《我好肯定Siri暗戀緊我》: 16.小渝

當我向後一望究竟係邊個接住我，一點白點岩岩好遮係我眼前，慢慢向外擴散到我完全睇唔到野。

「阿眉，你望住我做咩呀......?」

「原來我發緊夢?」

同我講野既係坐係我後面既汪小渝，班花。小渝長時期都戴住一副大既圓粗框眼鏡，從來冇除過。加上佢可愛既包包臉，楚楚可憐又似是弱不禁風既容貌令到好多男仔都暗戀佢。係由入中學既呢三年，佢都同我同班，而又咁岩得咁橋，佢都係坐我後面。小渝經常都會收到男仔俾佢既情書表白，一啲大膽啲既男仔，什至會當眾向小渝表白。

但係，小渝到呢家都只係一一拒絕佢地。點解? 因為佢鐘意果個係我。





「你自言自語啲咩呀?」

「我話，你靚所以我望你。」

「哼......」

講說話逗小渝已經係我倆間既日常。小渝既面頰每次都會幾秒內變到好紅，顯得更加可愛。

可惜，我唔鐘意佢。





我諗我都唔算有專登暗示進一步既關係。只係，對女仔口甜舌滑係我向來改唔到既習慣。

「唉......」或者我呢種習慣，令到阿淇拒絕我。

我長嘆一聲，將胸口既悶氣全都呼出黎。卻發現，岩岩被和尚打既位置有一陣劇痛。

「哇......」唔通我岩岩唔係發夢? 但係點解我會係課室入面?