[真人真事][校園][純愛]《最陌生的人，就是曾經最熟悉的人》: 第四十三章
復活節假終於放完,
我地又要繼續返學
初初返到學校梗係唔多慣
放假mode仲未熄
感覺上,
返學只係一個契機,
等我可以見到呀琳嘅啫
又唔使諗藉口
跟住落嚟,
我地全班人無啦啦著晒火
因為學校個大考就快嚟
五月尾至六月頭,
考完之後基本上就等如放暑假
最多都係返一兩日
所以我地班搏晒命咁樣去攻個大考
反正攻完就可以休息
我同呀琳都一樣,
為左應付個大考,
喺臨考前嗰幾個星期六
同埋每日考完一科之後(我地學校考試放半日)
都有同佢去溫書
嚴格嚟講我只係想博懵同佢一齊出街啫
唔知佢知唔知我咁樣諗呢
我地原本想喺公共圖書館溫
但係,
落過去圖書館溝女嘅巴打都知道
星期六嘅圖書館係好q多人
基本上你要早啲去霸位
先至可以揀到你想坐嘅位
仲要好多pair都係一男一女,
證明大家諗嘅野都一樣
同埋另外一點,
公共圖書館嗰度,
你一大聲講少少野
就會惹來全場目光
有啲可能更加喺心入面媽叉你
最慘係,
有時唔係自己想大聲
唔係話想嘈到人,
係間唔中一兩句大聲左少少
例如可能係你計緊一條題目,
你諗左好耐都諗唔到,
但係忽然之間靈光一閃
你又即刻諗到點樣計
之後同隔離嗰個講,
「我計到喇
」嗰下真係好開心
但就係因為你嘅得意忘形,
令到你嘅聲量提高左
之後就會有班人鄙視你
呢種壓力都唔易克服
有見及此,
所以我地冇去圖書館溫書
反而去左社區中心溫
嗰個社區中心有一個地方係可以容納啲學生喺度溫書
而且冇圖書館咁多人,
五,六個左右
同埋佢地好包容啲聲音
唔會話一大聲少少就啤住你
當然啦,
我同呀琳都守規矩嘅
盡量保持安靜
有時真係要講野嘅,
咪細聲啲囉
當然啦,
呀琳個層次高我好多
同之前一樣,
好多時都係佢教我
我有諗過會唔會阻到佢,
但係佢同上次一樣,
都係話唔會阻
反而咁樣幫我溫
佢會再記得熟啲
咁佢都咁講咯,
我又點會拒絕佢嘅好意
鬼叫我本身都有私心咩.
考試嗰度冇乜特別野發生,
所以我都輕輕帶過
我地經過一輪拼搏之後,
終於完成中四最後一次考試
下一次考試就係中五喇
當時有邊個會估到,
中四考試同中五考試係完全唔同
我唔係講份試卷,
亦都唔係講啲題目
更加唔係講學校嘅考試制度,
你地唔明我講乜
唔緊要,
個故遲啲會答到你
總之呢一個唔同之處係我最唔想發生架啦,
好似講遠左少少,
返返嚟先
考完試當日,
我,呀琳,Candice三個一齊食晏
可能睇到呢度,
有巴打絲打會問,
呀琳究竟知唔知我同Candice個關係
你地實在太睇小我同Candice嘅默契
大佬,
由小學扮到中學
你估我地十幾年嘅演戲功夫係流架
所以呀琳都仲係未知
事後睇返,
亦都好彩佢唔知
呀琳望住我講:「你一定要食呀
費事你又好似之前咁樣
」佢意思嘅之前咁樣,
即係我慳錢唔食晏嗰陣
Candice:「人地冇話唔食喎
」我:「係囉我好似冇話唔食喎
」呀琳:「點知.......你會唔會臨......時變呀
所以要講定先
係喇就係咁喇
」之後我地就去左茶餐廳食
我:「你地對今次考試有冇信心
」呀琳:「都ok嘅
」Candice:「一樣
」呀琳:「唔使亂諗野喎,
你跟足我同你溫書咁樣做一定冇問題
」Candice:「點解唔同我溫埋
」呀琳:「你不嬲都唔鍾意同人溫書架啦
」Candice:「講下笑啫
」食完之後,
呀琳:「不如再食甜品咯
」我:「你啱啱先食完又食
」Candice:「唔好預我
嗰啲野嚟緊,
唔想食生冷野
」Candice真係好識做
明明糖水舖有啲野係熱食
都夾硬話唔食生冷野,
今次唔鬧你狗西啦
呀琳:「咁呀......
樂仔你陪我食啦
」我:「有得話唔得咩
」呀琳:「好野
」其實我好飽
亦都唔係好鍾意食糖水,
我話食嘅最大原因,
就係想睇到你聽到有人陪你食甜品嗰個開心樣
嗰一份一見難忘嘅微笑
我地同Candice分別左之後就去甜品舖,
呀琳:「一碗紫米露
」我:「照舊一個香蕉船
」呀琳:「你真係好鍾意食香蕉船喎
」我:「係呀
今餐順便多謝你幫我溫書溫左咁耐
」呀琳:「唔好講埋呢啲野啦
要多謝嘅,
係你上次孭我返屋企嗰陣
」我:「即係等價交換
」嗰一期我好鍾意鋼鍊
所以講左呢句野
呀琳:「梗係唔係啦
」我:「即係點
」呀琳:「你有冇孭我返屋企我都會教你
」我:「下
真係架
」呀琳:「咁......睇住朋友份上,
我唔會見死不救嘅
」我:「多謝你
」縱使你同我講,
話只係朋友,
不過我都好感激你咁樣做
喺度我想講一講,
收朋友卡並唔係最差,
最差最壞嘅係,
連朋友卡都冇得收
因為大家已經唔再係朋友,
呀琳:「食飽飽
」我:「咁走囉
」呀琳:「嗯
」我:「哎呀
」呀琳:「做乜
」我:「上次明明講好左今次食楊枝甘露
」呀琳:「係喎
哈哈
下次先囉
」我:「好
」呢個下次真係好遠,
遠到唔知幾時先再出現,
又或者,
可能已經唔知去左邊度喇.