［校園鬼故 X 陳生回歸 X 角色崩壞］無能子鋒與無能鬼: （十七）炎冰的提醒
「子鋒你真係好啦，放咗學都仲過嚟幫手。」陳婆婆友善地對我說。
「係囉，依家好少後生咁乖仔㗎，係呢，你有無拍拖呀？」張婆婆也笑著說。
此刻的我，正被四五個婆婆圍著起哄。
你問這裡是甚麼地方？
又為甚麼我會出現在這裡？
其實，就在我離開學校之際，卻被偶然經過的黃炎冰給攔截下來。
「陳子鋒！」我剛踏出校門，便聽到一把熟悉的聲音從旁邊傳來。
我往旁邊一看，雙腳不期然的準備離開，但還沒有行動，那人便雙手搭向我的肩膊。
「我嗌你做咩唔應我呀？」黃炎冰一個箭步走到我身旁。
「唔係唔應你，係未反應得切啫。係呢，點解你又喺度出現嘅？」我特意在最後時提高了聲線，因為我以為她是受天命叔所托所以才出現在這裡的。
「咩又啫，我喺大學嗰邊參加咗個義工團體，咁啱要服務嘅對象就係你對面呢間老人院。不過今日我哋有個組員唔得閒，我咪過嚟搵你幫手囉。」她解釋得妥妥當當，彷彿不想我再問下去似的。
而事實上，我亦沒有機會再詢問任何事情。
因為當她說出「幫手」這兩個字的同時，她已經半強逼的把我拉走了。
我就這樣沒頭沒腦的來到了學校對面的安老院，她跟我介紹了大約的流程後，就演變成這個樣子了。
「子鋒，你無拍拖嘅話，我有個孫女同你差唔多年紀㗎，下次你過嚟嗰陣我介紹你識啦。」
面對著這些老人家，不知道是否平常無處渲洩他們的活力，我被他們問得暈頭轉向，無法應對。
「今日辛苦晒啦，下次再麻煩你哋啦！」安老院的職員禮貌地對我們說。
而我聽到這句話，就像得到解放一樣，整個人精神起來。
我跟那些老人逐一道別後，便跟炎冰一起離開。
「咁嘅時間，不如去食飯囉？」炎冰用力的拉著我的校服，我知道若我拒絕，我和我的校服絕對不會有甚麼好的下場。
我們兩人來到了地鐵站附近的麥當奴，但我知道，她不會讓我輕鬆地完成這頓晚飯，我才不相信她是「偶然」想起我，才來找我幫忙的。
不消一會，我倆便風捲殘雲般把桌上的食物一掃而空。
當然，我知道她是不會就這樣讓我離開。
「喂！」我和她其實只是一張桌子的距離，但她卻喊得像相隔一條街似的。
「哇，大姐呀，搞咩呀你，我唔係聾㗎。」我按了按我的耳朵，露出了厭惡的神情表示抗議。
「哼！我驚你又心不在焉咋，你知你呢排㗎啦。」
「咩呀？咩心不在焉呀？」
「扮咩嘢呀，你係咪又中招呀？」炎冰上下打量我了一片。
「中招？中咩招呀？」
「仲扮嘢，你身上面個護身咒邊個幫你整㗎？」
「我都唔知你講咩？」我裝作不知情，只因我認為炎冰是天命叔吩咐來打探我的情況的。
「你放心，我唔係天命叔，我唔會睇得你咁緊嘅。同埋，我都唔覺咁對你係一件好事嚟。」炎冰的說話正好說出我的心聲，但我又能怎樣呢？
「算啦，好事又好，壞事又好，我都無話事權啦。」
「你咪噉啦，以前嘅你乜都唔識咪一樣過得好地地，點解你依家會變到咁無自信㗎？」
「你哋淨係識得講以前，你BB嗰陣夠要飲奶粉啦，你依家駛唔駛飲呀？」
「唉，唔同你講呢樣啦。」
「唔講呢樣講邊樣呀？」
「講你同阿奶呀！」
「吓？我……我同阿奶咩呀？」炎冰的說話嚇了我一跳。
「仲扮咩嘢呀？你做咗啲咩嚟呀，點解無啦啦會分手㗎？」
「點點點點解你會知㗎？」我可沒有跟任何人提起啊。
「你唔好理啦，你到底搞咩呀？之前都仲好地地㗎。」炎冰沒有正面回答。
「咩搞咩啫，拍拖嘅嘢，分手好正常啫，唔通真係拍拖結婚生仔都同一個咁老土咩？」
「嗱，陳子鋒你唔好扮晒嘢呀，你份人係點，識你兩三日都知你係點，我同你識咗咁耐，你唔係諗住噉樣敷衍我呀？」
「咩敷衍你啫？」
「唔好扮晒嘢，你哋拍咗幾耐啫，有咩理由無啦啦散先得㗎！你唔好又再逃避呀！」
「咩逃避啫？無呀無呀，咪就係……就係唔鍾意佢咋嘛，有咩問題先？」
「咩問題？你唔好被我睇死你啦，你肯定又自己喺度FF有幾慘有幾慘，FF完之後又懶係嘢咩唔想累人，又扮晒識為人諗噉，咩都唔同佢講，結果搞到分手，係咪呀？」炎冰的說話幾乎全說中了，她是何時這樣了解我的？還是說我的性格真的如此容易讓別人看穿？
「頂你，你識讀心㗎？」我忍不住脫口而出。
「咁啫係無講錯啦！」
「錯……錯錯錯！分手係因為我……我……我同其他女仔喺埋一齊，我無咁好死去為佢諗咁多嘢。」我強烈否認，但卻更顯得此地無銀。
「你睇你呀，講嘢講到口窒窒噉，仲扮乜鬼嘢。何況你啲咁嘅性格，除咗阿奶，有鬼人頂得你順咩！」
「你你你理得我呀，總之唔散都散咗啦，都無計㗎啦！」
「呢個時候都仲為人諗，你係咪傻㗎！呢啲情況梗係搵人陪下，等人關心下自己㗎啦！樣樣自己死頂，遲早砸死自己呀。」
「我無死頂。」我別過頭去，我不想承認那是自己的想法，我只想當一個絕情的人，不用讓其他人在我離世時感到牽掛。
「唉……個個都話你變咗，但係偏偏你最蠢嗰部份就無變到……」炎冰擔心地說。
「咩……咩呀？你今日特登過嚟就係想同我講呢啲嘢？」
「梗係唔係啦，今日過嚟係為咗關心下你嘅。」
「唔係啩，你會咁好死？」這句說話換來炎冰一個能殺死人的眼神，我是說真的把一個人生命結束掉的那種眼神。
「我不嬲都關心人㗎啦！同埋……我其實嚟咗呢間安老院幾次，但係我感受到一股好奇怪嘅能量，若有若無噉。而且呢股能量覆蓋範圍好大，我暫時都未追踪到佢，我驚呢股能量，係衝住你而嚟！我怕，呢股能量仲會對你身邊嘅人不利。」
我會成為靈體的目標是一點也不稀奇，但既然炎冰說這股力量會衝著我和我身邊的人而來，那我就不可能當成小事來看待了。