飛一次大阪，談了一場六天的「同地戀」: 12

望著她跳躍的背影，我內心感到有什麼在翻滾，禁不住上前再問：「妳講真架？」


「Um......假架。」


「假嘅？」


「做咩？你好似好失望咁嘅？」她笑著問：「你好想係真咩？」






我分不清她到底在說真話還是假話，但她的說話已經使我的心情七上八下。


「無......問下啫。我無乜所謂。」我擺出一副不打緊的樣子。


「真係？」她側頭地問。






「嗯。」


其實不是吧。


對著她，我就好像一個1lv無裝甲的戰士，而她則是99lv的魔王，毫無還擊之力，只能被動地等待她出招。






送別她們後，我們就回到難波民宿，我累得躺在地上。因為我習慣未洗澡前，不會睡在床上，免得把街外的細菌帶上床。


「喂你做咩訓地下呀？」阿包看見我躺在地上，就趁機踩一腳。


阿傑見狀，馬上說：「做咩踩人？」然後把他的右腳踩在我的肚皮上。


善良的我當然慘被人蹂躪一番。


「啊！你搵咗房東嚟整未呀？」我忽然想起什麼，然後問阿包。






「佢話今日晏晝會嚟睇，但.......」


阿傑檢查一下，還是沒有熱水。


其實我們有問房東，要不要在屋裡等他上門修理，可是他又沒有回覆。


這是我們在日本遇上的第一個房東，印象卻是不怎麼好。


「咁睇落佢似拖緊我地啵。」我說道。






「係呀。但可以點？」阿包問。


樓下的管理處在我們回家的時候，就已經關門收工。早上我們外出時，他又未值班，簡直是叫天不應，叫地不聞。


「不如去澡堂沖呀，日本唔係好多澡堂架咩？」我提出建議，但他們壓根不想理我。


最後又要洗冷水澡，會不會太爽，要知道這裡的天氣真的挺冷。


洗澡的程序如下：

1.　脫衣




2.　忘了關門，先關門
3.　脫衣
4.　開花灑，寒氣逼人
5.　淋水同時尖叫
6.　一邊塗肥皂，一邊喊著嘩！嘩！嘩！（有層次的遞進）
7.　沖水同時上高音八度
8.　關水喉
9.　穿衣服
10. 發現未洗頭
11. 重複程序3-9


辛苦地把澡洗好後，他們才發明一個方法，就是自己煲水洗澡。






「點解唔一早講！？」我差點崩潰。


「咁你一枝箭去沖，無人阻到你架。」


..........


「阿森佢地話聽日去清水寺啵。」阿包望著手機說。


「好呀，無問題。」我回答。


「但聽日間中會落雨啵。」阿包再說。


「咁即係取消呀？」


「唔係，係叫你帶遮。」


那一刻，我已經有不祥的預感，明天肯定多災多難。


如果我這種預感拿來買六合彩就好了。


「其實阿傑你仲想唔想架？會唔會好悶？」阿包問阿傑。


「我覺得同小美都傾到計。」阿傑如此說。


此番話一出，使我們都很驚訝。


阿傑覺得有人聊得來，意表真的非常聊得開。


「咁真係要還神。我去買雞。」阿包說。


手機在此刻響起，又是無頭像帳號傳來的訊息，即是BoBo。


是她在床上抱著小熊維尼的自拍照。


我回覆：「放開隻小熊維尼啦，佢好辛苦。」


「鬼係，佢不知幾鍾意我呀～唔捨得走！」


「佢同我講嘅唔一樣啵，佢話屈服係妳淫威下先咁講。」


「走開啦，佢話你係金魚叔叔，唔准你再望佢呀！」


「妳試下放手，佢一直係揀嚟跟我。」


「唔會，熊熊佢會揀我。」


「佢幾時變咗做熊熊？」


「um......啱先諗起就幫佢改咗。」


「人地先唔想要啲咁嘅名。」


「你又知熊熊諗咩？」


我們圍繞一隻公仔聊天，竟然可以聊到它的想法、出生、星座、女朋友，將來想生幾多個小朋友等等。


「兩個，一男一女最好。」她說。


最要命的是，我竟然認真地陪她談下去。


「一隊足球隊啦不如。」我說。


「低B！點生呀？」


「夠妳食鹿餅個樣低B？」


「咁你又望？」


瞧一下時鐘，原來已經兩時多，該是睡覺的時候。


「訓啦妳，聽日唔知醒。」


「你豬屬性，你先唔知醒。」


「都唔知邊個豬。早抖啦BoBo。」


「拜拜。」


臨別前她卻又叫住：「喂。」


「做咩？」我問。


「其」
「實」

「我」
「無」

「突」
「然」
「鍾」
「意」

「小」
「熊」
「維」
「尼」



「拜拜。」