［校園鬼故 X 陳生回歸 X 角色崩壞］無能子鋒與無能鬼: （七）切斷連繫
「小……小詠……」我一臉驚愣的看著小詠。
小詠沒有回話，右手又賞了我一記巴掌。
雖然臉頰傳來火熱疼痛的感覺，但我感到，這次的力道遠比剛才的來得輕。
而且，我感到小詠的手掌接觸到我的臉頰時，我好像感到她的手在微微發抖。
「小詠……」我不知道應該對她說些甚麼，只能靜靜地看著她。
而小詠仍是不發一言的看著我，眼神充滿著憂鬱。
沉默的氣氛令我感到不舒服，我只想轉身就跑，逃離這尷尬的場面。
突然，四周的春意盎然的環境，開始出現一道又一道的裂痕。
四周像破裂了的玻璃般，開始慢慢地脫落。
我知道，由於那大叔靈體被小詠趕跑了，這個空間沒有了創造者的支撐，於是慢慢開始崩壞起來。
看到這樣的情況，我不禁舒了一口氣。
因為空間崩壞，亦代表我快要從失去意識的狀態清醒過來。
小詠也了解到這樣的狀況代表甚麼，所以她總算開口了。
「子鋒……好耐無見。」
想不到她第一句說話，竟然是普通的一句問候，我還以為她會破口大罵或是狠狠的教訓我一頓。
「好……好耐無見。」我萬料不到她會是這樣的反應，只能勉勉強強的從嘴巴裡吐出這句說話。
「你……變咗好多……不過，有啲嘢又無變到。」
「吓？我……我唔明？」
「你明嘅，你扮唔明啫。又或者……改變咗嘅你，真係會唔明都唔奇……」小詠略帶哀怨的看著我。
「啫……啫係點呀？」小詠不知是否跟天命叔學道學太久了，說話偶爾會像佛偈一樣，令人摸不著頭腦。
「你變咗好多。你變到唔識講笑、變到對人冷漠、變到無晒衝勁、變得封閉、變得膽小怕事……」小詠一下子說了一堆我根本不願意聽到的說話。
「仲有……你變到對自己無晒信心……我認識嘅陳子鋒絕對唔會係咁，佢係一個打不死，跌低幾多次都會爬返起身嘅人嚟，點解你會變成咁㗎？你快啲變返以前咁啦，以前嘅你，無論遇到咩事都唔會認輸。陳子鋒，我知你得㗎。」小詠雙手搭在我肩膊上，那雙曾經這麼柔弱的手，此刻我卻感到充滿力量，小詠也變了，變得更堅強，更有力量。
我輕輕撥開了她的雙手，直視著她。
「無錯，你講得好啱，我係變咗。但你知唔知頭先你講少咗兩樣嘢，我已經變到無晒靈力，亦都變到無晒生存希望。三年……三年之後我就會死……你要我變返以前咁？我……做唔到……」
我搖了搖頭，空洞的雙眼，流露出的是絕望。
「唔會㗎，你唔會有事㗎，天命叔封印你嘅靈力就係為咗幫你，所以你更加要振作。」
「幫我？佢個方法有無效，我諗佢自己都唔敢肯定。同埋，你都睇到我依家嘅情況，唔好話三年，三個月我都唔知捱唔捱到。上次好彩有炎冰幫手，今次好彩有你，但下次呢？下次又點呀？係咪要我日日匿埋喺道壇，三年之後先出返嚟見人呀？」我愈說愈激動，原來我並不是如我想像般看得開。
「唔會㗎，你唔會有事㗎！你記唔記得我第一次出現喺你夢入面，向你求救，你嗰陣咩都唔識但都照樣幫我。今次輪到我幫返你，我唔會畀你有事㗎！」
「小詠……我幫你，只係因為嗰陣我唔識嘢唔識死，我根本唔係發自內心咁想幫你……而且，之前你已經幫我擋咗一劫，你要還債又好要報恩又好，已經夠晒㗎啦！仲有，你自己都仲傷緊，你顧掂自己好過啦！我唔需要畀鬼可憐呀！」我加重了說話的語氣。
