我係死神，專門審判自殺嘅人(離魂記‧前傳): 18
我望住床上熟睡嘅阿敏最後一眼，就默默地離開。
‧‧‧
「死神‧‧‧？」阿敏迷濛地打開眼睛、起身，望住床邊，就好似發咗個好長遠嘅夢。
我好快就返到去莫沉言身邊，而佢都一如所料被我嘅憑空消失震驚到。
「你‧‧‧你到底係‧‧‧‧‧‧」佢望住我，想接近我但同時回避著我。
「我係‧‧‧‧‧‧」我望住莫沉言，說：「張嵐。」
頭一次。
我冇對住外人自稱，我係死神。
因為我已經尋回我嘅名字。
我就係，令阿敏逆天嘅嗰個人。
「我就知道你係佢‧‧‧我就知道‧‧‧‧‧‧你係張嵐！」莫沉言最終，投向我懷抱之中。
「對唔住。」我只淡淡地道出一句。
「點解‧‧‧點解你要突然走咗‧‧‧‧‧‧」
「因為，我已經搵到自己嘅意義。」
嗰一整晚，我陪莫沉言坐咗喺天台上面，望住逐漸澄明嘅夜空。
「所以話‧‧‧你成為咗死神？」佢望住我。
「嗯。」我望住天上嘅圓月：「或者，喺地獄工作咗太多年，令我已經遺忘咗依一切，時間總係令人麻目，時間‧‧‧總係沖淡人嘅回憶。」
「你所講嘅意義‧‧‧到底係咩？」
「以自殺，換取另一個性命廷續落去。」我講埋落去：「係一個女仔，不過佢聽晚之後‧‧‧生命亦都會終結。」
「既然都拯救過一次，點解總要睇住佢死？」
「我生前同死後嘅身份唔同，始終要遵守天職。」
「佢對你嚟講‧‧‧‧‧‧有特別意義？」莫沉言望住我。
「可能？我特別鐘意望到佢笑，一個樂天嘅少艾喺你最絕望個陣走入你世界，然後你又走番入佢世界‧‧‧到個一刻，你會覺得成個世界得你兩個‧‧‧‧‧‧生同死並唔係最重要。」我對望番莫沉言：「我唔知呢種係咪叫愛？只係，我覺自己無咗條命去守護佢，都在所不惜。」
莫沉言點點頭，指住個天：「你記唔記得，自己想去一個點嘅地方？」
「記得。一片草地，有一顆大樹，樹同草都係潔白色嘅地方。」我答。
「仲有，你講過要喺個到放風箏同汽球。」莫沉言淺淺一笑。
我啪一下手指，隨即憑空出現一個汽球：「捉住。」我望住莫沉言。
莫沉言如我所說，捉住個汽球，但佢似乎唔明當中嘅意義。
「夕陽來臨，我就要離開。」我說。
「‧‧‧」莫沉言望住我，繼而望住夕陽不答。
我望住遙遠嘅山後，逐漸上升嘅夕陽，天空彷彿破曉。
「答應我，」我望住絢麗嘅晨光：「成為最幸福嘅女人。」
啪
莫沉言一另轉頭，就只有消失而去嘅身影。
同時，汽球從佢手上輕輕脫手、飄走、向上、離去。
夕陽初升之時，既金黃又短暫嘅光輝散射到墓地之上。
我拎住一束白花孤身一人前往到自己墓碑之前，望住墓碑上嘅自己，感覺好奇妙。
良久，我獻上花束：「張嵐，如果係你，你會點做？」
生前，我為咗救佢而自殺。
死後，我因為職責要親手收歸佢性命。
最後，我不自覺地躺坐喺自己墓碑之上。
我一直苦思好耐，矛盾喺我內心不斷糾纏。
