[真人真事][校園][純愛]《最陌生的人，就是曾經最熟悉的人》: 第二十八章

咁我地喺旺角睇完戲,
就梗係喺返旺角行架啦
我:「你想行咩呀
陪你睇丫 」
呀琳:「會唔會悶親你呀 」
我:「唔會 」
我成日都講,
陪著你最鍾意嘅人係唔會怕悶
不論係做乜都好
因為你嘅重點,




根本唔係放喺件事上面,
而係放左喺你陪嘅嗰個人度
咁又點會悶呢
除非轉左個人
咁就會覺得悶喇
呀琳:「咁不如去睇下衫囉 」
我:「好 」
唔通啲女仔真係特別鍾意睇衫
利申我就少睇衫嘅
有時老媽子叫我陪佢睇衫




我都唔騷佢
我知係有少少不孝
但係十幾歲嘅靚仔,
個心放左喺自己鍾意嘅女仔度都唔出奇丫
之後我地去左新之城,朗豪坊度睇,
大家都知道,
呢兩個地方,
平時已經多人架啦
更何況今日係除夕
簡直係多上加多




我冇諗過黃昏已經開始咁多人
簡直離曬大譜
嗰度咁多人,
其實我想拖住呀琳行嘅
一嚟避免走散左,
二嚟我都想搏懵拖佢隻手
不過都係衰淆底而冇咁做
咁我地就去左睇衫
呀琳:「樂仔幫一幫眼 」
我:「做乜 」
呀琳:「你一陣講下邊件靚就得 」
之後呀琳快刀斬亂麻,
拿拿聲拎左幾件出嚟
呀琳:「邊件靚呀 」
我心諗你著乜都靚架啦




仲使乜問我啫
我:「件件都咁靚 」
呀琳:「係咪真架 」
我:「真 」
呀琳:「咁如果一定要揀一件呢 」
死火喇,
佢咁樣問到就求其揀一件啦
我:「咁呀,
呢件最靚 」
呀琳:「其實我都覺呢件最好 」
哈哈,
唔通咁樣代表我地心靈相通
每個幼稚嘅男仔都一定試過咁樣諗,
只要雙方有共同嘅喜好或者目標,
你就會覺得同對方係心靈相通




繼而腦海會有無限幻想
但係當你成熟左,
你個腦就唔會再係咁諗,
甚至可能會嘲笑返以前嘅自己幼稚
但係諗深一層,
乜幼稚真係完全負面咩?
幼稚淨係換嚟我地嘅嘲笑?
喺我地幼稚嘅年代,
真係冇一樣野好
如果要我依家答,
我會答有得揀的話,
我都想返去幼稚嘅年代.

我地去睇衫都睇到六點幾,
呀琳:「不如食野嚕,




有少少餓 」
我:「好呀,
你想食乜 」
呀琳:「你話事啦 」
我:「邊行邊諗好冇 」
大家都知道,
除夕嘅餐廳基本上已經俾人卜晒
就算冇俾人卜,
基本上啲人多到
係連支針都插唔入
一係就嗰條隊,
長到呀媽都唔認得
呀琳:「度度都好多人喎
點算 」
我:「係囉,




真係好多人 」
之後呀琳講咗句野令我O晒嘴
呀琳:「不如我地掃街囉 」
你好難想像,
會有一個女仔,
主動向你提出喺除夕夜食掃街
而唔係話食高級餐廳
例如甚麼泰國菜,日本菜
當下連我都呆左
呀琳:「點呀,
唔鍾意呀 」
我:「唔係,
梗係冇問題啦
不過你得唔得呀 」
呀琳:「點解唔得呀 」
我:「你接受到一年嘅最後一晚係食掃街咩 」
呀琳:「冇問題呀 」
佢嗰句「冇問題呀」係爽快到令人難以置信
呀琳:「其實有時食野,
唔係睇食乜野嘅 」
當時嘅我唔明白,
佢呢一句說話,
其實係潛台詞嚟
但係嗰陣嘅我諗唔到真心想表達嘅嗰一句係乜
所以就冇理佢呢句野
之後我地一人用左三四十蚊去掃街,
依家用三四十蚊去掃街,
梗係掃唔到啲乜
但係十一年前係可以掃好多野
我仲好記得,
八蚊魚蛋就有十二粒
咁我地兩個人,
一人揸住一兜企喺條街度,
享受緊2006年最後嘅晚餐
講返起上嚟真係搞笑
呀琳:「其實食野真係唔使一定要咁貴
好似今晚咁咪幾好 」
就係佢呢個舉動,
令我再暗自對佢加分
我:「講俾人聽都冇人信,
我地喺除夕夜竟然係掃街 」
呀琳:「平淡是福呀 」
我:「你無啦啦講野咁玄嘅 」
呀琳:「明唔明呀 」
我:「唔明 」
呀琳:「我都預左架喇
蠢人蠢人 」
我:「快啲食啦
條街仲有好多 」
之後我地每隔幾間舖頭就買啲野食
買下啲魷魚鬚呀,串燒呀等等
呀琳佢就好為食
成日都想食我嗰啲
呀琳:「樂仔你咁好人
俾一句我丫 」
我次次都拒絕唔到佢
大佬點拒絕呀,
飲野又係,
呀琳:「你嗰杯好似好好飲喎 」
其實潛台詞即係可唔可以俾啖我飲
咁一如以往,
我係冇得唔俾佢飲啦
原來,
我地曾經都好似一對情侶.