［校園鬼故 X 陳生回歸 X 角色崩壞］無能子鋒與無能鬼: （三十六）曙光

「我……我唔講得！」我十分了解天命叔，他不會讓我解開封印的。
 
「你唔係唔講得，你係唔做得！」天命叔嚴厲的看著我，看來他真的已經猜到我想怎樣做。
 
「你……你知道咗？」
 
「除咗解開封印，放隻嘢出嚟之外，我諗唔到你仲有咩方法可以搞掂件事！」果然，天命叔已經知道了我的想法。
 
「做唔做得都好，我……都要去做！只有噉樣，先可以救返大家。」我搖了搖頭。
 




「唔好傻啦細路，你今次放返佢出嚟，我無辨法再封印佢㗎啦！」
 
「就算係噉，我都要去做！既然你已經知道咗，我都無咩好隱暪，佢已經同我講咗，佢嘅目的，只係要挑戰神，只要你哋唔對佢出手，佢就唔會對付你哋！所以，犧牲我一個，救返晒你哋，呢條數點計都無蝕！」我冷靜地說。
 
「你……你講咩話？你同佢見過面？封印失敗咗？」天命叔緊張地說，看來比起眼前的狀況，他還是更著緊我體內的那傢伙是否能復活。
 
「唔係封印失敗，不如話啱啱相反！」來到這個地步，我也不打算隱暪下去，我便把在夢裡跟那傢伙的說話告訴天命叔。
 
天命叔聽到後，眉頭緊皺地看著我，然後又是一輪搖頭嘆息。
 




「你真係信佢會幫你？」天命叔驚訝地看著我，表情上看出來，他在懷疑我是否瘋掉了。
 
「我信，澳門嗰陣佢都出現過，正如佢所講，我作為『容器』嘅價值係有嘅，佢唔會想我有事。同埋我都相信佢唔會傷害你哋，因為……坦白講，今次見到佢嘅時候，佢嘅力量……嗰種好似無盡嘅黑暗力量，根本唔係你哋可以反抗。所以，只要你哋唔去惹佢，佢就唔會浪費時間對付你哋。」
 
「乜你覺得，我哋之中會有人放過佢咩？」天命叔和阿詩堅定地看著我。
 
「我……我知你哋唔會放過佢！所以我到時會去一個你哋搵唔到嘅地方，噉你哋就唔會有事！你唔好再講啦，依家只有借助佢嘅力量，去解決呢件事！」我激動地說。
 
「你會唔會太過睇少你身邊嘅人？唔好話我，如果天賜知道咗，我諗你匿埋喺北極，佢都會嚟搵你！而我係佢老豆，無可能唔跟住佢！」
 




「我都會跟埋去！」阿詩亦忍不著說。
 
雖然我早已猜到他們的反應，心底裡當然為他們重視我而感到高興，但眼下卻是需要解決問題的方法，這樣下去根本只會沒完沒了。
 
「細路，你聽我講啦，你體內嗰隻嘢係絕對唔可以畀佢復活，佢同你做得交易，亦即係佢覺得你嘅軀體同力量，係值得佢去做某程度上嘅讓步。同魔鬼做交易，蝕底嘅一定係你！」
 
「唔係噉可以點啫？呢樣又唔得嗰樣又唔得！唔通又要我好似之前噉，坐喺度等死咩？」
 
「咁又未必係等死嘅。」一把熟悉的聲音在我上方傳來，我抬頭一看，是小詠！
 
「小……小詠？」看到她後，百般滋味立刻湧上心頭，不禁脫口而出喊了她的名字。
 
同一時間，卻見小詠皺了皺眉頭，天命叔亦有同樣的神情。
之後一人一鬼相視對望了一眼後，天命叔才開口說。
「小詠，個細路女點呀？」




 
天命叔把頭抬高後，阿詩才轉向上方，眼神流露出疑惑的神情。
 
「阿奶無事啦，啱啱神父幫佢驅走埋體內嘅邪氣，神父畀咗個十字架佢，佢返咗屋企休息啦。」小詠從半空中徐徐落下，阿詩的樣子才變回原樣。
 
「咪住，你講咩話？阿奶佢有咩事呀？呢段時間你又去咗邊？」我激動地問。
 
小詠看了看天命叔，天命叔思考了一會後，略為點了點頭，看著我說。
「細路，我知你有好多嘢想問，我亦都知道你嘅決心，我可以講返呢段時間發生嘅事畀你知。不過，首先你要應承我，唔好再去諗咩解開封印！」
 
「我咪講咗，解開封印係唯一嘅辨法去救返你哋囉，我唔會……」我的說話被天命叔打斷了。
 
「的確，之前嘅情況，我承認要解決呢件事，只有一半左右嘅成功率。不過，呢個係無小詠幫手嘅情況之下嘅成功率，依家小詠提早咗返嚟，要解決今次件事就唔係咩難事！」
 
「噉……即係？」我還沒有理解到天命叔的含意。




 
「即係話，小詠返咗嚟之後，今次呢件事就肯定可以解決！我哋依家要做嘅嘢，就係爭取時間，盡快救返炎冰！」天命叔肯定地說。
 
雖然天命叔如此肯定，但我直覺上還是感到有甚麼不對的地方。
我偷偷看了看小詠，只見她臉上也是一臉自信，或者，這只是我的錯覺罷了。
 
「如果……真係可以順利解決呢件事，我……我唔再諗解除封印嘅事！」
 
「噉就啱啦，依家等我講返清楚成件事嘅始末畀你知，之後，就係去救人並解決呢件事！細路，你放心，你都要幫手，我唔會再將你排除在外㗎啦！」
 
天命叔拍了拍我肩膊，我好像已經能看到事情被解決的未來。
好吧！我就相信天命叔，在不解除封印的情況下，解決這件事吧！