[真人真事][校園][純愛]《最陌生的人，就是曾經最熟悉的人》: 第二十三章

大家都知啦,
中學時期係有聖誕假呢樣野架
咁當時距離聖誕假就愈嚟愈近喇
我仲未開聲約呀琳喺平安夜或者聖誕節出去
按道理,
Candice唔喺香港,
我約呀琳個機會就應該大增
但係唔知點解,
到我真正開口問佢嗰陣,
我就硬係有啲淆底




之前有幾次都有空間去問佢
但係次次都因為淆底而冇問
成日俾藉口自己
例如「Candice唔喺度啫,
唔代表要同我出去架 」
又或者「佢可能有其他朋友要約呢 」
搞到次次都冇問到
真激氣
不過各位巴打絲打都知架啦,
人就好衰格嘅




樣樣野都要迫到埋嚟先識做
唔係點解有咁多deadline fighter呢?
當然我都係啦

好記得喺聖誕假之前兩日,
我終於下定決心問佢喇
我知你地梗係又想鬧我,
問佢聖誕出唔出街姐,
使唔使咁淆呀
我都知




如果我有個朋友好似我咁 ,
我都一定會鬧佢使唔使咁扭擰
男人老狗問咪問囉,
怕咩瘀啫,
又唔係未衰過,
但係當呢個情況發生喺我身上嗰陣,
我自己又做唔到喎
當局者迷就係咁解
話說嗰日我地要補習,
補完習我地喺附近行左陣
唉死就死啦
我:「呀琳呀,
聖誕有冇野做呀 」
問就問左喇,
睇下個結果合唔合我心意喇




呀琳:「唔得呀
今個聖誕我要同屋企人去日本呀 」
唉,
真係晴天霹靂
估唔到連呀琳都去旅行
不過都正常嘅,
通常人都係鍾意去旅行
特別係女仔
明白嘅明白嘅
呀琳:「放心喎
我好快就返嚟
29號我就返到香港 」
29號,
即係除夕之前,
嗱,




仲未絕望呀
冇左個橙,
都仲有返個桔
到時我地可以一齊踏入2007年
咪仲好,哈哈
我:「咁我除夕約實你架啦
呀琳:「唔得呀約左人呀 」
都估到
呀琳係女神級人馬,
除夕呢啲大日子,
點會冇人約丫
你估好似我呢啲死毒勁咁咩
年年陪我過聖誕嘅,
就係左手,右手同埋電腦
咁多年都係一樣




呀琳佢又點會係咁丫
人又靚女,性格又好
梗係大把人約佢啦
仲點會得閒同我出街姐
好彩喺問之前,
個心都有打定底會衰
未絕望到要去跳樓咁誇張
過梗係有少少唔開心啦
我:「唔緊要啦
遲下再約咪得 」
唯有自己安慰自己啦
呀琳:「點解你唔問我約左邊個嘅 」
呀琳你真係丫
硬係要挖我瘡疤
想落我面咁話喎




如果你係Candice,
我一早鬧你死狗西喇
不過你係呀琳就算啦
體諒你
反而我就奇怪喇,
明明呀琳個好姊妹去左旅行
佢仲會約左邊個呢
唔通係啲靚仔
諗到呢度,
我又開始頹喇
我:「咁你約左邊個呀 」
呀琳:「俾你估下好唔好先 」
仲要我估
仲嫌我唔夠淒涼咩
不過我又戇居居到走去估
對住呀琳真係唔識拒絕
我:「有冇貼士呀 」
呀琳:「呢個人你識嘅 」
我:「好多同學我都識
有冇啲勁啲嘅貼士 」
呀琳:「呢個人鍾意踢波嘅 」
我:「我地學校有唔少人鍾意踢波架喎,
點估
勁唔勁架 」
呀琳:「我都唔知勁唔勁
因為我都冇睇過佢踢波 」
我:「俾多啲貼士我丫
估唔到 」
呀琳:「呢個人成日同我食甜品
又鍾意聽我彈琴
估到未 」
唔通呀琳只係當我做兵
原來唔係得我一個可以同佢食甜品
原來唔係得我一個可以聽佢彈琴
原來係有其他人做我呢個角色
我呢個角色並唔係唯一
並冇比其他人優勝
至少有其中一個人有我嘅福利,
我:「估唔到喎 」
呢個時候我已經再冇心情去估喇
所以求其話估唔到算,
呢個時候呀琳無啦啦用食指篤我個鼻
呀琳:「死蠢咁都估唔到架
我約左xx樂呀(xx樂係我全名) 」
原來呀琳約左我呀
心情真係來回地獄又折返人間
總算冇其他男仔有我呢個福利
我:「好呀好呀 」
呀琳:「你有冇搞錯呀
咁你都估唔到
啲提示咁明顯,
定係你覺得我彈過俾好多人聽
同過好多人去食甜品呀 」
我:「係係係
我蠢我蠢 」
呀琳:「梗係你蠢啦
仲要係好蠢嗰隻呀 」
我:「係
對唔住,對唔住 」
呀琳:「好啦
咁我呢幾日再問你要咩手信啦 」
我:「好 」
仲可以收到呀琳嘅手信
簡直係bonus
就係咁,
我終於約到呀琳喇