「咩可憐你呀？我係真心想幫你㗎，同埋我啲傷已經無事啦。」說罷，小詠的身影開始慢慢變得淡薄起來。
「哼！仲話好返晒，你睇你連維持人形都做唔到，我唔需要一隻連自己都顧唔掂嘅鬼嚟同情我！你走啦，唔好再出現喺我面前，乖乖地匿喺道壇度修行啦！」
大概由於小詠的力量開始減弱，四周崩壞的速度愈來愈快。
「唔得，我唔會唔理你㗎，無論幾多次都好，我都會出嚟幫你，你聽唔聽到呀，衰人子鋒！」
「你真係好煩呀！既然你咁固執嘅話，我只有用我嘅方法切斷我哋嘅連繫啦。」我對著小詠淡然一笑，對她作出最後的道別。
「你講咩呀？咩切斷連繫呀？無用㗎，幾多次都好，我都會出現喺你面前。」遺下了這句說話後，小詠的身影完全消失，四周也徹底崩壞，變成一個漆黑的空間。
「再見啦小詠，希望你好好養傷，早日成仙啦。我知嗰兩巴你只係想打醒我，但無用㗎，我已經係一個廢人，愈掙扎只會愈帶好多麻煩畀身邊嘅人。所以今次，會喺我最後一次見你。」
由於整個空間崩壞，失去了立足點，整個人急速向下墜落，就像我的心一樣，掉進那名為絕望的深淵之中。
「同學！同學！你無事呀嘛？」耳邊傳來一把男性的聲音。
我睜開眼一看，是地鐵職員，我再環視了四周，發現自己已經擺脫了幻覺，回到現實了。
「哦，我無事，我無事。我有個奇怪習慣，就係行行下會突然停低諗嘢，嚇親你唔好意思呀，我走先啦！」
我隨口編了個理由，然後馬上跑進地鐵站，遺下那一臉茫然的地鐵職員。
來到月台位置後，由於已經過了放學好一段時間，月台上並不算太多人，我馬上跑到一個較少人的角落，從銀包裡拿出了一道符咒，然後偷偷解開了襯衫的鈕扣，把符咒往身上貼好。
「好，搞掂！小詠，我諗，我哋以後都無機會再見㗎啦！」
「咳咳，咳咳！好痛！」小詠回到道壇後，馬上回到神主牌裡，吸收著壇木的香火，以緩和身體的不適。
「我咪叫咗你唔好去囉！」天命叔的聲音在一旁響起。
「我唔去......唔得呀……頭先子鋒被隻靈體搞……咳！」
「你幫一次就話得啫，如果有二三四五次呢？咁你點算呀？係咪想灰飛煙滅呀？」
「我……我可以頂得住，但我唔幫佢，佢真係……真係會死㗎。」
「子鋒呢個細路真係……咁你頭先見完佢，佢點呀？」天命叔其實也只是口硬心軟，最終還是禁不住關心起我來。
「佢咪無晒自信，無晒活力囉。如果唔係佢身上嘅磁場無改變，我真係會以為係第二個人扮佢。」
「估唔到封印佢嘅靈力，佢會有咁大嘅反應……就算依家畀返晒啲靈力佢，以佢依家咁弱嘅心靈，佢都未必承受到自己嘅力量……唉，點算好呢？」天命叔拼命思考，但也想不到如何能夠幫我。
「師傅，你真係要幫下子鋒。雖然佢改變咗好多，但係佢本質無變㗎。佢頭先仲話要切斷同我嘅連繫，等我唔好再出現喺佢面前，我知道……佢其實係為我好先噉做。我……我相信佢仲係以前嘅子鋒嚟，師傅你不如畀返啲靈力佢啦。
」
「你……你頭先講咩話？咩切斷連繫呀？」天命叔略為緊張地說。
「頭先我去幫佢嘅時候，佢最尾咁樣同我講囉，有咩問題？」小詠也意識到有點不對勁的地方。
「你即刻試下感唔感受到個細路嘅靈力、位置等等。」天命叔沒有解釋，卻吩咐小詠按他的說話去做。
小詠雖然不理解這樣做的意義，但她還是乖乖的照著辨。
「點解？點解我完全感受唔到子鋒㗎？發生咩事呀？」