望一望手錶，只要時針搭向一點、分針搭向二十四分、秒針搭向四十一秒，阿敏嘅性就會結束，佢嘅靈魂會跟住我嘅擺渡而前進入地獄。
我應該‧‧‧
遵守天職？定還是幫佢逆命‧‧‧‧‧‧
半夜十一時正。
阿敏望住鏡前嘅自己，已經換好平時優閒嘅衣著，對住塊鏡練習住一陣同死神見番要講啲咩：
「死神，HI‧‧‧！」
「好耐無見喇喎～～」
「我唔搵你‧‧‧你真係唔會搵番我架喎？」
阿敏練嚟練去都係搵唔到一個完美嘅答案，所以佢就打電話俾陳文輝，不過信訊被飛去留言信箱之中。
「喂‧‧‧文輝？我會早啲到啊，一陣見啦。」
阿敏離開屋企前，仲望一望鏡前嘅自己一眼。
深一深呼吸，確信自己做得到。
殊不知，佢並唔知道，前方等待住自己嘅‧‧‧‧‧‧係一個死亡謊言。
十二時半，月色正濃得迷人。
如同被月光底下皮膚通透潔白嘅阿敏一樣，光芒亦無被烏雲所掩，如同阿敏今次想要喺死神面前敞開心底。
「阿敏‧‧‧！」陳文輝啱啱趕過嚟，望住企喺教堂門外等待住嘅佢。
「死神呢？」阿敏一見到陳文輝出現，就問。
「‧‧‧」陳文輝見佢一嚟就問死神喺邊，心中一沉：「佢‧‧‧佢好快會到，入去坐下先。」
「咁夜‧‧‧得咩？」
「係‧‧‧」陳文輝望住佢、點頭。
佢緊握住拳頭，知道自己即將要做一件上帝都原諒唔到嘅事。
因此，佢都預備好‧‧‧
就連自己都會殉情。
「喔，好啊。」阿敏輕輕推門入去，走入教堂裡面。
陳文輝望住阿敏曼妙嘅背影，走上前：「我真係好鐘意你‧‧‧‧‧‧」
「吓‧‧‧？」阿敏另轉頭望佢。
「應承我啊‧‧‧」陳文輝迫不及待從自己黑色書包拎出一束玫瑰花：「我會好好咁對你，認真架！」
「‧‧‧」
「阿敏，我真係好鐘意你啊，由我見到你第一眼開始，我就真係好鐘意你啊！！」陳文輝一步一步迫前。
「喂‧‧‧你冷靜啲啊輝‧‧‧！」阿敏雙手伸前阻擋住佢。
「咁你答應我‧‧‧做我女朋友‧‧‧‧‧‧」
阿敏斜斜望住佢：「死神呢‧‧‧？」
「唔好再提乜嘢死神啦！！！」陳文輝捉住阿敏隻手：「根本就冇乜嘢死神！！！我一直跟住喺你背後、一直秘密保護住你、看守住你‧‧‧我咪你嘅死神囉！阿敏呀‧‧‧‧‧‧點解你唔可以鐘意我啊‧‧‧！？」
「因為我唔鐘意你囉‧‧‧！阿輝啊，你唔好咁痴線啦。」阿敏不斷退後，意識到對方嘅危險。
「呀！！！！！」陳文輝隨即喺背包裡面拎出一塊包含哥羅芳嘅毛巾，強行掩住阿敏嘅口鼻。
受哥羅芳影響嘅阿敏意識立即變得軟垂，陳文輝把握機會拎出一條粗繩將阿敏綁住喺一張椅子上，然後慢慢咁輕撫佢臉頰‧‧‧‧‧‧
同一時間，我已經做好覺悟。
喺漆黑嘅孤路上面，獨自前進往教堂嘅方向。
既然係上一輩自己留低落嚟嘅手尾，就由自己親自去收拾。
「死神大人‧‧‧你真係要過去？」跟喺我身後嘅馬面追問。
我望住前方，一直行一直行：「既然我瞬移唔到去阿敏身邊‧‧‧即係，佢喺教堂之類嘅位置，佢最常去嘅得一間。」
