昨夜星辰恰似你: 9 .

「叮⋯」

「叮⋯」

「叮⋯」

一次，兩次，三次，十二次⋯

終於頂唔順，我選擇接聽電話。





「邊撚個？」呢世人最憎就係俾人嘈醒。

「打咗咁多次都唔聽，玩失跡啊大佬？」

迷迷糊糊之間我只係認得出係肥東。

過咗陣，佢叫極我都唔應，就播咗首又好刺耳又大聲嘅歌，呢一下衝擊，成功整醒咗我。個耳仔仲有一瞬間，聽唔到野。

「想整撚襲我？」我俾佢嚇到起咗身





「約咗十二點眼鏡誠屋企樓下等，你人呢？」

係喎，掛住同鄭梓𤋮傾計，傾到太夜唔知醒添。

「你唔係啱啱起身下話？」

「唔係，搭緊車啦，就到。」

講完，我就起身刷牙洗面。





約見面唔遲到，叫咩朋友，係咪先。

-

半個鍾之後我就到咗。

肥東一臉怒氣，好似就嚟想一拳打過我到。

我行過去，一手搭住佢膊頭。

「幫你搵到女神補習社啦」

佢一秒180度大轉變，伸個拳頭俾我

「deal」。





-

上到眼鏡誠屋企，就㩒鐘。

開門嘅依然係眼鏡誠嘅啊媽，我成日都喺度諗點解佢阿媽可以保養得咁好，成四十歲望上去都係得三十左右，仲要有長腿，一睇個樣就知係人妻。

「健仔，東仔你地到咗啦？入嚟先啦，誠仔係房啊」

「hi auntie」

一入到去，每次上眼鏡誠屋企，佢屋企都係咁乾淨，好似新居入夥一樣。而伯母就係個開放式廚房度切緊生果準備拎俾我哋。

有時都幾羨慕佢有一個咁好嘅家庭。





-

「喂死仔」

一入到去眼鏡誠間房，佢又係到玩CF，拎走佢個耳機先聽到我地講野。

「咦到啦」

「玩PS4啦」肥東已經開緊機。

於是，最後我地就坐咗係地下玩PS4。

伯母就拎咗盤生果俾我地。

玩咗幾鋪就已經覺得好無聊，機都爆曬，都唔知有冇好玩。





「屌，又無乜其他game，嚟嚟去去都係呢幾款。」我放低咗個

「玩戀愛game囉，乜乜做任務同埋靠你每個情景嘅選擇去追女仔，虛擬女友個啲，呢排幾hit」肥東一路揀緊食邊舊生果一路講

「咁毒」

「可以一試」眼鏡誠托一托眼鏡

估唔到，兩位dry到咁。

但點知玩玩下，又幾好玩。

「乜追女仔，咁煩」我話





「係咁架啦，啲女仔成日都唔嗲唔吊咁」肥東喺度呻

「咁你可以唔追架嘛，無人叫你自己跳落個氹到」我笑鳩佢

我地又開始係到互插。

「喂文青仔，有冇追過女仔先」肥東將目光轉移到眼鏡誠到。

「點會有啊佢個木頭，有我地點會唔知」我繼續望住熒幕打機

「有」佢好平靜咁答

我同肥東黎唔切問佢，佢就自己講話。

「鄭梓𤋮」

我沉默。

「啊健條女喎」肥東又抽水

「我前女」眼鏡誠坦白

原來有啲野，你寧願永遠埋在鼓裏，因為真相永遠都係咁殘酷。

我沉默。

「你個死仔，你都呃咗我地好耐吓喎」肥東繼續追問

「三個月前散」佢繼續面不改容

呢一句，好似一把刀咁樣插左落我個心度。

肥東都沉默。

「點解。」我望住佢

「無點解」佢依舊望住個熒幕。

我記得我講過，佢嘅唯一缺點就係薄情，真係無講錯。

-
原來有啲野，一講出口就會產生莫大嘅轉變。
原來有啲關係你以為好穩固，但係比任何野都要脆弱。係無形之中就會慢慢起咗變化。
-