［校園鬼故 X 陳生回歸 X 角色崩壞］無能子鋒與無能鬼: （七十九）希望
就在別西卜興在頭上之際，空間裡出現了一道微細的裂縫，一道微弱的光芒射到我的身上，然後便消失了。
別西卜並沒有注意到這一切，它正沉浸在勝利的香氣之中。
「子鋒！子鋒！」一把女聲響起。
「邊個......我好攰......」
「醒呀子鋒！」
「唔好煩我，所有嘢都結束啦。」
「別西卜仲喺度，你唔可以放任佢亂嚟。」
「......」
「聽唔聽到呀，唔可以畀佢亂嚟。」
「點解......」
「咩點解？」
「點解要係我？」
「吓？」
「點解我一定要面對？我......只係想開開心心咁返學，識下朋友，識下女仔......我只係想要普普通通咁生活......點解要係我......」
「子鋒，呢個係命......」
「唔好同我講咩命運！我......受夠啦，我真係好攰。唔好再煩我，我要休息。我唔想再理任何嘢......」
「唔可以！子鋒，你應承過天命叔唔可以放棄。」
「天命叔......佢已經死咗......我已經無堅持落去嘅理由。」
「係咪我未死你就即刻起身？」突然，一把大叔的聲音響起。
「你......」不可能，這聲音。
「起身呀細路！」
「天......天命叔？無可能，點會......」我的意識清醒了許多。
「咩無可能呀，我哋好辛苦先避開別西卜嚟搵你。」這次我總算認出另一把聲音的主人 － 小詠。
「點解......天命叔唔係死咗咩？我明明都畀佢吸收咗先啱㗎？我依家個狀態......」滿腦子的疑問湧現，然後我發現，自己現正處於靈魂散聚的狀態，一不小心便可能從此消散。
「死你個頭，明明叫咗你要無時無刻保持心態，唔好自亂陣腳，你睇你依家，搞到咁。」天命叔上來就毫不客氣地說。
「你估我想㗎，我以為你死咗，之後，阿奶佢......阿奶佢......」想起阿奶的情況，情緒又開始低落起來，然後，意識又開始變得模糊。
「冷靜啲子鋒，阿奶佢無事！」小詠的聲音把我的意識重新拉回來。
「你......你講咩話？」我難以置信地問，只因我手上那種被血液沾滿的感覺，到現在還是未能消退。
「我話阿奶無事，不過......係暫時性。」小詠補充。
「點可能，我明明將佢嘅心臟......刺......刺穿咗......」意識又......
「冷靜，你依家唔好諗太多，如果你意識消失，咁有救都變無救㗎啦！」小詠緊張地說。
「時間唔多，我簡單講，雖然我未死，但情況並唔樂觀，我大部份嘅靈魂都喺別西卜體內。」天命叔聲音凝重起來。
「咩話？你都被別西卜吸走咗？」我驚訝地說。
「依家終於明白，點解當日佢喺公園要放過你，因為我先係佢第665個目標，最後一個先係你。」
「我......係最後一個？咁佢依家咪......」
「放心，佢唔會成功。我頭先講咗，我只係大部份靈魂喺佢體內，我嘅肉身仲保持喺一魄嘅狀態。」
「點解你可以將三魂七魄的狀態變成一魄？」
「呢層係小詠嘅功勞，遲啲有機會再解釋。子鋒你要聽住，依家嘅別西卜並唔係完全嘅狀態，雖然佢暫時未發現，但係當佢要號召其它魔鬼嘅時候，應該就會發現有問題。所以，你要喺佢發現之前收拾佢。」
「我......我做唔到......」
「子鋒，你可以㗎。」小詠鼓勵我。
「我唔得呀，你哋無見到咋，頭先我同佢打嗰陣，我用盡辨法都奈佢唔何。更何況......」我本想說天命叔也贏不了它，我又怎可能做到。
「細路你冷靜啲，我話你做到，你就做到！」天命叔肯定地說。
「但係......」
「唔好但係啦，你話你後悔咩都做唔到，依家眼前就有一個機會，畀你去救返我同埋阿奶！只要你聽我講，畀啲信心，你一定可以。」
「我......真係得？」
「得！我贏唔到，係因為之前受嘅傷，再加上別西卜一早設計好對付我，所以我先會輸。但你唔同，你嘅力量已經恢復，而且比以前更加深厚。仲有，別西卜好快會發現佢收集嘅靈魂仲未齊，到時佢知道前功盡廢，一定會露出破綻。」
「但係......就算佢有破綻，我都未必可以贏到......」
「放心，別西卜察覺到有問題嘅時候，小詠會用盡一切方法由佢體內進行破壞，多多少少都會傷到佢。到時你就即刻出手，破壞佢個結界。」
「就算真係要做，我依家咁嘅狀態......」
「你放心，你嘅靈魂無受到損傷，你依家只係暫時暈咗啫。」
「吓？我明明感覺到自己嘅靈魂......點會......」
「你唔駛諗咁多啦，完晒件事我再同你講啦，炎冰同小詠趕緊嚟呢度幫手。記住，破壞結界之後，你要即刻將佢引去操場，之後你會知點做。好啦，交畀你啦！」
雖然在意識狀態中，不存在任何實體，但我確實感覺到，天命叔搭著我的肩膊，為我打氣。
我睜開雙眼，看到別西卜雙手向天，好像在召喚些甚麼似的。
「吾名為別西卜，將成為統率魔界之王，撒旦之名將由我所有！」只見別西卜高舉雙手，向天空發出咆哮後，像在等待著甚麼似的。
「點解？點解無出現『神罰』？無可能？」別西卜難以置信地哮叫著。
同一時間，在這個空間裡，出現了一道裂縫，我看到了炎冰和小詠準備闖進來。
好吧，既然事已至此，我就來作出最後的反抗吧！