［校園鬼故 X 陳生回歸 X 角色崩壞］無能子鋒與無能鬼: （三十三）「惡」之交易

「天命叔，依家點算好，炎冰會唔會有事㗎？」
 
「冷靜啲，炎冰暫時唔會有事，我哋依家返去道堂先。新抱仔，麻煩你幫手扶一扶呢個細路。」
 
失去了意識的我，隱約聽到這兩句說話後，便又昏死過去。
 
「醒呀！我叫你醒呀！」一把熟悉的聲音傳到我的耳內，但一時間我竟無法想起這是誰的聲音。
 
我睜開雙眼，眼前一片漆黑。
 




「呢度係？」我內心疑惑著，抬頭看了看四周，除了黑暗還是黑暗。
 
而這種黑暗的感覺，不斷向外無限伸延著，感覺好像身處在連光也被吞噬的黑洞之中。
 
我還未弄清楚這是甚麼地方，那把熟悉的聲音再次響起。
 
「哼！醒呢咩？」那聲音分明在我離我不遠的面前傳來，但我卻看不到任何事物在我前方。
 
「邊個？你係邊個？你匿埋喺邊度？」我大喊著向前跑，但不論我跑得多快，跑了多遠，仍是看不到任何人或物的踪影。
 




「我哋已經見過幾次面，你仲未知我係邊個？」那聲音在我上方出現，我抬頭一看，只見一團人形的黑氣在半空飄浮著，然後慢慢的落在我面前。
 
「係……係你？！」我驚訝地道，只因這傢伙應該隨著我的靈力被封印後，沉睡在我的體內才對，為甚麼他仍能出現在我的面前。
 
「哼！張氏弟子張天命，果然有啲料到！我依家只能夠出現喺你意識入面，無辨法出去干涉你！」
 
「你……你到底想點？」
 
「我想點？我想幫你，亦都係幫我自己。今次嘅對手，憑你哋係對付唔到，叫你師傅解除你嘅封印，我會收拾佢。」
 




「解除封印？無可能，你諗都唔駛諗，我係唔會畀你復活㗎！」
 
「你太傻啦，就算你阻止到我今次嘅復活，噉下次呢？」
 
「吓？下……下次……」我想不到他會有此一問，頓時語塞起來。
 
「無錯，下次！我同你哋人類唔同，你哋只有短短幾十年壽命。而我嘅壽命係無盡嘅，今次復活唔到，最多就等下一次，總有一日，我會成功殺死神，取代佢嘅位置。但係，你如果唔解除封印，唔單止你，你嘅朋友，你嘅師傅都一樣會死。」
 
「無……無可能！我唔信，天命叔佢一定會解決呢件事！」
 
「天真！如果佢無封印我，如果佢無受傷，或者可以解決呢件事！但憑佢依家嘅力量，根本就係飛蛾撲火，自取滅亡！唔好話救人，佢依家連自保都有困難！」
 
「我……我唔信！」雖然我嘴上是這樣說，但是天命叔的傷勢的確是比想像中嚴重，而且這次的事件若是如此簡單，天命叔早已暗地裡解決掉整件事了。
 
「你信又好唔信又好，事實就係噉！解開我嘅封印，就係最好嘅解決辨法，如果唔係，嗰個看更之後，就會到嗰個用道術嘅女仔，不出兩星期，佢都會死埋。」




 
「你……你係話炎冰？」我想起昏倒前，炎冰那虛弱的模樣，不可能，她不可能會死！
 
「唔止佢，你身邊嘅人會一個一個噉因為你而死！你唔好以為你將你嘅力量交咗出去，你身邊嘅人就會無事。得到咗你嘅力量之後，下一步就會對付你師傅，有力量嘅人都會一個一個噉畀佢殺死！你都唔想變到噉㗎？放我出去，解除我嘅封印，你師傅可以拎返啲力量之外，我亦可以幫手解決呢件事！」
 
「唔可以，唔可以！一定有辨法……一定……」
 
「哼！有辨法你就唔會搞成噉啦！我話你知，唔放我出去只會死更多嘅人，放我出去，我可以應承你復活之後唔殺你啲朋友，我嘅目標由此至終都只有神！」
 
「你……真係可以解決呢件事，其他人都唔駛死？」我有點動搖。
 
「一定可以，我只要恢復力量，除咗大天使同神，無人可以阻止到我！」
 
「不……不過……」
 




就在我消化著這些說話時，漆黑的空間裡出現了一道裂縫，光芒慢慢滲入，開始照亮整個環境。
 
而在我面前的他，並沒有因為光芒而變得清晰起來，那是光芒也無法撼動的黑暗，眼球再次接觸到這黑暗時，我深深明白到，縱使他的言詞多麼吸引，他仍是「惡」的源頭。
 
「可惡，無時間啦！總之你記住，要解決今次嘅事，我嘅力量係必需嘅！解開封印，我會幫你，然後，去到命運之時，我應承你唔會對你朋友出手！呢個係作為『惡』之源頭嘅承諾，你可以放心！只要到時佢哋唔對我出手，我係唔會對付佢哋。」
 
我的身體慢慢受到光芒的召喚，慢慢被吸進裂縫內。
到底，這惡魔的交易，我應不應該接受呢？