[真人真事][校園][純愛]《最陌生的人，就是曾經最熟悉的人》: 第七十六章(終章)

日子一日一日咁樣過,
我嘅生活都冇乜點變
都仲係一個文員仔
反而我聽Candice講,
呀琳依家好似係以教小朋友彈琴作為職業
一嚟工作壓力唔大
二嚟又搵到食
三嚟佢又鍾意小朋友
加上啲時間又好用
當然啦,




我都仲係冇見過呀琳
我知你地會問,
你去搵Candice幫手咪得囉
叫佢Candice約呀琳出街,
之後再問Candice去邊度
咁我咪可以出街偷望佢
但呢啲野實在唔知點樣同Candice開口
我驚佢當左我係變態佬
同埋,
我唔想俾佢知道,




其實我對呀琳嘅感覺一直都冇變
我依家托佢幫我送禮物俾呀琳,
可能純粹係朋友上嘅行為
係咪先
朋友之間送禮物好正常丫
但係如果我話我好想見到呀琳,
即使係偷望都得,
咁Candice實知咩事啦
正如我之前所講,
每個人心目中,




都有啲秘密係唔想同人分享
咁我好想見到呀琳,
除左我真係好掛住佢之外,
其實仲有第二個原因
我唔知我依家仲係鍾意緊佢
定係習慣鍾意左佢
咩叫習慣鍾意左佢
即係你自己以為自己仲係鍾意佢,
但其實可能係鍾意緊回憶中嘅佢
又或者可能係,
自己以為既然之前鍾意佢,
咁我依家都應該仲係鍾意佢啫
咁樣諗好正常,
但講真,
其實可能自己已經對佢冇左感覺




仲係咁眷戀,
可能只係因為得唔到
我唔知我個情況係點,
我亦都唔想我係習慣鍾意緊佢
而唔係真係鍾意佢,
我唔想咁樣俾一個人拖住走
我可以肯定以前嘅我係鍾意佢,
但依家真係隔左太耐,
我真係唔肯定我仲係咪鍾意佢
所以我好想見到佢
見到佢嘅時候,
我個心仲有冇嗰種心如鹿撞嘅感覺
如果有的話,
咁我就係仲係鍾意佢
冇的話,




其實只係我一直以嚟嘅錯覺
我已經唔再鍾意佢
只係我覺得我仲係鍾意佢,
先至鍾意佢
所以我一定要見到佢,
去引證我到底喺邊樣.

今年二月,
話說我要幫個fd去信和睇啲野
點解無啦啦幫佢睇
因為我嗰陣咁啱喺信和
喺信和地底睇緊cd,
跟住我個fd問我喺邊度
我就如實答佢喺信和
之後佢就叫我幫佢睇啲野




好似係模型嗰啲野
但係嗰間舖頭喺信和樓上,
所以我要喺地底上返嚟地下嗰度搭𨋢上去樓上
當時係二月,
都仲係幾凍
咁我就照舊戴左呀琳織俾我嗰條頸巾
我喺度等𨋢嗰陣,
見到有一男一女,
佢地傾得好開心
笑容滿面咁樣喺近信和搭𨋢嗰度嗰間舖頭行出嚟
我冇記錯好似係賣錶嘅,
我望住個女仔,
呢個女仔個樣貌對我嚟講係既熟悉又陌生
熟悉嘅原因,
係因為我同佢以前有好多經歷