「我唔係指依樣‧‧‧而係，你一入教堂就會法力盡失，受聖十字架影響‧‧‧入到去你只會變到同普通人一樣、或者更差！唔再係死神！」
「你做咗陰差咁耐，想唔想升職？」我淺淡一笑，說：「機會嚟。」
終於，我嚟到教堂門前。
望一望手錶，不慢亦不遲。
「死神大人！」馬面最後一次呼叫住我。
我停一停，馬面‧‧‧
希望，你知道如今站在你面前嘅唔再係死神。
而係張嵐。
我推開教堂大門，步入聖堂之中。
教堂依附喺牆上嘅周邊十字架隨即格格作響，微微抖震著，同時我感受到身體變得虛弱，法力亦都開始消散‧‧‧‧‧‧
正撫摸住阿敏臉頰，不斷講「我真係好愛你‧‧‧‧‧‧」嘅陳文輝猛然回頭，見到我之後就即刻拎把利刀出嚟！
「你係邊個！！走！！」
「死神‧‧‧」神志迷糊嘅阿敏雙眼半開半合地望住我。
「你‧‧‧你‧‧‧‧‧‧你就係死神‧‧‧！！？」陳文輝眼筋暴露。
由於我處身喺教堂之中，如今我身軀可以被凡人看見。牆上嘅十字架同講台上嘅大型十字架都因而隱隱作動，彷似快要跌下一樣。
「敏，我本來應該嚟收你靈魂‧‧‧‧‧‧」我望一望手錶，苦澀地抿嘴：「可惜，我喺更早之前，得知咗一個真相。」
「‧‧‧」阿敏望住我。
「唔好咁多廢話啊！你哋全部啲人都係無本心‧‧‧靠個樣‧‧‧‧‧‧根本唔似得我咁用個心真正對阿敏好‧‧‧垃圾，廢話！！！」陳文輝理智已經全斷，衝向我面前。
我立即反應過嚟，捉住佢想刺入我腹部嘅利刀，右手再揮出橫拳，一拳打落佢臉頰上！！！陳文輝倒地之前更想向我踢出一腳，但都係被我以膝擊擋住。
陳文輝再接再厲向我狂刀亂揮，原本我尚算抵擋得住，可惜周邊十字架聖力開始過大侵蝕我意志，一不留神就被佢橫刀一揮，臉頰多咗條深長血痕‧‧‧‧‧‧
「‧‧‧」傷口冇立即治癒。
我再下一城，想要盡快解決依一切，不過陳文輝居然跑到阿敏身後，用把利刀架住喺佢頸上，威脅道：「你唔好講嚟啊‧‧‧！！！」
「‧‧‧你咁係愛佢？」我反問一句。
陳文輝稍稍回神，立即對阿敏道歉：「阿‧‧‧阿敏對唔住啊，我唔係咁嫁！！」
阿敏趁佢放下戒備，立即咬住陳文輝佢手掌再用力向後一撞，令陳文輝成個人退後到牆上，間接整到原本喺牆上已經搖搖欲墜嘅大型十字架跌下到地上，搖搖晃晃更加危險‧‧‧‧‧‧
見情況如此，陳文輝就想要馬上殺死阿敏，再準備殉情。我即刻上前推走陳文輝到一張放滿燈油嘅檯上，「冰」一聲，火油隨即散播燃燒住成張大檯！
「啊呀！！」陳文輝背脊亦因此被火焰燃燒。
不過因為燈油之中含有聖油，相比起陳文輝所受嘅痛苦我更為劇痛，佢就好似失去理智嘅野獸一般發狂將我推走，然後再用利刀喺我身上亂刺三刀，最後迫到我去牆身之上。
正好‧‧‧我背貼住牆身上嘅十字架，皮膚一接觸到聖十字架後就有如被地獄赤火燃燒一樣，燒得肉露骨現‧‧‧‧‧‧
「去死啦去死啦去死啊！！！！！」陳文輝用力怒喊。
