[人性] [感情事]我不會講你知，其實是第幾次: 東京夜

我地展開左東京之旅， 
行程上其實唔算好密。 

新宿，澀谷，淺草，銀座等等我地都有去。 
有時候，我地都會去下咖啡廳坐下。 
每去到一個地方，Ada都會同我講番佢同前度係個到做乜野。 
每一個細節佢都記得好清楚。 
每一次佢講起佢前度既時候，時而雙眼發光，有時又閃過一絲哀傷。 
聽佢講完，我都會覺得有d酸酸地既感覺。 
畢竟佢既行為話俾我聽，佢並未放低個個男人。 



其中一晚，我地買左少少酒番去傾計。 

"Hugo，多謝你專登陪我過黎日本。" 

"傻啦，當初呢個方法係我諗出黎。 
我緊係捨命陪君子啦。 
其實我同你都去左好多地方， 
你覺得呢個方法有冇用？" 



"嗯，有用呀。 
起碼我而家去好地方都係諗起你丫。 
雖然我知道我冇可能忘記佢。 
但係我而家諗起佢，都已經冇咁痛。" 

"幫到你就好。" 
某情度上，我覺得Ada只係因為唔想令我失望先話有用。 
當然，我亦唔會篤穿佢。 
究竟點樣先可以幫到佢？ 
點解個個男人可以影響佢咁深？我唔明白。 



唔知幾點，我不自覺咁訓著左。 
直到半夜扎醒，我見到Ada唔係我身邊。 
我見到洗手間既燈著左，我推開門，Ada坐左係地下。 

佢見到我入黎，抬起頭望住我，佢喊緊。