[人性] [感情事]我不會講你知，其實是第幾次: 繼續ICQ
練完波，我老友樂仔仲問我個女仔邊個黎。
我話 “咪咁多事啦!”
之後自然就去左搵Bobo。
“西利喎，咁都認到我。”
“緊係啦！你而家去邊呀？”
“緊係番屋企沖個涼啦！”
“順路呀，一齊行啦。”
其實我同佢都唔算順路，不過既然有靚女同行，我就冇所謂啦。
我地幾乎乜都傾一餐，傾下傾下就已經到佢樓下。
“好啦，番去再傾啦，拜拜。”我講完就準備轉身走人。
“下？你咁樣就走架喇？” Bobo問我。
我心諗，唔係你想我點呀？上埋你屋企好冇？
當然我把口就唔會咁講。
“係呀，你都到啦，我都番屋企喇。”
“咁冇野喇，拜拜。”
唔知點解，總係覺得Bobo怪怪地。
番到屋企，沖個涼，就ON ICQ玩下。
Bobo就hi我喇。
“你都唔係咁樣衰姐，做咩成日話自己樣衰。”
“算你識貨啦。唔通我同你講我靚仔咩？”
“不過你踢波就…咁近都唔入。哈哈。”
“踢波既野，你識D乜丫。”我差D就想同佢講你識條春咩。
呢一晚，我地不知不覺咁傾到３點。