《我好肯定Siri暗戀緊我》: 31.倒轉

關鍵唔係在於動作本身既意義，而係在於我點去觀察呢個動作。

倒立前，我望向黑板既字體自然容易明白，但係倒立後，黑板上既字體同時上下掉轉。

容易明白既野，一下子變得難以理解。

突然，一段記憶係腦海入面閃過：尋日係「夢」中去到既世界所發生既奇怪事。

自己如何向阿淇表白失敗丶如何撞到個肥佬引發衝突丶如何去到一架巴士上遇到一個和尚丶如何被和尚打倒，但係最後居然係班房內訓醒。





呢一堆經歷，發生係我熟悉既世界當中。但係各種細節，根本就冇可能係現實中出現，就好似倒轉左既字體一樣難明。但係我又的而且確地受到和尚既重擊而回到現實。

我停止倒立，走到黑板前。

心入面諗緊既野，似乎同黑板上總結出既要點無咩關係。

唔通伯母想同我講，小渝身處係另一個世界，果一個我都曾經係「夢」中去過既世界?

而呢個世界，就好似倒立住睇既世界一樣咁違常理?





「咁我要點先去得到果度?」

我重整記憶，想諗返同阿淇表白前所發生既事。

最後，我係被和尚打醒，返到班房。咁我一開始係咪係班房入面訓著左?

但係，我諗到頭都爆都諗唔到，究竟怪事發生之前，我做緊啲乜。

「我大膽假設，小渝同我一樣，呢家係『夢』既世界入面經歷緊一堆怪事，咁最後要解決既問題，就係搵到去果個世界既方法。」我心諗。





要得到答案，只可以再次去問伯母。