有冇搞錯！我畀咗成千蚊人情去飲，竟然九道菜全部都係橙（實體書已出版，感謝各位支持）: 第四章第五回

5

聽到叔父女兒的死因，我和正義妹怔住了，叔父看到她停了口，不讓她浪費一分半秒，高聲催促道：「食落去呀你！」

正義妹聳聳肩並繼續咀嚼，叔父才繼續未完的話題：「佢係因為參加咗嗰場抗戰，畀人秋後算帳報復。報復嘅係咩人我諗唔使我講你哋都知，但我當時真係好無知，亦唔理解點解會咁，仲傻更更走去報軍求助，佢哋當然唔理我，求其敷衍我走。我當然想搵其他人幫手，但呢個時候先發現，社會上已經再冇人敢幫弱勢人士出頭，我個囡亦只能含冤而死。」

「佢死咗之後，我喺佢嘅遺物度搵到日記、新聞剪報等，我睇咗好耐，先明白而家啲後生仔所面對嘅問題。我亦終於醒覺，我當年只不過係好彩，先至會飛黃騰達，但唔好彩嘅人比比皆是。」

「我錯喇，係我害死咗我個囡。如果當日我冇趕佢走，肯早啲聽佢講佢哋行動嘅理念，或者我可以保護到佢。係我害死咗佢，係我害死咗佢……」語末他不斷重複呢喃着同一句話。





我安慰叔父說：「你唔好咁怪責自己啦。知錯能改，而家都未遲。」

「冇啦，太遲喇，而家嘅香港已經返唔到轉頭。」叔父愧疚地回應：「對唔住，你哋今日會身處咁嘅香港，都係我哋呢班大人當年冇盡力。我老喇，已經冇咩嘢可以做到。」

他續說：「阿妹同哥仔，我見到你哋兩個早前咁努力伸張正義，點知又係畀嗰班軍人陷害，畀個爛橙你哋，我實在睇唔過眼。唯今可以做嘅，就係將我嘅生命交託畀你哋，幫阿妹你換走個爛橙。你哋要代我好好咁活下去。」

正義妹一邊感動地聽着，一邊狼吞虎嚥把剩餘的橙嚥下。坐在對面的兒子，也勉強吞下最後一片橙。

「（普）時間到！」第八道菜的限時亦在這時屆滿。





正義妹終於有空說話，她抽泣着說：「阿叔，多謝你，我一定會救返你出來。」

叔父勸退她說：「你千祈唔好，我呢啲老人家唔值得你搵命搏。」

話畢，枱邊的一名軍人揮着紅旗，另一名軍人則走近叔父，打算把他帶走。他沒有垂死掙扎，但臨行前，他抓着正義妹的手說：「我走喇，不過，你哋要小心嗰個阿……」

然而說到這裏，軍人突然大為緊張，用力掩着他的口，更合力加快把他拉離現場。

「喂！佢就快50歲，你哋咪咁暴力呀！」正義妹看不過眼大吼，可惜結果還是一樣，叔父的身影很快就消失在我們的眼前，被送進了「審判之間」。





｛第八道菜完
十一號枱剩餘賓客人數：7｝

叔父離席後，軍人把那個害人害物的發霉「藍橙子」丟掉，但那令人作嘔的氣味，彷彿仍在第十一號桌一帶徘徊，陰魂不散。

正義妹對叔父為她犧牲一事仍震撼不已，然而事已至此，她明白絕對不能辜負叔父的寄望，於是伸伸手腳，抖擻精後說：「我諗阿叔一定係覺得我好似佢個囡，先至會咁幫我，所以我暫時都唔可以沮喪住。」

「嗯，講得啱。」儘管我這樣說，我卻沒有她那麼積極，內心仍有點混沌不安。我回應過後，想起叔父臨行前的話，於是轉移話題問：「係呢，你估叔父最後想叫我哋小心啲咩？」

正義妹說：「我估佢應該係想叫我哋小心某個人，所以軍人先咁緊張唔畀佢講。」

我追問：「某個人？所以軍人緊張？我愈聽愈唔明喎。仲有你頭先話想救返佢出來，點救呀？」

「咦？」正義妹不解地側側頭，想了好一會，她才靈機一觸般說：「原來你咩都唔知道㗎？」





「吓？我唔知道啲咩？」

正義妹知道的事情似乎比我多，這令我相當在意。我本想繼續追問下去，但台上的司儀打斷了我們的對話：「（普）第九道菜即將開始。」

我只好暫時收起好奇心，先應付面前的難題，反正都到了最後一道菜，吃完最後的橙，安全離去時再慢慢跟正義妹詳談也不遲。

只是，我忘記了軍人陷害得我們一次，就有第二次。

審判的漩渦，已靜靜地埋藏在我的腳下。