[成長系列] 鄰舍的哥哥: 第一章

星期日, 一早屋企個門鐘就響到鬼殺咁嘈, 無幾耐, 出便呀爸同呀媽就好似同緊人地傾緊計咁。
 
邊鬼個黎呀? 煩到死, 我朦住對眼咁起身開住房門出去睇吓, 有條仔正指住我咁嗌住,「咦, 呢個係洛儀定係洛欣呀?」 同一時間, 家姐亦響房度行緊出黎嗌住, 「廣哥? 喂, 好耐無見喎, 做咩一早你就上黎我地屋企度呀?」
 
呢個廣哥, 係我地以前細細個果陣, 住響隔離屋嘅鄰舍個仔, 因為呀爸以前成日都過去隔離屋度打麻雀, 所以我地兩姊妹亦都成日跟埋入去佢地屋度玩, 大隻廣雖然年紀比我地兩姊妹大少少, 但諗番起以前佢成日都比我地兩個玩到佢殘就真係好笑。
 
最記得有次, 我地兩姊妹響佢間房度夾手夾腳玩除佢條褲, 條友跟住比我地攪到佢喊住咁話比佢老豆聽, 最後, 我地兩姊妹當然就梗係比我地個老豆鬧餐死啦, 果次, 亦係我地兩姊妹第一次真正親眼見到男仔果條啫啫會係點嘅樣, 不過, 果陣時仲細, 而且咩都唔識, 之後我地好快又好似無野咁再繼續玩埋一齊。
 




我大聲嗌住, 「大隻廣!」 大隻廣摸住個頭咁同我地講, 「哈哈, 咩妳地兩姊妹個樣都仲係咁無咩點變咁嘅!」 家姐跟住問, 「喂, 大隻廣, 咩事咁錯盪晨咁早就上黎我地呢度呀?」 呀媽同我地講, 「呀廣佢地屋企下星期就要移民去澳洲, 所以呀何伯特登叫佢攞的野上黎比我地同順便同我地講聲佢地要走啫!」
 
呢朝早, 我地成家人就同大隻廣去左茶樓度飲茶, 飲完茶後, 家姐因為約左人要走先, 而呀爸呀媽又有地方要去, 但就剩番我一個人仲未有著落, 「喂大隻廣, 而家你個 look 都好掂吓咁喎, 平時緊係都溝埋唔少女啦?」
 
大隻廣即時禮尚往來, 「呀欣姐妳都好一表人材啫, 睇怕平時妳都收埋唔少兵啦!」 「麻麻地咁啦, 見你都叫做有少少型, 嗱, 欣姐今日又無咩著落, 粗粗地咁就比你今日陪吓欣姐出去玩番一日咁啦!」 「超, 妳無人約就無人約啦, 講到自己咁巴屎閉咁!」
 
同大隻廣響街度盪住, 我地一邊行住, 一邊傾番以前細個的野, 我問住大隻廣, 「喂, 呢條路你仲記唔記得呀? 果陣時你咪試過要湊我放學經過呢度嘅, 跟住突然有隻死人狗響度仲鬼死咁惡咁, 你見到咁即時就拖住我咁擋住響我嘅前面, 但果陣時我見你好似仲驚過我咁, 哈哈, 真係 (火羅) 爆!」
 
「超, 我果陣係驚妳會有的咩事, 跟住番到去會比妳屋企人鬧咋!」 前面有隻好鬼得意嘅芝娃娃狗響前面, 「廣哥, 你睇果隻狗幾咁兇殘, 喂, 我而家好驚呀, 咁你仲唔快的幫我頂住佢, 如果唔係有咩事我老豆而家都會鬧你架!」
 




呀廣即時同我玩住, 跟住一手就拖住我隻手, 「欣妹, 唔使驚, 有廣哥響度, 咁妳就企響我嘅後面跟住, 一切就由廣哥黎幫妳頂住佢!」