香港都市傳說三：無法逃離的上環地鐵站: 第二十二章：三人的共通點
「答呀！快啲答呀！你再唔答，下場會比佢更慘！」阿有看著阿朗，神情變得更加瘋狂。
阿朗心中仍在思考著，到底阿達是因為回答了「認識」而導致現在的下場，還是中間露出了甚麼破綻，被阿達悉破了才會失去雙手。
他實在猜不透阿有希望他如何回答，而且時間上亦不容他多想，阿朗只好在阿有發難前作出選擇。
「唔……唔識！我唔識佢！」阿朗說出答案後，阿有的神情明顯出現了變化。
「唔識？你話你唔識？」阿有用冰冷的眼神看著阿朗。
「係……我唔識！我從來無見過咩大佬全！同埋就算見過，隔咗成幾十年，佢個樣都唔同咗啦，我又點會認得佢！」
「唔識……唔識……既然係咁，留你喺度都無任何價值啦！」阿有一步一步逼近阿朗。
「你……你究竟想點呀？阿達話識佢，你就斬斷咗佢對手！我話唔識佢，你就話我留喺度無任何價值！你根本由始至終都無諗住放過我地！」阿朗邊後退邊大喊。
「你無諗住放過我地就一早殺咗我地啦，都唔知你留我哋喺個車站咁耐做乜！咁樣好好玩咩？」阿朗續說，阿有則沒有理會他，繼續慢慢逼近他。
「你話佢地唔應該殺你，計我話你根本就係抵撚死！你唔諗住偷嘢又點會遇到大佬全班人，遇唔到大佬全班人你根本就唔會死！仲話咩佢地睇唔起你，根本係你自己戇鳩，先會搞到咁！依家又搞埋我地呢啲無辜嘅人，你根本仲衰過大佬全，你根本就係一條仆街！」阿朗的精神壓力已經到達頂點，他已不能再正常地思考，甚麼是正確，甚麼是錯誤，他已沒有能力分辨了，現在的他基本上是憑著本能來行動。
而當阿有聽到阿朗這番說話，竟真的停了下來，只是緊緊的盯著阿朗，難道阿朗的說話竟是阿有心中的正確答案？
「無辜？你真係覺得自己無辜？」阿有冷冷地問。
「痴線，你死嗰陣我都未出世，邊有可能關我事！」阿朗怒道。
「你同呢兩個人，根本同大佬全一樣，做錯咗嘢唔肯認！仲要若無其事咁生活落去，有無諗過你地自己做過嘅嘢，會摧毁咗其他人！」阿有冷冷地說，似在暗示三人背後有某種共通點。
「痴線！我問心無愧！我無做過任何衰嘢，我無！」阿朗怒哮。
「哈哈哈哈！問心無愧？你話你問心無愧？六年前你做過啲咩，你自己心知肚明！」阿有的眼神，緊盯著阿朗不放。
「痴線！我會做過……」阿朗本想繼續反駁，但腦袋卻被「六年前」這三個字刺激到，大量被封印的回憶開始湧現出來。
「唔好以為咁樣就可以忘記一切！」阿有說。
「呀！！！！唔係，我……我無心，阿豪、阿仁……唔係，無可能！呢啲記憶，唔係！唔會架！！！！」阿朗按著自己的頭，痛苦地慘叫著。
「哼！三個人入面你都算最賤格！到呢一刻都仲係唔想承認！呢啲記憶真定假，你自己最清楚！」阿有不屑地說。
「唔會！無可能！我啱啱先同阿豪send完message！點會……你呃我！你呃我！」阿朗不斷搖頭，不想承認腦海裏的記憶。
「我呃你？定你自己呃緊自己？你、Daniel同阿達，根本同大佬全一樣！一樣都係賤人！」
「無可能！走，走呀！」阿朗把頭用力撞在地上，想藉此驅散腦內的影像。
「發生咗嘅嘢，你以為真係咁容易可以掉低咩？Daniel搞大咗人地個肚，逼個女人墮咗幾次胎，最後嗰次手術感染咗病毒而死，Daniel知佢出事之後一次都無見過佢！」阿有用鄙視的眼神看著已經變成黑炭的Daniel。
「阿達你都唔好得去邊，你應該知道你呃咗好多人錢啦！其中有個四十幾歲嘅男人，智力有問題，你呃晒佢啲錢之後，佢成家人都多得你唔少啦，佢老豆老母七八十歲，邊受到呢啲刺激，佢地最後開煤氣爐自殺死呀！」阿有走近失去了意識的阿達身旁。
「至於你……阿仁同阿豪……」阿有的說話被阿朗打斷了。
「唔好講！唔好講呀！一定係假！一定係假架！我唔信，我唔會信你！」阿朗額前流出大量鮮血，但疼痛並沒有辨法幫助他驅走那些「虛假」的影像。
「哼！你地幾個真係人渣，Daniel同你一樣都係死都唔肯認錯！所以我先話，留你喺度都無價值！」阿有慢慢走近阿朗，大概是準備動手了。
「你唔好過嚟！唔好呀！你......你要搵大佬全啫，我幫你搵！我幫你搵，我一定搵到佢！」阿朗顫抖地說。
「你放心，我唔會放過大佬全！大佬全係抵死，但你地都一樣抵死！」阿有邊說邊逼近阿朗。
「一係咁啦，我幫你搵大佬全之外，我仲幫你搵其他賤人出嚟，你放過我啦......」
「唔需要，你依然唔明白，你自己都係賤人，有咩資格話幫我！」阿有來到阿朗面前，鄙視地看著他。
「唔係，我當日真係無心，我唔想......我唔想架......原諒我......原諒我啦！嗚嗚......」阿朗哭了出來，不知道是為了即將到來的死亡而哭泣，還是內心真的感到後悔了。
「原諒？你死咗之後，自己親口同佢地講啦！」阿有的右手變化成一團火炎。
「對唔住......對唔住......阿豪......阿仁......我錯啦，對唔住......」阿朗閉上了眼睛，內心充滿了懊悔。
他感到面前的溫度逐漸升高，雖然看不到，但他知道，阿有準備下手了。