我們的紀念冊: 回憶的呼喚

承兩位姨姨所言，大個左嘅我的確成為左個肥妹。嗯⋯⋯又唔算真係好肥，就係身型比較橫。作為一個全職廢青，零食係生活中嘅必需品。自小就熱愛寫作嘅我，喜歡由自身嘅經歷中尋找寫作嘅題材。所以，我養成左一個邊食零食邊翻相簿嘅習慣。

「 日見，你睇緊乜嘢？」暮晨將手放入薯片嘅包裝袋。

「 我整理緊我嘅即影即有。雖然影得特別唔好，但呢啲都係我珍貴嘅回憶黎。」我揚掦手中嘅相簿。

「 係前年一家人去旅行嘅相，好懷念。」暮晨失神地望住其中一張即影即有。

呢張係我地一家四口嘅大頭照。背景係台北淡水情人橋。當時大風凜冽，揸機嘅我連自己嘅頭髮都顧唔住，好隨意地按下快門。結果，雖然好幸運地拍下四個人嘅臉孔，但我頭上嘅劉海卻凌亂不堪。





「 你嘅自拍技術過左一年都仲係咁差。」暮晨向我微微一笑。

「 我仲好記得當時我地兩個係誠品同爸爸媽媽失散左。」我不禁竊笑。

「 係，都怪你，掛住去搵《小王子》搞到要爸爸媽媽擔心。」暮晨向我投以責怪嘅眼神。

「 雖然我地兩個已經大個，但係爸爸媽媽嘅心目中，我地永遠都係長唔大嘅孩子。」我感慨地低下頭。

「 呢次係我地咁多年黎第一次一家四口去旅行，係一個值得懷念嘅時刻。」暮晨拍拍我嘅膊頭以示安慰。





「 講個秘密你聽：其實係前往機場嘅途中，我忍唔住係度喊。好彩媽媽見唔到，唔係佢實以為我唔知發生咩事。」我尷尬地望向別處。

「 搞咩阿你？」

「 可能係第一次一家人去旅行，所以特別唔捨得共同渡過嘅每一刻。開心又好，唔開心都好，都係呢個旅程重要嘅回憶。我好怕一旦離開左個度，時間會磨滅呢份記憶。」我唔好意思地收起相簿。

「 日見，我從來都唔知原來個次旅行對你黎講有咁特別嘅意義。家姐應承你，我地遲啲會去更加多嘅旅行，等你可以影更加多嘅相。」暮晨緊緊地攬住我。

其實係我心目中，旅行嘅目的地並唔重要，重要嘅係旅行嘅目的同同行嘅人。就算唔可以歐遊，一齊係大尾督郊遊都已經係一份值得紀念嘅回憶。





「 暮晨，你今日唔係約左男朋友咩？再唔岀去就遲到啦。」我扯一扯暮晨嘅裙擺。

「 我約左羽安係屋企樓下等，我地遲啲再傾。」暮晨轉身向我揮揮手。

顧羽安，係暮晨拍拖半年嘅男朋友。對於呢個男仔，我倒係冇太大嘅好感。作為一個妹妹，我對暮晨嘅保護慾特別強。可能係因為屋企冇阿哥，所以保護家姐嘅任務就落左去細妹度。聽落好似好奇怪，但呢個正正係我學習跆拳道嘅原因。

「 小心安全，有咩事就打俾我。」 暮晨離開前，我再三叮囑佢千其唔可以夜翻。

為唔爭氣嘅姐姐費心，係作為妹妹與生俱來嘅責任。