紙言

我係喜達,撈麵界既亞視: 結局(B)





收拾心情

開始真正既結局

我地先去返黑仔生左邦仔之後既畫面

每個月既三十號.都會上黃俊父母既屋企

當探望又好,充當一晚黃俊既角色





就當陪住自己父母食飯

而黃俊雙親都好歡迎

每次上去

黑仔都會放低三千蚊

呢三千蚊,黃俊既媽媽會幻想黃俊返屋企,比家用





黃俊媽媽越來越唔妥

黑仔都有留意到佢精神唔係好妥

黑仔好希望開解到佢

但黑仔始終都無做到

佢同黃家





永遠都好似有一道無形既牆阻隔住

不論係黑仔,定係佢地父母

心裡面都係放唔開

黃俊媽媽上左大陸,得到黃俊既驗屍報告,報告話黃俊死之前比人屈斷左兩隻手指

黃俊媽媽記得,黑仔都係有兩隻手指廢左

黑仔無將黃俊出賣自己既事話比佢父母聽

黃俊媽媽問過黑仔好多次

黃俊既死同佢有無關係





黑仔都係唔認,黑仔都想知佢點解要自殺

黃俊媽媽認定黃俊既死係同黑仔有好大既關係

慢慢,黃俊媽媽就同黑仔講,唔好再上來食飯

黑仔無再上去





『呢隻死貓,就等我食一世』






黃俊媽媽開始搵香港既私家偵探查呢件事

黑仔成為主要既被查對像

每日返工,放工都比人監視住

黑仔當然係唔知道

始終查唔到d咩出黎

黃俊媽媽開始上大陸

搵所謂既大偵探





黃俊媽媽首先就要比好多錢

佢都無所謂

只要查到係邊個有份整死自己個仔

幾錢都值得

一路都無回音

黃俊媽媽甚至想係塔羅牌上面得到答案

都係無

到最後,問米





所謂問米,信則有不信則無

開始問米之前,問米婆同佢傾左好耐計

問米婆了解左佢既背景,姓乜名乜

問米婆開始七情上面...

又拍晒枱又成個人震晒

突然停左落黎

黃俊媽媽捉住問米婆隻手

『俊?俊係咪你呀..我係媽咪呀』

『......媽咪』

『真係你呀俊,媽好掛住你呀』

黃俊媽媽已經開始流眼淚

『話比呀媽聽,係邊個搞到你死』

『...』

『講比媽媽知..』

『...』

『係唔係黑仔呀』

『唔..』

問米婆正想講落去既時候,燒香的煙攻到問米婆

『咳..咳..咳..』

問米婆出洋相了

『呀..呀..黃太..頭先..er..係咁既..你個仔怒氣實在太大,以我既法力控制唔到』

問米婆隨口編出一個大話同自己解圍

『得架喇,錢係呢到』


黃太踏出問米婆間屋

電話響

係大陸既偵探

『喂』

『喂,黃太是吧,我們是偵探那邊的,方便談嗎?』

『說』

『我地查到,令公子黃俊死前跟一個叫黑林頓經常走在一起』

『我一早知啦呢d野,你地就係查到咁多?你收我咁多錢..』

『黃太,先等我說完』

『我們發現他們除了運輸公司之外,還有別的生意』

『甚麼生意?』

『他們走私』

『無可能..我個仔點會..』






『黑仔...』



『爸爸..爸爸』

黑仔抱住邦仔,邦仔呆頭呆腦咁叫佢

黑仔好開心,黑仔做左個鬼臉

即刻嚇到邦仔想喊

『嗚..』

『你個衰仔又整喊個仔』

『哈..我都無..黎黎黎邦仔唔好喊,過去爺爺到』

爺爺一抱住邦仔,邦仔就無喊

黑仔同mary生左邦仔之後,兩個都要返工

結果就係黑仔父母都佢地湊仔

一家五口一齊住

黑仔好滿足


『老公你要出去呀?』

『係呀..出去左d野做』

『哦,小心渣車,同個仔拜拜先啦,呀仔快d拜拜爸爸啦』

『爸..爸.拜拜』

黑仔笑住咁關門,係關門果一刻

黑仔望住沙發,媽媽幫緊邦仔沖奶,爸爸就好緊張咁抱住邦仔,而佢既老婆就企係門口微笑住咁望住自己

黑仔突然覺得,佢想再睇多一陣

再睇多佢既家人兩眼

『老公?你漏左野呀?』

『喔..唔係..拜拜老婆』

黑仔去到街市衣紙舖拎左一大袋紙錢

駕車去將軍澳華人永遠墳場

今日係黃俊既死忌

黑仔拎住冥鏹由停車場行上山

除左金銀衣紙之外

仲有一封信

當日黃俊信封,除左支票,仲有一封信


一封黃俊寫比黑仔既信




http://www.youtube.com/watch?v=2v-hQJwN3Ik

致黑仔


喂,黑仔,我黃俊呀

點呀你..

