[真人真事][校園][純愛]《最陌生的人，就是曾經最熟悉的人》: 第三十九章

第二日我地就相約喺巴士站
呀琳有一樣野好,
就係極度準時
基本上每次約親都唔會遲到
好鬼準時
以前問過佢點解咁準時,
乜唔使搞呢樣搞嗰樣咩
你知啲女仔係咁樣,
佢話自己都唔鍾意等人
所以就會好準時




如果唔係,
約定個時間出嚟做乜
都唔遵守嘅
咁我當然會對呀琳再一次加分
一去到我就呆一呆
點解呢
因為今日嘅呀琳嘅衣著同平時完全唔同
簡直可以用煥然一新嚟形容,
佢今日行運動少女風格
上身粉紅色運動t-shirt,




下身一條運動短褲
俾人感覺好清新,好有活力
頭髮紮左上去,
同平時有分別
佢平時唔會將頭髮紮上去,
可能我睇慣佢有執陰喺前面
加上我本身唔太鐘意女仔將頭髮紮上去
所以我覺得呀琳今日個頭係唯一敗筆之處,
當然都仲係好靚啦
喺我心目中仍然係芳華絕代




我:「成身運動裝束喎 」
呀琳:「梗係啦,
今日去踩單車嘛
靚唔靚 」
我:「靚就好靚
不過我覺得可以再靚啲 」
呀琳:「竟然係咁
咁你覺得點先再靚啲 」
我:「放返頭髮落嚟
睇慣你有執陰喺前面, 」
其實我原本只係想講下笑
冇其他特別意思
點知呀琳即刻放返頭髮落嚟
呀琳:「係咪咁樣 」
我:「係呀 」




估唔到呀琳會咁樣做
嗰下有少少開心,
當你鍾意嘅人肯為你做一樣野嗰陣
自自然然就有呢種感覺
可能佢做嘅嘢只係好小事都好,
你都仲係會覺得好開心,
呀琳:「咁搭車咯 」
我:「好呀.」

去到大埔,
我地個計劃係先去租單車,
之後踩到去沙田
順便喺嗰度還車,
然後就返屋企
完美計劃




攞完車之後就沿住吐露港出發,
原來上到車之後先發現,
呀琳係唔多識踩單車
成日踩到兩頭片,
有時一有啲唔受控制
就會叫,
好可愛
不過佢做乜都係咁可愛架啦哈哈
呀琳:「啊
哈哈哈 」
我:「原來你唔識踩嘅 」
呀琳:「唔緊要呀咪當玩下囉
反正有你喺我後面睇住我 」
得到自己鍾意嘅人嘅信任嗰陣
又會有一種被肯定嘅感覺




聽完之後會好開心
對住鍾意嘅人就係咁,
佢信任你,
你自不然都會感覺良好
如果係第二個
信任咪信任囉
關我叉事咩
我唔知你地係咪咁,
我就實係咁
好日都唔嚟大埔,
發覺景色真係幾好
空氣亦都唔錯
好多綠色植物,
而且喺吐露港望住個海個感覺都好正
當時係四,五月




所以唔會好熱,
啲海風吹埋嚟嗰陣,
真係好舒服
唔止我咁講,
連呀琳都認同
呀琳:「好舒服呀 」
我:「係 」
呀琳:「估唔到你今次咁醒
識得揀踩單車
有時喺市區玩得多,
出嚟呢度玩下都唔錯
環境又幾好 」
我:「不嬲醒開 」
呀琳:「至叻係你喇 」
我:「掌握到點樣踩未 」
呀琳:「少少啦
本身運動都係冇乜天份 」
我:「嗰個都係咁架啦
有邊個一踩就識 」
呀琳:「咁又係呀 」
原本想嚇下呀琳,
諗住扮晒野撞佢
又或者喺佢前面阻住佢
點知佢驚到咁樣
我梗係做唔出呢啲野啦
所以都係安分守己咁樣踩單車,
一路喺後面跟住佢
一年前,
我都好似今日咁樣
望住佢個背影,
一年後嘅今日,
雖然我都只係同一年前一樣,
望住佢個背影
不過已經係好唔同
上年,
我只係喺學校嗰度,
偷偷地趁食飯嗰陣跟住佢落地下
佢係唔知情
今年,
係佢命令我睇住佢
情況完全唔一樣,
可以嘅話,
我都想之後可以一路咁樣做
唔係因為我變態
而係覺得,
望住佢已經係我一種福氣
唔知係我幾多生先收到.