[人性] [感情事]我不會講你知，其實是第幾次: 東京夜(3)

如果我可以取代到個個男人，
令到Ada 開心幸福既話，
我絕對願意咁做。

但係，我真係可以咩?
我當然有諗過追Ada，
只不過我絕對冇信心去做一個百份百好男友。
如果我同Ada一齊，我可唔可以完全放低Stella ?
如果我冇信心可以放低，到最後我只會成為傷害Ada既另一個男人。



"Sorry Hugo。我意思係你既行為舉止真係好似佢。
我同你一齊去唔同地方，我有時會有個錯覺我仲同緊佢一齊。
當然，我知道你對我好好。
但我仲係不自覺將你地連埋一齊..."

我突然諗通左。

"其實你中意佢乜野?" 我問Ada。

"我...佢追我之前好細心，好識照顧我需要，又會俾驚喜我。我就好似一個小妹妹，佢係我哥哥咁。"



"如果有一個比佢更細心，更識照顧你既男人出現，你又會唔會放低佢?"

"我諗唔會..." Ada簡單直接咁答。

"點解呢? 一個更好既人喎。"

"我唔識答。我中意佢掛。感覺既野控制唔到。"

"係囉。你未遇到一個你更有感覺既人姐。


如果真係放唔低，不如唔好嘗試去控制，
做番自己啦。
想諗佢就諗佢，想喊就喊。
既然我地愈刻意去取代個個男人，
去忘記個個男人，但又偏偏唔成功。
咁不如我地掉番轉咁做。"

"我唔係好明.." Ada 一臉疑惑咁望住我

"如果你想當我係佢既話，
就當我係佢啦。"