昨夜星辰恰似你: 2.
2011年。
-「nono，他們叫我壞學生因為我功課不好成績不好又愛遲到三不五時大過小過還有一堆警告...」
耳邊一直徘徊住謝和弦嘅《壞學生 》，我簡直就係呢首歌活生生嘅例子。
突然feel到有人不斷拍我膞頭⋯
打開眼見到有兩隻眼珠望住我，少你啊媽嚇到我成個人彈咗起身。
「陳永健。」miss Cheung 咳咗幾聲
「sorry miss sorry miss」醒目如我當然即係撒冧架啦
經過長年累月嘅折磨同對持，miss已經徹徹底底咁放棄咗我。佢啤咗一眼然後示意叫我坐底。
「最衰就係你，阻人瞓教猶如殺人老豆」我一直啤坐我隔離嘅鄭梓𤋮
佢無視我，繼續寫默書簿目錄。
「喂，作為補償，你係咪要⋯」我講到一半佢就插嘴
「你唔好成日借我默書測驗俾你抄啦，自己做下會死架咩」鄭梓熙反咗個白眼。
「好，開始」
Miss一直讀啲水蛇春咁長嘅詩，望下周圍個個都低頭博命咁寫。
癡線，都唔明古代詩人係咪得閒無野做見到花草樹木陰晴圓缺乜乜物物都作一餐，簡直係折磨後人。
過咗陣，miss巡視完一個圈就返翻將老師椅低頭睇電腦。
然後鄭梓熙就移咗移張測驗卷，啱啱好係我嘅視線範圍内。
「快啲抄啦白癡仔，無下次」佢勁細聲，然後托住個頭望窗
嗯，一定會有一下次同下下下下一次。
佢叫鄭梓熙，高高瘦瘦，長馬尾平陰。做咗我兩年同桌，係一個典型學霸， 個名係就係中性咗少少，但係都幾靚女, 五官幾精緻，所以都收到幾多兵下，雖然佢唔認。佢屬於刀子口豆腐心個類人，所以呢年大大小小嘅測驗默書我都係靠佢。明明我同佢係兩個世界嘅人，但係唔知點解都幾傾得。
當我準備填最後一條mc嘅時候，感覺背後陰風陣陣，好似有股怨氣就嚟要爆咁。
我扭轉頭一睇
瀨野。
「陳永健，你真係乜都抄架喎，洗唔洗女朋友都抄翻嚟？」
講完miss就係我份卷上面用紅筆畫咗個紅雞蛋。
我望住隻紅雞蛋，無奈咁笑咗笑。
我叫陳永健，係老師眼中公認嘅「壞學生」。其實我唔壞，只不過係貪玩咗啲，咁翻學就係玩架啦，唔通日日坐係到係咁操卷咩。但係班訓導老師就成鬼日搵位入我波。
而當時嘅我並唔知道，當時老師嘅一句，會係好耐好耐以後以另一個方式，在另一個人口中講出嚟。
-
「你真係759架喎陳永健，點有人出貓出到咁明顯。」
講緊野嘅女仔叫黃思，係鄭梓𤋮最好嘅朋友，矮矮地微胖，係我印象入面佢一直係眉上瀏海短頭髮。同我一樣成績差又爛口，好有自已嘅一套，但係好臭串。根本就唔似一個女仔。
「收聲啦黃屍」
「乜你真係覺好開心咩？」
鄭梓熙突然望住我，佢嘅認真，另我有啲不知所措。
「唔啦，今次技術上有少少失誤。」
「唔好咁幼稚啦好唔好」
接下嚟嘅幾堂，鄭梓𤋮都無同我講過任何一句說話，即使我不斷用不同方法氹佢笑。
女人心啊，真係海底針。
我被人捉出貓係我嘅事，又唔會將佢牽涉在內。
有咩氣可生呢？
我望住書上面嘅男人，幫佢加佢幾筆，簡直係如虎添翼，即刻變到玉樹臨風英俊瀟灑。
「女人真係一種好奇怪嘅生物，你話係咪先？」
.
當時嘅我並唔知道，原來鍾意一個人，源於在意。
-