阿敏望住我只能叫住我個名不斷哭泣大喊，試圖想要逃出粗繩嘅束縛。而我眼角‧‧‧正正見到‧‧‧‧‧‧剛才被撞跌嘅大型十字架‧‧‧已經被大火完全吞噬，搖擺不定想要向前傾跌到阿敏身上‧‧‧‧‧‧
「敏‧‧‧」望到依一幕嘅我，全身嚟咗一股不知名嘅力氣。
我用盡最後一分力氣去推開陳文輝‧‧‧再拔出插喺我腹部嘅利刀，捉住陳文輝左手用力一刺！將佢隻手連住教堂嘅木制地板插入連住。
神志迷糊散亂得幾乎死去嘅我‧‧‧留意到阿敏身後嘅大型十字架即將要跌落壓住佢‧‧‧我及時飛撲上前用雙手將佢連同椅子推開到另一邊‧‧‧‧‧‧！
個瞬間，喺我身上燃燒嘅火不再痛、被十字架灼毀嘅皮膚不再熱，阿敏亦係頭一次望住‧‧‧‧‧‧溫柔微笑嘅我。
=x-large「砰──！」整個被聖火燃燒嘅大型十字架壓到我身上。
「死神‧‧‧‧‧‧死神啊！！！」阿敏終於解開粗繩束縛，哭喊住咁爬到去我面前捉住我隻手‧‧‧想拉我出去。
我全身‧‧‧
已經毫無知覺。
死前嘅走馬燈不斷喺我腦中放映‧‧‧
‧‧‧內容同畫面，都有住阿敏嘅存在。
「死神我哋一齊走啦！！！！」一連串淚水從阿敏悲傷嘅臉上無聲地流下來，佢冇一點兒嘅哭聲，只任憑眼淚不停地往下流，堅強地想要拉住被十字架壓住嘅我離開‧‧‧‧‧‧
「對唔住呀死神！我以後唔咁任性啦！！」阿敏眼淚正崩潰著，無能為力地落下、拉住我左手：「你唔好走‧‧‧唔好走‧‧‧‧‧‧」
因為我死神身份嘅存在‧‧‧而令到你逆天不死‧‧‧‧‧‧
如今‧‧‧
我嘅離去‧‧‧就能夠令你生命重拾正軌‧‧‧‧‧
用我個心，好好生存落去‧‧‧
靈魂意志崩滅之前，我用最後一口氣‧‧‧同阿敏講出自己嘅身份：「我係張嵐‧‧‧專門拯救自殺‧‧‧‧‧‧嘅人‧‧‧。」
‧ ‧ ‧ ‧ ‧ ‧
‧ ‧ ‧
‧
你嘅生存‧‧‧
就係我嘅意義。
教堂火光熊熊。
警車到嚟嘅時候已經將阿敏帶走，並以殺人未遂罪將陳文輝拘捕。
而死神，亦都喺十字架下化為一絲煙霧，於塵世中消逝。
經過依件事後，阿敏每日都喺屋企以淚洗臉，佢家人以為佢係太驚先咁，殊不知其實佢嘅淚‧‧‧係為著某人而流。
到後嚟三、四日後，佢嘅眼睛都幾乎乾哂。
終於，阿敏佢冇再喊。
而係，喺間房封閉自我一段時間。
「阿敏‧‧‧出嚟食啲嘢？」佢母親如常地敲一敲佢門，說。
阿敏冇回應，只係低住頭抱雙膝。
唔想見到任何人。
而佢腦內不斷回想嘅，只係同死神過往嘅短暫相處回憶。良久‧‧‧‧‧‧阿敏拎起好耐以前，同死神喺南生圍合照嘅一幅相。
相入面冇佢個人，因為相機影唔到身為死神嘅佢，所以成幅相睇落只係得阿敏自己一個，但喺阿敏眼裡面‧‧‧‧‧‧
佢身後嗰個位，永遠企住一個人。
每每一望到幅相、同佢傾計嘅回憶，阿敏都會自然地淡淡一笑，但悲痛好快又再勾入佢腦內，就係咁‧‧‧過咗成個七月。
炎熱嘅夏季，亦漸轉枯燥嘅秋天。