都唔知望過幾多次,
陌生嘅原因,
係因為我太耐冇面對面咁樣見過
最多只係喺IG嗰度見
至於個男仔,
其實我係唔識,
但點解會認得佢
係因為我每次睇嗰個女仔嘅ig嗰陣,
身邊總有呢個男仔喺度
睇得多,
自然認到佢個樣
我見到個女仔,
個心仲有心如鹿撞嘅感覺
卜卜卜卜咁跳,
突然之間冇晒其他官感
我淨係企喺到望住佢
其實,
係呢一日來臨之前,
我喺腦海入面預演過好多次
當我有一日,
可以見返眼前呢個女仔嗰陣,
我應該要點樣做
我一得閒就會諗,
因為其實我係隨時預備會見到佢
我諗左好多應對方法當我見到嗰陣
好唔好試下大方啲
主動同佢打招呼,
但係萬一如果佢唔鍾意嘅話,
我咪做錯左
定係好似以前咁樣,
直行直過就算,
但係咁樣我又唔甘心
我都唔知應該點樣做,
但係,
原來當我見到眼前呢個女仔嗰陣
我所謂所謂嘅應對方法係冇用
因為我淨係識眼定定咁望住佢,
跟住佢feel到有人係咁望住佢,
佢就望返我轉頭
我同佢終於再一次有眼神接觸
對上一次起碼成十年前,
十年後再望佢
成熟左,
冇左我印象中嘅稚氣
亦都高左,
身型冇乜點變
當然仲係一樣咁靚,
笑容依然係芳華絕代
佢望住我,
有一刻閃出一個好驚訝嘅樣
我唔知係咪見到我戴住一條頸巾
但跟住好快就修正返,
我嘅視線停留喺佢度
我要盡力望住佢,
記住佢個樣
因為唔知仲有冇下一次
佢就望住前面,
咁大家去過信和都知,
你夜晚要喺信和行返出去街道,
基本上你一定會塞車
慢慢咁樣行出去,
因為嗰度好逼
咁我本身排緊隊搭𨋢,
所以就聽到嗰對男女嘅對話
男:「你識嗰個男仔架
我見佢係咁望住你 」
女:「唔識架 」
男:「咁又係,
我女朋友咁靚女
係男人都望啦 」
女:「口花啦你 」
我一句聲都冇出過,
一路望住佢個背影,
直至個女仔喺我視線範圍消失,
你問我有咩感覺
咁我梗係唔開心啦
當你最重視嘅嗰個人喺你面前講唔識你,
我相信冇一個人係會覺得冇野
你日日夜夜都諗住嘅嗰個人,
原來係人地眼中,
你地從來冇認識過
你咁留戀嘅回憶,
喺人地心目中已經唔記得晒
根本就唔會當係啲乜
你問我,
有冇怪過個女仔咁樣講
坦白講真係冇
鬼叫係我當初辜負左人先,
我嘅愛情觀就係,
當真係鍾意左一個人
我就唔會怪佢,
佢講乜野,做乜野都好,
我都覺得只係我問題
事實上今次個結果真係我一手造成
各位巴打絲打,
做乜野都有佢嘅代價,
所以真係要諗清楚先好做
如果當初我選擇第二個方法,
今日喺佢隔離嘅,
會唔會係我呢
定係我地好快就會因為其他問題而散,
到最後都好似今日咁樣
大家做左陌路人,
我唔知道
每個人總會有啲遺憾,
成日都會諗,
如果可以時光倒流,
俾多一次機會我
就會修正心入面最大嘅遺憾
我都唔例外,
如果可以揀多次,
當時我一定會咁樣做

呀琳:「你真係好蠢呀,
我鍾意你呀,
我想同你拍拖呀,
我好想同你渡過中五,會考,高考,大學,
仲有大學之後嘅日子,
咁樣你明唔明呀?」
之後呀琳攬住左我,

呢個時候,
我一定唔會好似原本咁講
「我地之間係咪有啲誤會呀?」

我一定會同佢講
:「明呀,
其實我都好鍾意你呀
由初中已經鍾意到你依家 」
之後我就會攬住佢,
用一個吻表達我嘅心意
但係,
時間係唔會咁樣做
佢唔會聽到你嘅控訴,
無論你講乜野,
佢都唔會返轉頭,
淨係一路向前走
就好似我今日見到嘅嗰個女仔咁樣.

跟住我成日發同一個夢
夢入面,
唔知點解我屋企有一個琴
同埋有一個類似係表弟定唔知係堂弟嘅細路仔喺度
咁呀琳就喺度教佢彈琴,
當呀琳上完堂之後,
我嗰個唔知係堂弟定表弟就俾左一包紙包檸檬茶呀琳
呢個時候,
我就攞住一罐可樂行出嚟
就話,
我:「呢個姐姐鐘意飲可樂多啲 」
跟住呀琳就擰轉面望住我,
個樣好驚訝
熱淚盈眶,
跟住我再同佢講:「對唔住呀
其實你一直以嚟唔係單戀
我嗰陣其實都係鍾意你
你冇feel錯,
只係我懦弱
唔知點樣面對long d,
又唔想拖住你
所以先同你講大話,
話我唔鍾意你 」
呢個時候,
呀琳啲眼淚已經停唔到
呀琳:「衰人
搞到我咁唔開心
我要你陪罪 」
我:「乜都肯陪 」
呀琳:「以後唔準再走 」
我:「你話點就點
唔會再錯過你 」
之後呀琳再用我個whatsapp錄音俾Candice,
話俾佢聽我地終於喺埋一齊
點解我會咁清楚夢入面嘅情節
因為我成日發呢個夢
但係每一次醒嗰陣,
望住我枕頭隔離係冇人
再諗返起原來只係發夢
嗰下我會覺得好空虛.

既然佢依家話唔識我,
咁我都唔可以光明正大咁樣關心佢嘅近況
我再一次登入Angela Wong個面書用戶
好似當年咁樣
登入後,
先撳右上角嘅收件匣訊息,
之後見到最近聯絡嘅人,
亦即係我想搵嘅人
再撳佢個名,
就入左我同佢嘅inbox對話視窗
Angela Wong:「近來好嗎 」
呀琳:「好呀
你呢 」
Angela Wong:「唔錯呀
你感情生活好似好穩定
見你ig成日放閃 」
呀琳:「OK啦
依家籌備緊婚禮呀
今年十一月結婚 」
Angela Wong:「恭喜你呀
請唔請我去呀 」
呀琳:「你肯到我一定請 」
Angela Wong:「好 」
呀琳:「你又點呀
咁靚女應該有拖拍啦 」
Angela Wong:「冇呀
仲等緊一個人
我始終放唔低佢 」
呀琳:「祝你等到你心入面嗰個人啦,
得嘅話記住同我講 」
Angela Wong:「好 」
其實我放唔低嘅人,
咪就係你囉.