[真人真事][校園][純愛]《最陌生的人，就是曾經最熟悉的人》: 第六十六章
聖誕節嗰邊就放假,
咁我就順理成章
返返嚟香港啦
一落到機場,
始終都係呢種氣味最啱我
周圍地方好有熟悉感
果然,
我最習慣嘅都係香港
咁我一落機就即刻返屋企,
始終都攰架嘛
費事周圍行,
加上我本來就係毒勁
唔多鍾意周圍行,
所以就搭機場巴士返屋企
返到屋企都係嗰啲啦,
老豆老媽子好開心
大家明架啦
當你去完第二度,
再瞓返自己張床嗰陣,
你就會明白
自己張床真係最舒服
部電腦亦都係
都係屋企嗰部順手啲
睇下有咩片可以打丁先
始終係嗰邊有姑姐喺度
有時唔做得呢啲野丫嘛
都係喺屋企做最爽
其實今次返嚟,
我有一個目的
唔知大家仲記唔記得,
話說喺我中四嘅散學禮
Candice幫我同呀琳影左一張合照
全身相嚟嘅,
點解無啦啦講起呢張相呢
事關小弟對呀琳嘅印象真係有少少模糊
我真係太耐冇見過佢正面
如果你叫我形容,
我都真係唔可以好仔細咁形容出嚟
唔係話我唔記得,
而係唔知各位有冇一種感覺
嗰種感覺就係,
當你太耐冇見一個人
我所指嘅太耐,
你當係半年或以上啦
你腦海入面嘅佢,
真係會對佢個樣有少少陌生
咁當然啦,
如果喺街撞到的話,
我一定認得佢啦
甚至我淨係見到個背影都可以認得佢
畢竟我望左四五年
冇可能唔認得,
定其實係我潛意識想唔記得啲唔開心嘅回憶,
所以我好想,
將Candice幫我影嗰張相
自己keep一張,
你當我屎忽痕
無啦啦想見到佢個樣嗰陣,
都可以隨時拎出嚟丫
我依家咁樣,
真係想見佢個樣嗰陣,
都見唔到
我已經唔係想見佢真人,
都係想要一張相啫
呢個要求唔算好過分丫.
之後Candice知我返到嚟香港
所以就約左我出嚟食飯
Candice:「咁耐冇見都係咁樣喎
」我:「你想我變到點樣先得架
」Candice:「我以為你會高啲
皮膚黑啲丫嘛
」我:「你都傻嘅
我喺嗰邊都唔做運動嘅
又點會曬黑同埋增高
」Candice:「唔好咁死懶啦
」我:「攰丫嘛大佬
你都唔知返學幾辛苦
」Candice:「唔好講呢啲啦
係喇
老實答我,
你想唔想見到呀琳呀
」我:「唔啦
費事自己見到嗰陣,
唔知講乜好
咁樣盞令我唔願走,
佢呢排點呀
」Candice:「升左中六之後,
讀書風氣比以前更加濃厚
好chur呀
」我:「聽你講好似好辛苦
」Candice:「係架
」我:「學校有冇點變呀
」Candice:「冇,
都係咁樣
」我:「呀琳有冇拖拍
」Candice:「講起呢單野就有啲野講
」我:「頂你
喺msn唔講
」Candice:「我知你返嚟丫嘛
同埋我覺得喺msn講冇當面講唔方便
打字都係懶
」我:「挑
咁究竟係咩事呢
」Candice:「話說今年中六嗰陣,
我地轉左班主任丫嘛
呢個班主任就勤力啲嘅
我地坐嘅位係佢諗
唔似中四中五嗰個,
由我地自己坐
呀琳就同左另一個原校上嚟嘅男仔坐(Candice有直接開名)
坐左一個月左右,
佢就不斷向呀琳發展攻勢
成日買糖呀
撩佢傾計,
有一次癲到買啲小飾物,
但係呀琳全部都冇要
因為佢都唔鍾意個男仔
你知啦,
呀琳唔係第一次咁樣俾人追
所以佢大把經驗
知道點樣應付
」我:「佢點樣同個男仔講先
唔通佢真係話,
唔q鍾意你咁呀
」Candice:「梗係唔係啦
係咁嘅話就死啦
佢話現階段想集中應付高考先
同埋話暫時冇乜感覺
唔好意思呀
」我:「呀琳好狠喎
」Candice:「我唔知佢係咪仲鍾意你啦
因為自從佢崩潰嗰日之後,
我地就好有默契咁樣
對你隻字不提,
我真係唔敢問佢
驚會令再一次佢唔開心
」我:「咁唔好問喇
」聽到呀琳拒絕左個男仔之後,
唔知點解我都覺得幾開心
證明其實我都係一個好自私嘅人
聽到佢有人追嗰陣,
都係有少少乸住乸住
明明佢一早同我冇關係,
就算佢有冇拖拍,
都唔會關我事
但我仍然仲係會為左呢件事而有情緒起伏
我:「今次返嚟係有野想搵你幫手
」Candice:「做咩呀
」我:「你記唔記得喺我地中四散學禮嗰陣,
你幫我同呀琳影左一張合照
全身相嚟嘅呢
」Candice:「記得呀做乜野
」我:「可唔可以幫我曬一張
最多俾返錢你
」Candice:「又要掛住人
又要唔搵人
都唔知你諗乜
」我:「你覺得我搵佢,
佢會唔會出嚟丫啦
」Candice:「我講左好多次
如果你真係好想見到佢,
我會幫你解釋丫嘛
」我:「唔好講住啦,
可唔可以幫手先
」Candice:「得啦
我遲啲俾你呀,
你下個月走丫嘛
」我:「係呀
」Candice:「我過幾日俾你丫
」幾日之後,
Candice真係俾左張相我
張相入面,
就係我同呀琳最接近嘅時刻
以後都再返唔到去呢個時候
之後我放左張相,
落我銀包度
咁我有時發姣,
想見到佢嗰陣
都可以隨時隨地拎出嚟丫
或者呀琳唔會知道,
今時今日,
呢張相仲係住緊我個銀包入面.