迴: 一.無明

「你唔係放假咩，你番黎做咩？」基哥望住我講。

「咩呀？唔洗做呀？星期一嘛」我話。

「星期日呀今日，傻左呀你。」基哥碌大眼望住我。

「晨早流流仲迷緊，乜料呀？」我心諗。望一望電話，「依喂！！！」真係7月8號星期日。諗諗下又係，頭先部115全部都係賓賓。

但係我明明記得係星期一。但係電話又唔會有錯架，同埋……琴日跑馬我輸左三千銀架！如果今日即係琴日，唔係唔係，跑馬係星期日，琴日跑完，今日就係星期一，一定無錯。





好亂…到底星期幾呀……「我出去食枝煙先。」我同基哥講。我行去街尾間恆生……無開門。再行返去街頭馬會……開左門既喂！「今日星期日跑馬咩？」我問門口個保安呀叔。「係呀星期日嘛，唔係點會開門。」呀叔用好奇怪既眼光望住我。

真係星期日喎……「唔通發夢？」心諗發達啦，即刻打開銀包睇，唔係喎，係無左三千蚊喎。

「真係輸左……」到底今日係琴日定今日呀……咪住！

「喂基哥我走先。」返鋪頭交代聲，即刻跑去禁錢，返屋企，開電視，等。

「最後二百米架啦，透出既馬係佳運來……最後一百米，李易達馬房起孖架啦，佳運來贏呀，跑第二名係勝利專家……」。





頭三場賽果真係同琴日一樣……咁第4場7，2，12……第五場3，10，12……第六場6，4，3 ……

「覆左磅架啦，派彩作實，第四場跑第一名既係4號，獨贏派十九蚊……三T每十蚊派五十四萬二千一百九十五元正」。

「中左……」我呆左……五千幾萬呀……我買左一千蚊三T，贏左五千幾萬呀……發達啦呢次！

聽日打1882登記，之後去跑馬地馬會總部攞錢，之後買哂匯豐，三萬銀一手我都買到千幾手，股息都百幾萬一年……呢條數我已經計左好多年好多次，一定無錯。等我聽朝扮哂野繼續番工，到食飯先打1882，等你班仆街葡萄下先。

「每晚訓覺都會覺十幾個鬧鐘的我，每格十分鐘一個……」鬧鐘響丫嘛，起身丫嘛，返工丫嘛。出門口落樓，梗係遞手啦，仲同你等115呀。「紅隧唔塞少可喎師傅。」我話。「差唔多啦」師機大佬求其應左我一聲。「喂師傅都係係前面路口落得啦。」買籠燒賣俾基哥做早餐先，佢平時對我咁好。
「基哥！整籠燒賣先啦！」我一入門口笑騎騎咁講。





「你唔係放假咩，你番黎做咩？」基哥望住我講。

「乜撚野呀……」我面色一沉……