係開始寫呢封信既時候

我都係以為我會有好多野要同你解釋

我以為我會有萬千個借口幫自己解釋

點知我諗再好耐,都係無

我細細個都爸爸媽媽都已經話比我知

一定要讀好書,先可以搵到好多錢

我爸爸媽媽都係大學畢業

我知道我都要係咁,就可以學似佢地咁,搵到好多錢

由細到大

你讀書都係叻過我

就算我點學,都學唔到你

我學唔到你好多野

我學唔到你既責任感,我學唔到你好多野

我同自己講唔緊要

我地互補長短,互補不足

我一直以為自己好叻

我一直以為係我睇住你

原來唔係

無左你,我先至咩都唔係

我同你所追求既野唔一樣

你要安定

我唔係

由我第一日踏入中環

我話比我自己聽,我做唔到最勁果個

都唔要做比人笑果個

我要所有野都係最好,我要最貴既錶,最貴既西裝,最貴既雪茄,最貴既紅酒,最貴既跑車

我要話比人聽,我黃俊撈得好掂

但係到呢一刻我先醒起

我得到所有最好既野

我卻失去左最好既朋友

所有野發生左,抹唔走

就算你比我時光倒流

我問過我自己

我為左錢我依然都係會出賣你

因為呢個係我既天性

原諒我

比我自私埋呢一次

我所有野都已經擁有

唯獨是你

原諒我,好嗎?

等我可以好完美咁走,好嗎?

二千萬既支票,就當我買返你,可以嗎?

無論你原唔原諒我都好

黑仔

應承我一樣野

以後

唔好再咁易信我

我走啦

黑林頓

對唔住


上到山已經係日落既時份

黑仔用毛巾抹乾淨黃俊既墓碑

『那..有錢啦,有車啦,仲有女架,我叫左人整個大波d既比你架喇..仲有呀..紙同筆..你有時間就寫比我啦,不過最好用email,如果唔係你寄來你怕你嚇死我老婆』

『係呀..結左婚啦..Mary呀佢叫..我仔都埋啦,兩歲啦,等佢大個d就同佢一齊黎睇你架喇』

『喂係呀,我又做返車行啦,我終於都買左車啦,買左架七人車,好在係七人車黎講,唔算太食油,你知啦,我對車無乜所謂既姐,我又唔係你..』

『喂,話時話你自己屈架隻手指?咁戇鳩既你』

『你真係癡線..』

黑仔除低眼鏡,用紙巾印眼淚

黑仔連同黃俊既信燒左

『走啦我..下次想要咩就報夢比我啦』

黑仔執好所有野

正想行返落山

佢見到黃仔媽媽

『伯母你好』

『好?好..本身我呀俊都可以好似你咁好』

『伯母?..哦..無我見今日呀俊死忌,咪黎探下佢囉』

『你老婆又有..仔又有..我呀俊就無你咁好啦』

『伯母你點呀?係咪有事唔開心呀?』

『開心?我梗係無唔開心啦,今日,我可以幫個仔報仇,我點會唔開心』

『伯母?』

http://www.youtube.com/watch?v=EK1-ZcCoqbQ

黃俊媽媽係手袋拎出一把軍刀,一刀插落黑仔個肚

『伯母你係咪有事誤會左呀』

第二刀

『伯母我無害呀俊呀』

『咁唔通我個仔害你呀?!你講呀,唔通係呀俊害你呀?』

黑仔無出聲

第三刀

黑仔捉實黃俊媽媽隻手

『我有家庭,我有個仔,我有老婆,可唔可以放過我』

『我就係知你有家庭,我先至要你死』

第四刀

第五刀

第六刀



黃俊媽媽向住兒子既墓碑講

『媽幫你報左仇啦,等個衰人落到黎你再同我打死佢』

黃俊媽媽好急咁走左

把刀漏左係地下

黑仔總共比佢插左六刀,訓左係黃俊既墓前

流到一地都係血

黑仔拎起手提電話,打返屋企

『喂老公呀?個仔扭計呀,又話要食糖呀,我比你同佢講呀下...那那那..仔..聽電話,,爸爸要鬧你啦』

『爸..爸..』

黑仔好想出聲,但係出盡力都講唔到一句說話

黑仔收左線

黑仔伸盡隻手,拎起黃俊媽媽用黎插自己既刀

黑仔用染滿血既衫,抹走刀上既指紋

黑仔爬左起身,埃住黃俊既墓碑,望住夕陽坐左係到

血仍然不停咁流

黑仔點起左一支煙,黑仔笑了

黑仔笑住咁望住黃昏既景色

『我一世人都係幫姓黃既人做野,但係姓黃既人就要殺我兩次..嘿』

『我只不過係做第一件為自己既事,就要殺我』

『我第一次死,係為左姓黃,第二次亦都係』

『你係封信到咪講時光倒流既,我諗過喇』

『我會係中學既第一日就打死你..嘿嘿』

煙抽完了,黑仔亦都合埋雙眼

黑仔造了一個夢

夢入面,所有野都好似走馬燈咁

黑仔既人生係夢入面重播左一次

夢入面最後返到中學

李嘉欣橋住黃俊既手,而黑仔則企係黃俊既旁邊

影左一張相

相入面

大家都笑得好甜








故事完