那年，我在補習社遇上她..: 第三十六章 錯覺

我整好個靚頭，着住對racer就出咗門

去到crystal樓下，我見到佢着住件onepiece，啲仙氣湧晒出嚟..

唔怪之得我哋學校咁多男仔都咁鍾意佢…諗極都諗唔明，我又唔係高又唔係靚仔，點解佢會睇上我..

「等左好耐呀？ 」我問

「唔係呀我都係啱啱先落到黎」佢講





唔知點解我一見到crystal就有種好放鬆嘅感覺，好似咩都可以同佢講咁..

相反angela…好似好多野我要同佢收收埋埋咁…

好似到而家咁，我同佢其實對大家屋企情況係點都唔係話太熟悉…

我覺得我同佢好似好陌生咁…

同埋佢成日忽冷忽熱佢其實有冇理過我感受呢..





「諗緊啲咩，傻佬，諗到咁入神 」crystal問

「下冇啊諗緊一陣間去邊啫」我答

「下乜唔係你要先諗好架咩」crystal扮嬲咁講

「講吓笑咋一早諗到去邊啦，不過依家唔講住，俾個驚喜你」我講

其實驚咩喜呀，我完全冇諗過去邊，我以為Crystal會搞掂晒所有野





「係咩」crystal對著我笑，個樣仲奸過鄭子誠

我終於明白「笑得我心裏發寒」係咩一回事

「算啦，你咁蠢，睇死你冇諗過去邊 」crystal講。

「我地一於去apm啦」佢講

「吓，去apm做咩呀」我問

「睇戲囉，死蠢」

上左巴士，crystal成個細路咁拉住我隻手話要坐最前

佢一上車就訓著左，成程挨著我..佢應該好眼訓好攰..





我好清楚crystal仲係好中意我，但係..但係呢個世界永遠都係咁..

岩嘅時間，錯嘅人 ; 錯嘅時間，岩嘅人...

我呢一刻中意嘅唔係crystal...

係angela...

「叮」angela snapchat我

佢影著佢自己成疊書，個caption係:幾時先考完試😭

我下意識咁覆佢:唓，你睇下你自己咪又係喊包一個😩





佢覆:咩呀，你喊果陣醜樣好多🙈因為你係豬🐽

我:咩豬呀😩我幾時又變左豬

佢:總之你係豬啦，驚狗嘅豬😡

我:知啦知啦😩你話點就點啦😩

佢:係wo，你識唔識呢條?

佢影左條econ ADAS比我

我:好易姐，條LRAS移去右邊....

其實angela都幾蠢下，一條econ問左成3個字





我:明唔明呀😩點解你可以咁蠢，問咁多野😩

佢:咩呀，你就蠢😩連狗都驚

「下一站觀塘市中心..」原來咁快已經到左觀塘

我望一望crystal，佢訓到啲口水都流左出黎，佢訓教果陣個樣真係好靚..

比crystal訓係我膊頭到，訓到都有少少痛..

我抿左佢一下

「到啦，死蠢」





「估唔到你個膊頭仲係咁好挨wo」

仲記得…中四果陣嘅聖誕假…我同crystal每日都出街、睇戲食飯..佢每日都好似依家咁挨著我個膊頭…

動作不變，但我對佢嘅感情好似已經消褪..

錯嘅時間…

「吓，你唔係依家先知呀」我答
「行啦」佢捉著我隻手

當然，其實我唔想佢有啲咩誤會…但係佢捉到我好實..

「不如睇原諒他第77次囉」我講

其實我揀呢套戲係有原因..男主角同女主角相識十年，但最後都係分手，我其實想同crystal講…我唔值得佢原諒我..

「唔呀，我要睇壞蛋獎門人，你睇下啲minions幾似你」佢抿著我塊面講

我對crystal忽冷忽熱咁…咦？忽冷忽熱？

忽冷忽熱..我諗起angela平常對我嘅情況..

我對crystal忽冷忽熱嘅原因..係因為我中意angela…

咁其實angela對我忽冷忽熱，可能佢中意嘅係第二個人..

根本我同angela嘅角色都係同出一徹..

我呢一刻終於諗通曬…我自己都係被人忽冷忽熱咁對待…我好明白果種嘅痛楚..我明白crystal一直以黎嘅感受…

「咩我係minions呀你先係，你矮我咁多」我講
我寧願crystal開開心心咁過埋呢一日..之後先徹徹底底咁忘記我..

「唓，你好高咩」crystal扮嬲講

其實套戲都冇乜特別，都係班minions係到9下9下咁

「食唔食野呀」crystal問

「吓，唔好啦，你咁大食，呢間商場啲野邊夠你食呀，我驚啲餐廳破產呀」我講

「陳 逸 希！你 講 多 一 次 ？」

仆街啦，佢開始發嬲...痴孖根，一拳打落我個手到…

正當crystal扮唔理我自己行快左幾步嘅時候..

嘩屌，唔撚係呀…

我好似見到仆佳同angela…之後太多人，想望多兩眼都唔得

我唔知自己有冇睇錯….身高，樣貌都好接近..

但係我又唔消楚係咪真係佢地黎…

我停左係到…crystal行過黎講「做咩呀，係咪我頭先重手左搞到你咁痛呀」

「唔係呀死蠢，唔關你事呀」

我勉強咁擠出笑容…

我又諗起angela先話呢個禮拜先考完試，又點會依家出街？

應該只係我睇錯姐..