紙言

我係喜達,撈麵界既亞視: 黑林頓與黃俊篇





『喂..黑仔搞緊咩呀』黃俊直接打比黑仔

『訓覺囉,係呢呀俊你返左來啦?』黑仔聽到黃俊把聲,即刻笑逐顏開

『係呀,前日返左來啦,係呢你衣排撈咩呀』

『做d..機電野啦..重型機器野啦..』

『喂黑仔你整機械人呀?』





『...』

『...』

『車房呀』

『唔撚係掛黑仔,你貴為會考廿四分既天之嬌子,你走去做黑手黨?』

『哦,咁職業就無..』





『無你個西咩,換衫出來消夜,黃大仙冬菇亭』

『好呀』

正常呢個時候黑仔已經要休息,但係可以見到黃俊,黑仔開心

黑仔好開心

係冬菇亭等黃俊





等左五分鐘

『嗚..』耳邊傳來一好強勁既引擎聲

一架黃色既lamborghini diablo停左係黑仔面前

落車既人係黃俊

黑仔唔識車既牌子

『呀俊你部車咁扁既?用來剷泥架?』

『..咁你講都晒氣,黑仔,我地終於見面啦』

好老套咁擁抱





黃俊頭髮長左好多,又長高了,俊俏了

同謝霆鋒有九成似

我地係冬菇亭坐低左

黑仔係心口入面拎出一個guccissima煙盒,用一個Cartire火機點左一支煙

黑仔唔識牌子,但佢感覺到,呀俊撈得好掂

呀俊同黑仔傾得好開心

平時唔飲酒既黑仔都飲左兩大支





『屌,黑仔..計我話啦..做乜鬼車房姐』

『有案底..』

『屌有案底又點姐..』

『仲有呀黑仔,我搵晒d朋友幫我刮李嘉欣個八婆架喇,到時你想點搞,一句得架喇』

『下..唔好啦..唔好刮..唔好嚇親佢』

『黑仔老實講,唔撚得!』

『佢搞撚到我兄弟坐監呀,我一定要做架喇』

『唔好啦,那那那..呀俊你搵到佢之後,你比我問佢少少野,等佢答我再算,好無』





『屌唔好咁麻煩..直接斬啦......唉...你鐘意啦』

『...』

『來啦,飲啦仆街』


醒既時候已經係下午三點

黑仔比一個電話嘈醒左

係黃俊

『喂點呀俊..』





『行喇喂係你樓下』

『你係我樓下做咩呀?』

『你琴晚應承左我架喎』

『我應承你咩呀?』宿醉

『你落來樓下先』

黑仔極速梳洗衝落樓

『去邊呀?』

『去買西裝呀,上車啦』

黑仔上車,黑仔覺得車入面好科幻,好有趣

『我做咩要買西裝呀?』

『你去我公司做呀麻』

『下我幾時講架?』

『琴晚你應承我架』

下..有咩


黃俊帶左黑仔去中環一間商業大廈

上去之見到有一層全層都係買西裝

清一色女售貨員

個個都好靚

『試下啦,試岩比我過下目』

『..哦』

『嘩,衣件野要三萬八?!』黑仔望到個價錢牌忍唔住叫左出黎

『先生你貴姓呀?』一個大約米七五既長腿售貨員烏底身問黑仔

『我姓黑』

『..哦..黑生,請問你飲咩呢?』

『下有野飲既咩』黑仔心面諗,又怕失禮人

黑仔唔出聲,怕講錯野

『黑生..請問你飲開邊隻香檳呢?』

下?香檳?唔係淨係比d賽車車手用來噴人既咩?

