心的距離: 24. 轉折

傍晚五點半，我在觀塘的站頭等待上客。
天空泛黃，沒幾片雲彩，褐黃的陽光灑在地上，映照出樹葉的輪廓，時而秋風吹過，使剪影搖曳著。
面對空無一人的車廂，最好就是扭大喇叭聽音樂。
但正想這樣做之際，手機震了一下，螢幕亮起，顯示的是 Kathy 的 Whatsapp。
「你呢排都唔洗嚟接我啦，有幾單大 project 要跟......」
我拿起手機回道：「吓，咁你點？瞓公司？😲」
Kathy：「睇怕係......😩」
我：「做還做，都要抖吓，唔好捱病」
Kathy：「嗯，知道😊」
我：「如果 Weekend 得閒嘅，出嚟食餐飯？」




Kathy：「唔......都得嘅，到時再搵你」
我：「Okay，唔阻你做嘢啦，加油」
Kathy：「嗯，你都小心揸車」

回到香港後，她就比以前忙碌得多，我也不時沒有載她回家。
升了職，又挨近年尾，忙碌也是正常的，只是失卻如以往的親密，有點納悶。

忽然對講機「啲啲」的響起。
「......我路德會起步啦，基仔埋位。」
我按下對講機的按鈕說道：「收到。」




我隨即把布牌搞到「青山道」，再在牌堆中找到「青山道」﹑「九龍仔」，跟「九元」的膠牌。
好，要開始了，要習慣沒有她這位座上客的日子。

沒有她的日子，我也變得更勤力——以往朝八晚七的我，現在也變成朝七晚十了。
差一小時就變成 7-11 了。若不是十一點後的路線更複雜，我想也會繼續工作下去。

學發叔話齋，當彌補心靈空缺囉。

晚上十點半，如常地跟最後一位乘客找續後，把小巴泊在青山道站頭。
回到家，還是家徒四壁，我隨意地把東西拋下後就去梳洗。




梳洗過後，再完成煩人的家務，總算可以休息一下。
我坐在梳化上，如常地扭開電視，讓新聞報導成為背景音效。

電話又再震了起來，還是 Kathy 的 Whatsapp。
「頭先唔記得同你講」
我問：「講啲咩」
Kathy：「壞消息嚟」
神神秘秘的。
我：「講嚟聽吓」
Kathy：「公司決定咗唔請你，請另外一個人😓」
「係咪 Joseph？」我思前想後，直認就是他了。
Kathy：「好似係......但點解你會知係佢？」
「佢嗰時同我一齊 in，好多 idea，仲要唔係屎橋。唔係請我嘅話，咁一定係請佢😤」
Kathy：「講到自己好勁咁喎😏」
「我嗰時同佢一齊一唱一和，其他人一句聲都出唔到～」想到這裡，還是有點自鳴得意。




我續問：「係喎，咁得閒同我吹水嘅，放工啦？」
Kathy：「差唔多啦，做埋少少嘢就走」
我：「唔好做到咁夜啦，早啲休息」
Kathy 回道「你都係😁」，然後續說：「唔講住，執埋手尾先，bye n good nite👋」
我：「gd nite.👋」

就算嘴上說得多麼輕鬆，心裡還是不免感到失落。
雖說人大了，沒有兒時的稚氣和好高騖遠的夢想，但心底裡仍然有一個小小的理想。
我現在的理想，大概是不用為每日的生計而煩惱吧。
只是現實不會照料你的理想。
沒關係，我也該接受了。

「搖上車窗　轉鑰匙孔　等引擎熄火　世界難得安靜幾秒鐘
心裡面的鏡頭　突然特寫我　已經習慣多久　得過且過

曾經夢想　拯救宇宙　許多年以後　在電影院看　天災人禍
快毀滅的地球　總會出現英雄
不知不覺也欣然接受　那並不是我」

翌朝，如常回到站頭開工。
我一上車後就向對講機說著：「我有一個對我嚟講係壞消息，但對你哋嚟講可能係好消息嘅消息，想唔想聽」
發叔聽到就說：「嘩，做乜朝早流流就講啲咁嘅嘢......我老人家頂唔緊。」
「對我哋嚟講係好消息？咁就要聽下啦！」同線的康哥看來十分期待。
我緩緩說道：「我會繼續揸小巴，同你哋一齊，因為之前見工間公司唔請我。」
康哥聽畢，就說：「咁就好囉，你都唔知，成日有女乘客同我講話有個新嚟嘅靚仔司機，好好人，好想瘋狂坐佢車咁話喎。」
我立即笑著回應：「吓，唔係掛，咁大鑊！」
發叔亦不甘示弱，搶著說道：「好叻咩，想當年，啲女仔都話我似周潤發啦，仲爭住坐我車呀！」
我說：「得啦得啦，三十年前呀嘛，我知，但係而家到你埋位啦，發叔。」
對講機中傳來陣陣笑聲。





有人說，改變不了就接受它吧。
對的，我現在才知原來這裡也挺好玩的。