[悲情甜故] 孤雛淚 (完): 第三章

一個月後, 呢個星期, 麗芳同佢啲同事一齊去左外遊, 我響公司做緊野之際, 福利部主任正走埋黎同我講, 「志宏, 你 handle 緊果單兩姊弟嘅 case, 個家姐今日已經滿左十八歲, 按規定, 佢已經到左脫離政府監管嘅年齡, 所以你得閒就要將佢個檔案做埋最後嘅處理嘞!」

我望住屏幕上美惠嘅照片同檔案, 心中又再想起佢兩姊弟嘅身世, 資料整理過後, 我攞埋公事包, 跟住準備一陣又要再去美惠嘅屋企度一趟。

離開福利處, 已經到左傍晚時份, 正向住美惠屋企行緊途中之際, 我經過左一間精品店, 一陣悅耳清脆嘅音樂聲正響精品店入面傳出, 突然, 我諗起今日係美惠嘅生日, 我行入左精品店內, 跟住我揀左一個比較精緻嘅音樂盒, 比左錢後, 我就帶住呢份禮物繼續向住美惠屋企度進發。

到左佢地屋企, 我按住門鈴, 又係美惠開門比我, 一切又係如常咁我要填寫佢地呢個月嘅資料報告, 但今次有啲特別, 我同美惠講, 「美蕙, 由今日開始妳已經到左脫離政府監管嘅年齡, 雖然係咁, 但物資發放援助就唔會話立即就停止嘅, 通常都會有一段時間嘅緩衝期, 就視乎唔同嘅情況而去處理嘅!」

正事做完哂, 跟住我就響公事包入面攞左頭先買嘅音樂盒出黎, 「呀, 美惠, 今日就係妳十八歲嘅生日, 張叔叔頭先就買左份小小禮物黎送比妳, 美惠, 祝妳生日快樂!」 美惠見到我個音樂盒, 面上居然好似呆左一呆咁, 跟住就開始流露住一個好怪嘅表情出黎。



突然, 美惠雙眼開始通紅, 眼角亦開始流住淚水出黎, 美惠嚥住喉咁同我講, 「張先生…呢盒禮物….你真係…送比我嘅?」 我以為佢係太開心得滯, 跟住我就笑住咁同佢講, 「梗係啦, 今日係妳嘅生日黎嗎, 咁呢份禮物, 當然就梗係送比妳架啦!」 

美惠伸手接過我個音樂盒之後, 見佢係咁低頭呆住左咁, 突然, 美惠就好似崩潰左一樣咁喊住出黎, 我唔知發生左咩事, 我望吓子健, 子健又望吓我咁, 呢一刻, 我地真係唔知應該點算至好。

美惠喊左一陣, 跟住終於都開口同我講, 「張先生, 對唔住, 我…我只係…諗番起, 細個果陣, 每馮到左我生日呢個時候, 嗚…, 爸爸…媽媽…佢地…都總會買份生日禮物黎送比我, 但…響兩年之前…開始, 嗚…, 我知…我永遠都…唔會…再收到…佢地送比我嘅生日禮物架嘞, 嗚 ~」 

哎呀, 呢次死火嘞, 估唔到我咁樣做, 居然會令到美惠挑起左佢嘅思親情緒, 一陣陣心酸嘅感覺, 即時就響我個心度湧現住出黎, 攪到連我都眼濕濕埋一份, 正當我都唔知點好之際, 美惠個情緒似乎亦開始有啲平伏番落黎咁。

美惠抬起頭, 正帶淚微笑住咁同我再講, 「張先生, 多謝你!」 呼, 終於都叫做鬆左一口氣, 我諗左一陣, 「呀, 美惠, 不如咁啦, 今日係妳嘅生日, 張叔叔就同妳地兩個出去食番餐飯黎慶祝一吓, 唔知咁好唔好呢?」 



子健聽到之後, 即時就好興奮咁大叫住出黎, 「好野, 張叔叔同我地一齊出去食飯!」 美惠呆望住我, 跟住諗左一陣就同我講, 「咁…不如…等我入去換過件衫之後, 我地…先至一齊出去啦…..」


痛失雙親, 但仍要堅強地活著下去