香港都市傳說三：無法逃離的上環地鐵站: 第十四章：上環地鐵站的過去（上）

兩人在第一列的車廂裏，緊張的看著四周，大概是怕會出現甚麼變化吧！
 
兩人的身軀突然晃了一晃，差點站不住腳。
 
「開……開車啦！我地可以返去啦！」阿朗興奮地大喊。
 
「係……係呀！可以返去啦！可以返去啦！」阿達也高興地回應。
 
兩人興奮地在車廂裏大喊大叫，手舞足蹈，差不多一分鐘後才安靜下來，坐在椅子上。
 




興奮的感覺稍為退卻後，無事可做的兩人，氣氛頓時變得尷尬起來。
 
始終兩人並不熟悉對方，一起行動只因遇上同一件怪事。
所以他們在以為事情得到解決的瞬間，沒有了那共同的接合點後，他們連普通交談也做不到。
 
可是，他們始終存在於同一車廂裏，而且也不知道列車會於何時到達目的地，在沒有任何事情可做的這個空間裏，不去交談簡直是不可能的事！
 
但時間愈久，尷尬的氣氛便會愈強，再次交談便會變得更為困難。
 
阿朗也意識到這點，所以他選擇打破沉默。




「係呢，你估我地要幾耐先出返去呀啦？」
 
「我諗……應該差唔多一個鐘啦。因為我記得我頭先落車，用咗差唔多一個鐘，依家出返去都應該要咁上下時間。」阿達回應。
 
「一個鐘咁耐……不過最緊要返到出去！陣間出到去真係要即刻衝返屋企，係呢，你住邊架？」
 
阿朗和阿達為了渡過這段漫長的時間，便開始閒聊起來，兩人幾乎無所不談。
 
「咦？原來你都係住柴灣架？」阿朗笑說。
 




「係呀！都住咗喺嗰度好多年，一直都好地地，點估到搭搭下車會嚟咗呢度。」阿達語氣中透出一絲的不安。
 
正當阿朗準備回應時，列車突然劇烈的搖晃起來。
 
「搞咩呀？唔係地震呀？」阿達嚇了一跳。
 
「香港邊有地震架？應該無事嘅。」阿朗回應。
 
兩人還沒有弄清楚發生甚麼事情，地鐵漆黑的玻璃突然變得光亮起來！
在一片亮光中，玻璃慢慢浮現出一些模糊的景像。
 
景像不太清晰，像在收看接收不良的電視般，夾雜著一些雪花。
 
「咩嚟架？無啦啦點解會有畫面嘅？」阿達不解地說。
 




阿朗心裏亦有同樣的疑問，但他心裏比較在意的，是這輛列車到底是不是能夠回到原來的世界！
 
畫面開始愈來愈清晰，玻璃上的畫像亦慢慢能夠看見。
 
「阿朗哥，你睇下，似唔似我地依家啲地鐵站呀？」阿達看到畫面上，映照著六七個工人，好像正在施工似的。
 
「似……似呀！不過，呢個地鐵站好似仲起緊咁。」阿朗對阿達的說法表示認同。
 
「唔知呢個咩站呢？同埋啲人啲衫咁奇怪嘅？好似好舊咁。」阿達指著玻璃說。
 
「我估……應該係以前啲工人嘅制服……」阿朗心中頗肯定這個想法，因為他曾經在一些回顧節目上看過。
 
「搞咩呀？無啦啦播片俾我地睇……」阿達不安地說。
 
「靜啲！你聽下！」阿朗突然向阿達示意安靜下來，仔細聆聽著四周，阿達也跟著一起聆聽。




 
「喂，快手啲啦，唔駛做呀！」玻璃裏傳來一把粗獷的男人聲。
 
「朗哥，有聲架！」阿達壓低聲線，指著玻璃向阿朗示意，阿朗點頭表示知道。
 
「喂！唔好偷懶呀！快手啲！」玻璃裏再次傳來那把男人聲，阿朗和阿達也閉上了口，仔細看著玻璃和傾聽著那些說話。
 
「大佬全！吊頸都要透下氣架！食支煙先啦！」畫面上的另一個男人對著那個看似工頭的人說話。
 
「唉！好啦，休息十五分鐘！」大佬全一聲令下，工人們都發出歡呼的聲音。
 
而剛剛那個要求「食支煙先」的男人，慢慢走到大佬全身旁。
 
「大佬全，你都食支煙先啦！」他把煙遞給大佬全。
 




「成日掛住食煙，好心你啦坤仔，專心啲做嘢啦，單工程趕緊工架！」大佬全口上是這樣說，但手已接過坤仔給他的香煙。
 
「唔怕啦，都就埋尾啦！話時話啦大佬全，呢個上環站真係有啲邪邪地喎，好地地中層起個月台，又唔鋪路軌又唔整電纜，我聽人講呀，呢條路好似係通去地鬼門關，啲大粒佬先唔敢郁呢條路！」坤仔神秘地說。
 
「邪你個死人頭咩！呢度真係去鬼門關我第一個送你入去！」大佬全打了坤仔一下。
 
「唔係呀大佬全，我聽人講呀，啲大粒佬為咗扮正常，先要派我地嚟開工做下樣！嗱嗱嗱，我唔係亂講架，財叔之前咪喺度做嘅，跟住佢有日突然之間暈咗，醫生話佢心臟病發呀嘛，不過大家都知財叔一向鬼打都無咁精神，點會無啦啦心臟病發啫！計我話，都唔知係咪俾嗰啲嘢嚇死嘅！」坤仔裝作害怕地說。
 
「如果咁易嚇得死我就日日叫啲手足匿埋係度嚇你！唔駛等你喺度阻頭阻勢！好啦，開工啦！」大佬全拍了坤仔一下，然後大喊。
 
「喂大佬全，未食完呀支煙！」坤仔看見其他人都開始重新工作，只好把煙蒂掉在地上，然後踩熄了它的火焰。