那年，我在補習社遇上她..: 第三十四章 苦？甜？
話咁快就到大考，古語有云：「書到用時方恨少」，呢句話完完全全體視係我身上
呢一年渾渾噩噩咁，滿腦子都係angela…中英文同econ叫做好少少，中文yy真係幫左我好多，英文就係靠由細到大根基比較好。Econ就真係靠補習同本身自己腦力
操..聽日就考數學…我揭一揭本書，盒內有三個顏色的球，為白色，藍色和橙色，已知小明已抽了一個白波….我屌，乜撚野黎架！佢抽波咪抽囉，計乜撚野概率，佢係咪痴線！
「喂，出唔出黎溫書，數學好撚難」我打左比高佬俊，傻均，肥民
最後得出黎嘅結果都係話佢地約左人溫書..
仆街，約咩人呀，約女就約女啦，成班係到偽毒
仆佳？係wo唔記得問佢
「喂，出唔出黎溫書」我問
「吓….唔…唔…好啦….我..我屋..屋企溫」佢答
點解佢答得咁驚青？又唔係叫佢去做賊？咁心虛做咩？佢一定有啲野
「咁..咁算啦」我答
我係腦海入面搜索緊仲有邊個可以搵..
Crystal!佢數學咁好，叫佢咪得囉
「喂，crystal，出唔出黎呀？我..我數學有啲唔識」我唔夠膽講話我自己完全唔識..
「好呀，幾點呀？」佢問
「9點鐘Starbuck見啦」
「哦」佢答
我求其著件u記啲公廁衫，仲好記得係snoopy卡通，加埋著對racer就出左去
去到Starbuck…..我嚇左一跳…
點解我會同crystal著左同一件衫….
明明我地冇預先夾定..
佢見到我件衫之後，塊面好紅，我坐低嘗試下轉移一下視線，我睇一睇琴晚同angela嘅對話，果然，我同佢講完早抖之後佢藍剔我
於是我同angela講多次「😝早晨，起身未呀」
之後就將部手機較去飛行模式
「喂呀，做咩今日抄我著snoopy呀」crystal紅著面咁問我
「冇呀，唔知點解一諗起你個樣就諗起snoopy」我講
「點解嘅？」
「因為你好似佢咁得意呀嘛」我講
「做數啦，口花花」我望到佢係到偷笑
「crystal姐呀，即係呢到佢叫我搵平面ABC同…」
「呢到呢，我唔係幾明咩搵圓的方程，佢連圓心都冇比….」
「仲有，呢到點解佢話排隊，但係點解要用P唔用C?」
無錯….我冇一秒鐘係靜落黎…因為我真係全部都唔識..
「點解你可以咁蠢架！死蠢，呢到咪用返..」
「又點呀死蠢豬，好簡單姐…」
無論我問咩…雖然crystal一開頭都會借啲意話我蠢..但係之後佢會解得好深入比我聽…
聽佢講真係幾乎明曬….
我望一望個鐘，原來已經一點，我同crystal原來已經坐在係到成朝..
「喂，食唔食野呀，我好肚餓」我同crystal講
「你唔洗食啦，你咁蠢，成隻豬咁，食自己咪得囉」
我地一直有講有笑…
「喂，死蠢，你想食咩呀」crystal問
我岩岩睇緊手機…睇緊angela有冇覆我..
結果都係…藍剔…
「不如三哥囉」仆街，我以為同緊高佬俊一齊粗茶淡飯，食乜都冇所謂，到我講完先發覺我身邊呢個係crystal黎，我敢寫包單佢從來冇食過三哥
「好呀」難得佢答得咁豪爽….
「靚仔食啲乜野」三哥阿姐帶著啲鄉音問我地兩個
我見crystal拎著塊餐牌望黎望去都諗唔到食咩..
「一個過橋米線呀」我直接同阿姐講
「麻辣湯底？」阿姐問
「清湯得啦，佢唔食得辣」我望一望crystal，佢笑得好甜..
之後crystal食左兩三個細碗就話飽，我都唔知女仔啲胃係咩構造，食兩啖就話飽，最後都係我自己一個食曬佢…
「係wo，點解你仲記得我唔食得辣嘅？」
「唔知呀，我醒囉」我講
食完野之後，我地行多一陣就去左自修室到..
老實講，得翻一晚同一個晏就，伽利略都溫唔切啦，大佬
一坐低，我睇一睇電話，見到angela影左啲出街相post左上ig，但係又冇tag邊個，算啦，應該都係女仔黎..
於是我snapchat同佢講：「同你一齊出街果個人一定好慘😢你食都食到佢破產😢」
覆完之後，我繼續嘗試去做數..
但係做下做下…我眼皮好重..我頂唔住
訓著左！
我feel到有人好似錫左我一啖，應該係crystal？
「醒啦醒啦，人地收館啦」crystal同我講
「吓..咁早」
「仲早？！你訓左成3個鐘啦，正一死肥豬黎」crystal講
「仆街，咁我點溫得切呀」我成個人彈起左
「嗱，拎著啦」crystal遞左本野比我
「我見你照早問你問去都係問prob. P&C 立體同圓，我幫你寫好曬你要溫嘅野啦，應該合到格掛」
「好啦，有你係到點都合到格嘅..我送你翻屋企啦」我講
翻到屋企，我揭開本野….成本野絕對唔係平時上堂用原子筆抄果啲，而係每一句都用左唔同嘅顏色，memo紙貼著，提醒著我常犯錯誤…
最後一版仲寫著 Just for 逸希，仲話左個🐷比我
Crystal真係好好….我…
我睇翻snapchat，angela又藍剔我…
我已經習慣左我同佢呢種過山車式嘅關係…一時好close好似一對情侶，一時又可以好陌生…
你知唔知我好辛苦….你到底對我有冇感覺架…我付出咁多你都可以當睇唔到嘅？
「叮」有人wts我，我以為係angela，點知係crystal..
「死蠢😒，今晚最遲12點鐘好訓啦🙁，就算溫唔切都好都一定一定要準時上床☹️仲有呀😛，你有啲咩唔明就問我啦😛我唔會歧視蠢人☺️😝」
Crystal…你可唔可以唔好對我咁好呀….