《我好肯定Siri暗戀緊我》: 18.一齊

就係咁，我陪住小渝放學。

一路走，小渝就一路望黎望去，好驚真係會撞到個男仔。雖然我有嘗試過安慰佢，但似乎情況亦冇好轉。

「你唔明架啦！拒絕人唔係一件容易既事，要諗下點講先冇咁hurt到人！」

我真係唔明，好多事我都唔會太諗人地，可能係小渝太顧別人既感受啦。

而正當我地要踏出校門時，小渝突然停低左。





「救我......」

小渝拉住我衣袖，企係我身後。

眼前一個男仔衝過黎，睇怕就係小渝口中講果個人。

個男仔貌似係高中既人，卻又唔係著住我地學校既校服。估唔到小渝吸引力大到連隔離學校既男仔都鐘意佢。

「小渝......」見到我之後，個男仔慢慢咁行埋黎。





「喂你想點呀?」

「小渝，自從上次聯校活動之後，我就不斷留意你......」個男仔愈行愈近，我亦自然地保護住小渝，慢慢退後。生怕佢會做出啲咩變態行為。

「放飯出去食果陣，放學果陣，我都偷偷咁搵你，想望下你。」

呢個男仔係咪跟蹤狂黎？

身旁既小渝眼神開始變得厭惡，但依然等緊個男仔將所有心底話講出黎。





「但係，我呢一刻終於忍唔住啦！小渝，你可唔可以唔好再纏住阿眉呀！我真係好想同阿眉係埋一齊呀！」

「吓？」