[人性] [感情事]我不會講你知，其實是第幾次: 神秘既火車姐姐

"做咩事？" 我問火車姐姐。 

"冇呀，我，有少少悶姐。 
你唔得閒就算啦。"　火車姐姐又係好奇怪。 

"我下次陪你啦好嗎？我今日好攰呀岩岩去完camp。"　我冇乜心情出去。 

"好啦，早d休息呀Hugo。" 

呢排既火車姐姐都係咁樣， 


好飄忽。 
我問佢係咪唔開心，佢又唔話我知。 
所以都係不了了之。 

好快就開學喇。 
我到而家都仲未諗好點樣處理同Ada既關係。 
我一直都盡量避開佢。 
就算見到佢，我都同佢保持距離。 

直到有一日，Ada終於問我關於呢件事。 



"Hugo，可唔可以傾兩句？"佢襯上堂前問我。 

"可以，做咩事呀？" 

"我地出去傾？"Ada冇等我已經行左出lecture hall。 
我唯有跟埋出去。 

"你點解要避開我？"Ada單刀直入 



"我...冇呀。"我額頭而家應該刻左心虛兩個字。 

"唔洗厄我。 
又係你自己話當我好朋友既， 
但係自從ocamp之後，你又冇啦啦變哂。 
如果你有咩原因既，你可以講我聽架喎。"　Ada既真心，令我唔想再厄佢。 

"我唔係咁既意思。 
我真心當你好朋友架。 
不過...唉...好啦我講你聽啦。" 

我將我同Stella家姐講過既野講哂俾Ada聽。 
當然，我同Stella既事，我冇完全講哂。 

Ada聽完之後，淨係問左我一句： 


"你仲記得當初佢愛既你係點樣嗎？"