黃俊又行到鬼死咁遠

『..黑生?』

『...』

『比包維他奶我』


『黑仔你過來睇下』黃俊叫我過去

『換左呢套來睇下』

『喂幾襯你喎,黑仔你自己照鏡睇下』

係幾有型喎,但係黑仔岩岩放監,仲係光頭,著左西裝有d似大陸黑社會

『就呢套啦好無啦,喂呀Eminem,你買我執多兩件恤衫比呀黑生替換下』

『哦..知道黃生..係呀..我係叫Emily..哈..』售貨員烚熟狗頭

『我咪話Emily囉』

『..係..係係..哈』

『黃生總共夾埋九萬蚊剛剛好』

『嘩好貴呀』黑仔同黃俊

『碎料啦,同我兄弟裝身,差唔多啦』

『你究竟搵我去你到做咩姐』

『黑仔我記得你普通話同英文都好好架』

『過得去啦..溝通到既..做咩姐』

『來我到,做銷售主任』

『下?!乜撚野來架』

星期四

黑仔正式係黃俊爸爸既公司工作

黑仔既部門有五個人

五個人都係叫銷售主任

全部都係主任

黑仔都知道,比卡片人

人地見你印住主任,好似好撚高級咁

推銷方面會比較容易

（題外話,我真係有個fd屋企有間公司,公司計埋老闆都係得3個人,分別係董事長,總經理,同主任,我上次上去搵個fd,就咁岩見到總經理係到洗緊廁所）

同事都好nice

只要你有數

係

黑仔要跑數,跑個人既數,跑團隊既數

黑仔做汽車銷售,二手車,一手車,超跑,乜都有做

『唔該』

『係係係..』黑仔跑過去招呼客人

『呢部COROLLA精唔精神架』

『er..呢部冷氣唔係好精神,波箱都壞壞地』

『不如睇下呢部IS200,各樣無都無乜問題,仲要平成萬蚊』

『呀哥哥仔你都幾老實,我都係買來比個仔操車用,好就呢部』

黑仔做左兩個半月,終於開到第一張單

只係一架三萬蚊既二手

銷售團隊唔鐘意黑仔,話黑仔倒米,唔追數

黑仔依然將事實既全部話比客人聽

當然會修飾下

做到第三個月,同事已經唔會同黑仔一齊做野

由得黑仔自生自滅

黑仔既老實作風傳左出去

好多中年客來買車都係搵黑仔

黑仔開始唔洗食老底

黑仔有佣抽喇

一傳十,十傳百

黑仔達標了,追到五十萬蚊

同事再次同黑仔做朋友

有次黑仔推銷緊一架F50

差唔多成交既時候

黑仔既同事Yuki衝過來介紹

『黑仔你sell唔掂架喇,搞掂我同你一人一半啦』

『哈,,胡生下話等我來介紹下啦』

『唔洗啦,黑生都介紹左比我聽』

『胡生咁不如試下車啦』

『黑生同我試完喇』

『咁胡生你滿唔滿意呀?』

『我叫左黑生拎文件比我簽喇』

『..』

『黑仔呀..咁..』

『唔緊要啦,我地一人一半啦』

黑仔總係咁樣

yuki行開左之後

『喂黑生,佢擺明過來夾你一半佣喎』

『唔緊要啦,最緊要胡生你買得開心,小心駕駛,有咩問題可以返來搵我』



今日黃俊約左黑仔食lunch

黑仔唔想同事知道自己同太子爺係朋友

專登約左係公司後兩條街食

『聽老豆講話你做得唔錯喎』黃俊渣住部PDA,禁部住手提電話,好忙碌

『幾好呀,呢排d客幾好做』

『你呢,呀俊,你又點呀?』

『洗鬼做既咩我,禁掣既姐』

『禁掣?』

黃俊無應黑仔,只係比部PDA黑仔睇

『睇唔明喎』

『金呀,投資呀』

『..哦』

『黑仔你做咁耐野,儲唔儲到錢呀?開返個倉玩下囉』

『唔好啦,都唔岩我,都唔識』

『升定跌都有數據睇架,好簡單姐』

『唔洗啦,係你到做已經好夠』

『係呢你仲住係黃大仙下村呀?』

『係呀..』

『你想一世都住係到呀?』

黃俊咁講一講,我又諗起上次同呀媽搭車經過見到星河明居

呀媽好鐘意,仲話有錢買就好

『屌我老豆開公司,出幾錢糧我唔知咩,黑仔機會呀,你明唔明姐,你睇下我,我有無輸姐,贏到仆晒街呀』

黑仔唔出聲

望住黃俊既PDA,黃俊既江詩丹頓,黃俊既Murciélago

黑仔諗起媽媽

諗起星河明居