[真人真事][校園][純愛]《最陌生的人，就是曾經最熟悉的人》: 第一章

大家好,
我叫做樂仔
個個都咁係叫我
由讀書都出嚟做野都係,
今年廿六歲,
話後生都唔後生喇
大大下出嚟做野先發覺
中學生活係最開心嘅
嗰陣嗰種無憂無慮係無價
係最純樸嘅(至少我中學生活係咁)




唔會好似依家咁
有時會為左其他因素而同一個你唔夾嘅人做朋友
諗諗下真係好懷念
今次呢個故發生喺2006年
亦即係11年前,
依家覺得2006年係11年前好驚訝,
感覺上2006年唔似11年前咁耐
不過事實上又真係咁耐
唔知各位巴打絲打有冇呢種感覺呢
定係其實係我問題




一直沉醉於以前嘅時光,
唔肯/唔識向前踏一步,
所以先有呢種感覺
我都唔知,
講返呢個故先,
2006年嘅我係讀緊中四
我地學校由中四開始唔會再調班
呢個規則對於我而言就梗係好開心啦
點解
因為今年同我女神同一班




最重要嘅係,
今年同班代表下年都係同班
喺度介紹一下女神先
女神個名叫呀琳,
係全級其中一位靚女嚟
但以我所知,
呀琳喺全級個靚女排行榜入面個位置唔算頂尖
只係前列左右,
啲同學講起級花嗰陣,
第一時間都唔會提及呀琳
有幾次成班仔圍埋一齊傾女嗰陣
佢地對呀琳個評語只係一個幾靚嘅女仔
但我唔知點解我就係好鍾意佢
眼大大,皮膚白,
鼻哥生得高,




塊面唔大
食正我杯茶

我同呀琳今年讀精英班,
想當初喺中三狂刨書
老實講並唔係因為想成績好啲,
而係因為知道呀琳佢讀書成績好好
所以先搏晒命溫書
希望可以同佢同一班
我同佢中一至中三未同過班,
佢永遠都係精英班
以前中三嗰陣,
如果要望佢的話,
就要成日去廁所,圖書館先得
因為呢兩條路徑係必經佢班房




咁先望到佢,
所以我成日俾人屈尿頻同埋喺圖書館上咸網
首先我並冇尿頻,
更加冇喺圖書館上咸網
要上我都返屋企先上
其實我都係想望女神啫
每個男仔都一定經歷過呢個情節,
之後諗諗下,
不如試下出晒力刨書
搏同呀琳同一班
咁咪唔使背負住咁多罪名
又成日有得望,
甚至可以有更多接觸
以前係咁毒架喇
咁當然唔係話搏就搏架啦,




自己一個普通班學生
要喺不足一年入面由普通班升上精英班
唔搵人幫手基本上係難過登天
好彩當時身邊都有一個可靠嘅人
咁先至成功