我係喜達,撈麵界既亞視: 黑林頓篇

『點稱呼呀』

『我姓黑』

『你姓咩話?!』

『黑咯都話』

『咁你真係好黑話,電費又無交,間屋黑蚊蚊咁』





『屌唔好講呢d啦,你呢,點叫你呀撈麵』

『叫我達仔啦,喂咁你叫黑乜鬼姐』

『...叫我黑生啦』

『講啦屌』

『黑林頓』





屌個名咁撚熟,硬係唔知邊到聽過

跟住黑林頓講左個關於佢既故事比我聽

以下落黎我會叫佢做黑仔

黑仔話比我知佢細細個屋企好窮,不過佢好爭氣讀書好叻,年年都考第一,考入左一間名校入面

一間好多富家子弟既名校





係中一既上學期,黑仔每日都好留心老師講既野,熱心解答同學既問題

但係佢開始發現,同班既同學會無啦啦串佢

『咦黑林頓,你總統黎喎,點解你對鞋爛成咁既』

『喂你有無沖涼架,你咁臭既』

黑仔著緊果對鞋其實係四年班既時候佢表哥著到唔要比左佢,當時係大三個碼,黑仔要搵紙塞住對鞋先著到

黑仔只有一套校服,佢已經盡量唔大郁動,廢事出汗,但著五日,一定會有異味

黑仔好唔開心,比同學笑佢窮

但佢都唔理人,只係比心機讀書,直至升到中三





黑仔佢考試拎唔到第一,但係排隊就係排第一

係,黑仔無高過,中三都只有158cm

每日返屋企只有白飯,少少腐乳,爸爸好彩有散工開的話

果晚先會有菜同肉,再加上長時間屈係上格床溫書做功課,點會發育得好

但係同學既欺凌越來越嚴重

同學笑佢窮,笑佢係雪姑七友,有同學更會無啦啦出手打佢,圍住佢,踩佢,踢佢果個永遠都好似就黎爛既書包

黑仔無論點比人打都好,都唔肯放手,要抱實個書包





黑仔知道爛左,就唔會有錢買

黑仔唔開心,返屋企同呀媽講唔想返學,唔開心

呀媽鬧黑仔唔生性,唔聽呀媽講好好地讀書,呀媽話只要好好地讀書就乜事都解決到

黑仔喊,黑仔覺得自己無唔生性,黑仔係上格床可以望出去可以望到獅子山,但係黑仔卻望唔到前景




『我吧家咪比左心機讀書囉,但係點解我覺得咩都解決唔到』







『你地停手呀,唔好再打佢』依把聲音係來自黃俊同學

黑仔估黃俊同學屋企好有錢,書包日日唔同,lunch可以食日本菜,意大利菜,而我,就係自己帶返學既飯盒,凍冰冰既飯同腐乳

黑仔同黃俊有個共通點,就係都無辜負父母幫自己改既名,黃俊,真係好俊,黑仔,真係好撚黑

黃俊同學有七成似當時紅透半邊天既謝霆鋒

成為好多女同學既暗戀對像

同學亦都好聽黃俊既說話,無再打黑仔

『唔該晒你黃俊』黑仔執返比人倒到一地都係既書本

『班仆街真係好撚賤,無啦啦打你做咩姐』黃俊同學幫我一齊執





『不如咁啦黑仔,我知你無錢,每個星期你同我補習三次,一百蚊一次得唔得呀?』

『一..一百蚊?!』黑仔咁大個仔都未掂過一百蚊

『一於咁話啦,我老豆老母成日都要我搵人補習,一於你幫我啦』

『好..好呀』

自從黑仔同左黃俊補習之後,每星期有三百蚊收入,而佢同黃俊就做左好朋友

黑仔好開心,佢第一次搵到錢,同埋搵到朋友

黑仔搵到錢之後,每日放學都會買菜,叉燒返屋企

黑仔呀媽好擔心黑仔會唔會掛住同人補習而唔得閒同自己溫書,黑仔叫呀媽放心,夾左舊好大舊既叉燒比佢呀媽

有時黑仔上黃俊到補左唔夠半個鐘,黃俊就拉黑仔去玩佢既playstation

『俊..就來考試喇,溫多陣先啦』

『黑仔過來啦,試下我隻新game』

遊戲機?黑仔接觸過最高既科技只有錄影機

『點玩架』

『喇..你禁依個制就攻擊,依個就跳起..喇..係喇係喇』

『哈..好過引呀』

『喂你打佢啦』

『頂你好屎呀..快d打過舖啦』

中三既下學期黑仔好似發左場夢,黑仔終於有友情