［校園鬼故 X 陳生回歸 X 角色崩壞］無能子鋒與無能鬼: （二十一）調查

（二十一）調查
 
「你哋點搞㗎？噚晚隔離屋嘈咗成晚，我諗住打落嚟，點知無人聽，我落到嚟，又發現無人喺度。」黃師奶抱怨。
 
「係囉係囉，噚晚我返嚟嗰陣，保安處無晒人，我仲見到有啲細路入咗嚟係度摷啲信箱，好在我大聲鬧走咗佢哋，如果唔係我哋啲信咪無晒。」張師奶亦襯機抱怨。
 
「你哋冷靜啲先，我喺度住咗十幾年，咁多年都無見過阿德會咁無交帶嘅，係咪阿德有咩事行開咗呀？」黎婆婆關心地問。
 
「咁多位住客唔好意思，噚晚係德叔當更嘅，我哋一發現佢唔喺度已經即刻安排咗人手過嚟㗎啦，希望大家體諒。至於德叔，我哋暫時都未聯絡到佢，所以我暫時都未答到你哋發生咗咩事。總之大家放心，我應承你哋，噚晚無人嘅情況，係唔會再出現嘅。」一名身穿西裝，看來像是保安部負責人，嘗試安撫在場的住客。
 




然後，經過了一輪的糾纏後，眾人才願意亂去，那身穿西裝的人像拆解了一大難題似的，露出了放鬆的表情。
 
「唔好意思，我想問下噚晚發生咩事？」
 
那人聽到我的提問，好不容易放鬆下來的他，再次露出緊張的表情。
然後他上下打量了我一遍，才開口說話。
 
「請問，你都係呢度嘅住客？」他的語氣非常友善，或者，可以說是非常官腔。
 
「係！我想知道噚晚發生咗咩事，德叔究竟去咗邊？」




 
「其實頭先我都解釋過一次，我諗無嘢可以補充啦。」他笑著對我說，然後便想離開。
 
「唔係喎，你有無查過閉路電視，有無查過巡查更表呀？噉咪知道德叔最後離開呢度係幾時囉。」我急道。
 
「哈哈，小朋友，我哋公司有公司嘅規距，唔可以亂嚟㗎。何況，我哋點做嘢，我諗唔駛你教嘅。有咩事我哋會聯絡警方，我諗你都係乖乖地返去讀書啦。」他說話時那輕蔑的語氣，任何人聽到也一樣會生氣。
 
而最令我不滿的，是他那天淵之別的態度。
「原來係我當細路，好，你要玩嘢呀嘛！」
 




「頭先啲住客你就答，我問你就唔答，我都係呢度嘅住客嚟㗎，噉你啫係咩意思呀？」
 
「嗱，小朋友，我真係無時間再去理你，我要講嘅嘢已經講完，我哋公司有規距去做嘢，唔到你去理，你返去罷啦。」那人一臉不耐煩，明顯是以為我是好欺負的小朋友，而且更準備離開大廈。
 
「你即管走，我依家就打去你公司同埋報館，將頭先你講嘅錄音畀佢哋。你唔想理，總有人會想理嘅！」我拿出藏在褲袋裡的手機，裝作錄了音。
 
而那人看到我手上的手機，臉色一沉，剛剛那不肖一顧的嘴臉徹底消失無踪。
 
「其……其實要講嘅真係講晒啦，無嘢可以再講。同埋，你打去報館都唔會有人理你，唔好嘥時間啦。」
 
「哦，好呀，噉我打去報館，睇下有無人肯聽。」我開啟了手機，假裝撥出電話。
 
「等……等等，你……你等等先。」
 
「點呀？又等啲咩呢？」我沒有因為他的叫喊而停下來，反而把手機放到耳朵旁邊。




 
「我……我答，你問咩我都答！你……你收線先，好無？」
 
「真係咩都答？仲有我要你查咩你都查？」
 
我再三跟他確認，他不住地點頭後，我才把電話收到褲袋中。
 
「噉……噉咪好囉。不過，其實我頭先都真係講晒所有知道嘅嘢㗎啦。你……你其實仲想知道啲咩呢？」
 
「我頭先咪講咗囉，你Check咗閉路電視未，仲有，巡邏嗰本更簿，應該有寫低德叔出發巡邏嘅時間㗎。我想知道，到底德叔幾點離開保安處，佢又有無搭過電梯。噉樣，如果德叔只係離開咗大廈，我哋至少可以估下佢幾點離開呢度。」我一口氣問了很多問題，等待著他的回應。
 
「其……其實嗰啲係公司嘅嘢，我係唔可以……」
 
我看他不太想好好回答，我也不多跟他廢話，再次拿出手機。
我還沒有按下開關，他已經搶著回應。




 
「我……我依家幫你睇啦！」
 
他走到保安處拿起了一本簿，看來是用作紀錄工作人員的巡邏時間。
 
「李廣德，李廣德。呀，係呢度啦，零晨一點，即係同平時巡更時間一樣啦。」
 
他展示了德叔最後的紀錄，顯示出最後的巡邏時間。
 
「𨋢入面嘅閉路電視呢？」我追問。
 
「嗰個閉路電視啲影像唔喺呢度㗎，我無辨法依家睇到。」
 
我怒瞪了他一下，但他仍然一臉無奈地看著我，我知道他不是在說謊。
 




「唉，既然係噉，我想上左天台睇一次。」我想起昨晚在天台前撿到的玉墜，總感覺天台十分可疑。
 
「吓？但係保安員係唔會上天台㗎喎，同埋，天台一向都有鎖。嗱，你睇，條鎖匙仲喺呢度，即係話德叔唔會上到去啦。」
 
「我知，不過……」我實在不想把那玉墜的事情說出來，怕事情會弄得更加複雜。
 
「不過之前新聞都有賣啦，好多命案都喺天台發生。如果德叔真係喺天台有咩事，愈遲發現，呢座大廈就會愈出名㗎啦！」
 
「噉……噉呀……」
 
「唔好諗咁多啦，上去望下咋嘛，無嘢咪落返嚟囉！」
 
「噉……好啦，我陪你上去望一眼，無嘢嘅話我哋就即刻落返嚟啦！」
 
德叔，希望你只是在天台上出了點小意外吧，千萬不要有事啊！