《我好肯定Siri暗戀緊我》: 25.消失

「喂Siri?」

「喂Siri!」

就係咁，平時一嗌就出黎既Siri，今日居然叫極都唔出黎。

我反覆檢查過手機既其他功能，發現都係正常冇問題。

唯獨係Siri，什至係設定入面消失左。





「唔洗再嗌啦，好嘈。」家姐開門入黎。

「家姐？」我冇諗過家姐居然仲係醫院等我醒：「點解你今日咁早返到屋企?」

係我好細個果陣，呀爸呀媽已經離左婚，之後我就同呀爸丶家姐一齊住。呀爸好少可會提起呀媽既野，每次我同家姐主動問起時，佢都會發好大脾氣，所以漸漸我地都冇再問過。由我升上中學開始，呀爸就長期係美國負責啲科學研究，得返我同家姐兩個一齊住。工作詳情呀爸好少講，而且就算佢解釋我地都唔會明係咩。不過，呀爸定時定侯都會存啲錢俾家姐，家姐再分配生活費俾我。

家姐比我大五年，讀緊大學。可能受到呀爸既遺傳，佢做人處事經常都表現得神情自若丶從容不迫。即使呀爸有俾生活費我地，但係家姐冇只係掛住讀書，而係有出去搵兼職做。家姐總係將自己既時間排得密密麻麻，所以我好出奇點解佢會咁岩返到黎屋企救我。

「今日我放自己假。」





回想起家姐放自己假，已經係......已經係唔知幾耐之前。佢呢家讀書工作狂今日居然會放假?

家姐望到我神情驚訝，莞爾一笑之後又繼續講:「本身存在係你手機入面既Siri，去左你心口到。」