我係喜達,撈麵界既亞視: 結局篇(2)

致黃俊


俊,黑仔呀

我無咩事喇,我聽朝就會出院

我搵過你,搵你唔到,但係你叫黎既林肯都好照顧我

其實我本身都以為我會有好多問題問你





點知當我拎起支筆既時候

我原來我發覺,我無乜野係要問你

義本無言

無論林肯講既野係咪真都好,我都相信呢個唔會係你既主意

從小到大,你都食好住好,有靚既車坐,有好多錢可以用





細個既時候

我成日會問自己,點永遠黃俊都叻過我,點解永遠都係黃俊照顧我

你係總係會答我『屌,癡線既咩你,我地手足黎架麻』

哈

我地係手足,我地係兄弟





直到呢一刻都係

我只係想問你一個問題

從小到大,你黃俊講既野,我有邊次無照做

只係點解,今次你唔直接同我講

你要既野,只要係能力做到,我有邊次會唔比你

俊

只要係你要的話,我條命都可以比你





點解你要呃我?

我無嬲過你,只係我怪我自己

到呢一刻,都唔能夠令你完全相信我

如果唔係,我覺得你會直接同我講

過去發生既事,抹唔走

我只係希望

黃俊你

有一日會企係我面前,講返所有野其實係咩既一回事





就算你係來呃我都好

只要你講一句

就可以

細個有時候有d同學會問我

『黑仔你同黃俊係咪搞基架,點解你地成日都係埋一齊既』

『下..梗係唔係啦』

『咁你答我啦,你愛唔愛黃俊』





『下...你癡線架?』

『你唔敢認,仲話你唔係基?哈哈黃俊同黑仔搞基呀』

果時佢一路係走廊到大叫,我一路係走廊到追住佢,諗起都好笑



其實我真係唔係基,但係我真係好愛你




第二日手下去搵黃俊發現呢件事





黃俊媽媽喊住咁拎封信比黑仔

『封信係出事之後先寄到黎』

黑仔落到樓下

即刻拆開信封

笑中有淚

入面係一張二千萬支票

黑仔馬上去銀行入票還錢

忙了一整天

把二千萬都還晒比人

但都未夠

仲有二百萬欠債

二百萬 一個多唔多,少唔少既數目

但係你無既時候,就夠玩死你

收數公司亦都好快就搵到黑仔既住所

黑仔係圖書館到做普通職員

每個月賺埋交完租都唔夠交息

但黑仔亦都有五百就還五百,有一千就還一千

但係係二百萬,收數公司亦都不停上黎追數

黑仔有諗過同黃俊既父母借

但係黑仔唔忍心,黃俊死左對佢地都好大打擊

有同過父母商量

爸爸只係識不停鬧黑仔

黑仔好絕望

慢慢黑仔就連工都無返

每日就訓係屋企,等收數公司來收數

直到現在


『嘩..你既人生真係過山車咁呀』我聽到拍晒手掌

『嘿..我都覺得係過山車咁』

『信我啦黑仔,個天睇到架,個天好撚公道架』

就係講到呢到,黑仔既電話響

係媽媽

『喂..媽?』

『仔呀..係屋企呀?』

『係呀..』

『....我同你爸爸商量好,決定按左層樓,比你還債』

黑仔語塞,眼淚開始湧出來

『媽...』

『仔,樓係你買架,你出事就一定要比返你』

『媽但係..我已經送左比你地』

『仔,我連家都無左,我仲要層樓黎做咩?』

『...』

『仔我係你樓下啦,落黎呀媽同你去還債啦』

『哦,我即刻落黎』

黑仔好耐都無試過咁開心

『達仔,你等等我,我一陣返黎再同你傾』

『..黑仔呀,幫幫忙,食左我』

『達仔唔得..我同你已經係朋友,唔可以食你』

『..哈..黑仔,你有無目標架?』

『有..但係一時間就講唔到個目標係咩』

『我係撈麵,我既目標就係比人食,朋友呀,可唔可以幫我呢個朋友達成目標呀?』

黑仔開始流淚

『傻仔..唔好喊..食左我之後,好好地咁活下去』

『我地握下手』

『你好,我係達仔』

『..你好,我係黑仔』