[人性] [感情事]我不會講你知，其實是第幾次: 晴天行雷

之後Pe就好似扮哂冇野咁， 
當然我都唔會篤穿佢啦。 
反而Pory係淨低兩日都好奇怪。 
我諗唯一既可能性，就係個晚佢知道我地訓埋一齊掛。 

好快，我地就番到英國。 
我就同樂仔提起呢件事， 
佢仲問我人地係咪人妖喎。 
其實我識左Pe同Pory冇耐，就已經成日叫佢地lady boy。 
諗起都覺得自己仆街。 


另外，樂仔同我提起一件事，令我有少少擔心。 

"喂，你知唔知Stella最近有冇咩事？ 
Candy話佢呢排都神神化化喎。" 

"我淨係知佢同軒仔分左手咋。 
佢做咩呀？" 

"我都唔知呀，Candy話佢好似， 
好似咋下，佢飛左軒仔係因為中意左第二個。 


Candy問佢，佢又話冇。 
但係呢...有人見過佢同第二個男仔一齊。" 

"下？朋友咋嘛？Stella點會係見異思遷既人。" 

"我都唔知呀，總之佢呢排怪怪地。 
Candy約親佢都話唔得閒。" 

聽完樂仔講完，我真係有少少擔心Stella亂識男仔。 
軒仔咁好都唔要，但轉頭又同第二個一齊？ 


呢樣都算喇，我聽到下一個消息，更加震驚。 

"係喎，仲有呢... 
我諗左好耐講唔講你知。 
拿，我都係聽人講架咋。 
聽講Ada有人追喎。"