我亦都唔會好似你噉，掉低老豆老母唔理，你放心，我會代替你好好生活，你就安心咁離開呢個世界啦！哈哈哈哈！」
 
阿信聽到後大驚，激動得一下子撲向前方，希望抓著「自己」。
可惜抓不到「自己」之餘，更一下子撲倒在地上，整個人暈死過去。